Khamiis 15 jun 2026 {HMC} Xilli maalmihii la soo dhaafay la hadal hayay qorshe dowladda Soomaaliya ku aas aaseyso ciidamo si toos ah u hoos yimaada oo ku sugan deegaannada Puntland ayaa waxaa magaalada Laascaanood saacadihii la soo dhaafay gaarey askar qeyb ah askartaasi oo sugi doona Amniga Caasimadda Dowlad goboleedka Waqooyi Bari.

Askartan ayaa waxaa duleedka Laascaanood ku soo dhaweeyay Madaxweynaha Dowlad goboleedka Waqooyi Bari, Cabdiqaadir Firdhiye, isagoo tilmaamay in ay yimaadeen dhulkooda, isla markaasna ay isku diyaariyaan sugida amniga, iyagoo tillaabo ka qaadaya cid kasta lid ku ah Amniga.

“Waxaad u taagan tihiin in aad nabad galyada sugtaan, ciidanka aad ka tirsan ee Xoogga dalka iyo walaalahiina Waqooyi Bari waa in aad is kaashi muujisaan, waxaa tihiin dadkii xoreeyay Laascaanood” ayuu yiri Madaxweyne Cabdiqaadir Firdhiye.

Dhinaca kale, War-saxaafadeed ka soo baxay Wasaaradda Gaashaandhigga Xukuumadda Federaalka Soomaaliya ayaa lagu xusay in Ciidan ka tirsan Xoogga Dalka oo uu hoggaaminayo Jeneraal Jimcaale gaareen magaalada Magaalada Laascaanood.

Askarta ayaa qeyb ka noqon doona sugida Amniga martida ku sugan Laascaanood oo ay qeyb ka yihiin Madaxda Sare ee dalka sida Madaxweyne Xasan Shiikh Maxamuud iyo Ra’iisul wasaare Xamae Cabdi Barre.

Magaalada Laascaanood ayaa martigelin doonta munaasabadda caleemasaarka Madaxweynaha iyo maamulka Dawlad-Goboleedka Waqooyi Bari Soomaaliya.

Khamiis 15 jun 2026 {HMC} Dowladda Masar ayaa wada qorshe ay ku soo dadajineyso ciidan ay keeni doonto gudaha Soomaaliya, xilli xiisad ay taagan tahay gobolka Geeska Afrika.

Wargeyska The National oo soo xiganaya ilo wareedyo ayaa baahiyay warbixin la xiriirta qorshaha Masar ee geeska Afrika iyo walaaca ay ka qabaan Aqoonsiga Israa’iil ay sheegtay in ay siisay Somaliland.

Masar ayaa muujisay sida lagama maarmaan u yahay ilaalinta amniga Badda Cas oo ah marin muhiim u ah isku socodka Maraakiibta iyo socdaalka.

Qorshaha Masar ayaa ah in Soomaaliya ay keento kumanaan ciidan iyo saraakiil isugu jira, si ay qeyb uga qaataan amniga iyo la dagaalanka AS.

Sidoo kale, Wargeyska The National ayaa tilmaamay in Masar qorsheynayso in la dhiso saldhigyo iskaashi oo lagu ilaaliyo marinka istiraatiijiga ah ee Baabul Mandab.

“Aqoonsiga Israa’iil ee Somaliland ma aha oo kaliya arrin siyaasadeed, balse waa mid milatari oo toos u taabanaysa amniga biyaha iyo danaha Masar,” ayuu yiri falanqeeye dhanka amniga ah oo u waramay wargeyska.

Masar ayaa aaminsan tahay in joogitaanka Israa’iil ee waqooyiga Soomaaliya ay horseedi karto in Itoobiya ay hesho taageero militari iyo farsamo oo wiiqi kara cadaadiska Masar ee arrimaha Webiga Niilka.

Xukumadda Qaahira ayaa kamid ah dalalka sida adag uga hor yimid aqoonsiga Israa’iil sheegtay in ay siisay Somaliland, iyagoo ku baaqay in la ilaaliyo midninada iyo madaxbannaanida Soomaaliya.

Arbaco 14 jun 2026 {HMC} Kooxo hubeysan oo ka tirsan Kurdiyiinta ayaa maalmahan isku dayay inay ka gudbaan xadka u dhexeeya Dowladda Ciraaq iyo Iiraan. Hase yeeshee, ka hor inta aysan kooxahaasi gudaha u gelin dhulka Iiraan, waxaa dhaqdhaqaaqooda ogaaday hay’adda sirdoonka Turkiga, taas oo si degdeg ah ula wadaagtay ciidanka Iiraan.

Arrintaas ayaa ku qasabtay Ilaalada Kacaanka Iiraan inay qaadaan tallaabo militari, iyagoo dagaal toos ah la galay kooxaha Kurdiyiinta ee hubeysan, kuwaas oo ugu dambeyn dib looga riixay aagga xadka, sida ay maanta werisay wakaaladda wararka ee Reuters.

Arbaco 14 jun 2026 {HMC} Wasaaradda Difaaca Denmark ayaa ku dhawaaqday inay kordhinayso joogitaanka milatariga ee jasiiradda Greenland, iyadoo diraysa kumannaan askari, diyaarado dagaal iyo maraakiib,

waxaana ku biiraya boqollaal askari oo ka socda xulafada NATO. Tallaabadan ayaa imaneysa xilli indhaha caalamku ku jeedaan Bariga Dhexe, balse Denmark waxay doonaysaa inay xoojiso gacan-ku-haynta amniga Greenland,oo ka mid ah goobaha uu indhaha ku hayo Trump.

War-saxaafadeed rasmi ah oo maanta la soo saaray ayaa lagu sheegay in kordhinta joogitaanka milatariga loogu talagalay xoojinta amniga gobolka Arctic iyo Waqooyiga Badweynta Atlantic, iyadoo la ilaalinayo xarumaha muhiimka ah, la taageerayo hay’adaha ammaanka ee Greenland, lana fulinayo hawlgallo cirka iyo badda ah.

Arbaco 14 jun 2026 {HMC} Mareykanka ayaa bilaabay habraaca daadgureynta boqolaal askari oo ka tirsan ciidamadiisa kuna sugan saldhigga cirka ee Al Udeid ee dalka Qatar,

Saldhigga Ciidaanka cirka ugu weyn ee Mareykanka uu ku leeyahay Bariga Dhexe, iyadoo go’aankan lagu sheegay inuu ka horreeyo suuragalnimada tallaabo militari oo uu amray Trump oo ka dhan ah Iiraan.

Sida ay sheegeen sarkaal Mareykan ah iyo qof kale oo arrinta xog-ogaal u ah oo la hadlay NBC News, askarta ku sugan saldhigga ayaa loo rarayaa xarumo kale iyo hoteello ku yaalla gobolka, si looga fogeeyo khatar kasta oo iman karta haddii weerar uu kiciyo jawaab-celin militari oo ka timaadda Iiraan.

Arbaco 14 jun 2026 {HMC} Itoobiya iyo Israa’iil ayaa caawa soo gabagabeeyay wareeggii afraad ee wadatashiyada siyaasadeed ee u dhexeeya labada dhinac, kuwaas oo ka dhacay magaalada Qudus.

Sida ay sheegtay Wasaaradda Arrimaha Dibadda Itoobiya, wadahadalladu waxay diiradda saareen xiriirka labada dhinac, xaaladda Geeska Afrika, Bariga Dhexe, iyo arrimo kale oo caalami ah.

Waxaa sidoo kale laga hadlay iskaashiga horumarinta, ganacsiga, maalgashiga, tiknoolajiyadda, ilaalinta biyaha, tababarrada, dhisidda awoodaha, iyo xiriirka bulshada ee labada dhinac.

Waxaa kaloo la sheegay in wadahadalladan lagu xaqiijiyeen muhiimadda istiraatiijiyadeed ee Itoobiya ee gobolka, waxayna ku heshiiyeen in la ballaariyo iskaashiga, la xoojiyo wadahadallada, isla markaana la ilaaliyo wax loogu yeeray dhaxalka taariikheed ee ay wadaagaan.

Arbaco 14 jun 2026 {HMC} “Madaxwayne Dani, wuxuu leeyahay qorshayaal qarsoon oo lid ku ah mabaadi’dii iyo ujeedooyinkii loo asaasay Puntland.

waxa aynu ka jawaabi weyney duulaankii Israa|l ku soo qaaday Diinta & Dalka si gaar ah dadka iyo dhulka Puntland, waxa se yaab leh in Imaaraad oo lagu eedeeyey kala-goynta dalka Soomaaliyeed ay Puntland saacado uga jawaabto.

Waxa habboon in dadka Puntland qaataan tallaabooyinka uu siinayo dastuurka dalka & kan Puntland… lama sii aamusnaan karo.”

Arbaco 14 jun 2026 {HMC}Arbaco, January 14, 2026 (HOL) – Ciidanka Hay’adda Nabad-Sugidda iyo Sirdoonka Qaranka Soomaliyeed ee NISA ayaa howlgal qorsheysnaa oo ay maanta ka fuliyeen duleedka degmada Afgooye ee gobolka Shabeellaha Hoose waxay ku dileen xubin ka tirsanaa Al-shabaab.

Warsaxaafadeed kasoo baxay Taliska NISA ayaa lagu sheegay in ninkan la dilay uu kooxda All-shabaab u qaabilsana diyaarinta iyo aasida miinooyinka dhulka lagu aaso ee lagu beegsan jiray ciidamada amaanka iyo dadka shacabka ah.

Howlgalkan oo lagu tilmaamay inuu ahaa mid si gaar ah loo qorsheeyay oo lagu beegsanaaya6 xubno khatar ku ahaa amniga degmada iyo deegaanada ku dhadhaw ayaa lagu khaarajiyay ninkan oo la sheegay in mudo lagu raad joogay.

Howlgalka oo si taxaddar leh ay u fuliyeen ciidanku, ayaa lagu khaarijiyay dhagar-qabahaasi, iyadoo laga soo furtay qori nooca AK-47 ah” ayaa lagu yiri qoraalka kasoo baxay NISA.

Warka kasoo baxay NISA laguma shaacin magaca ninkan howlgalka qorsheysna lagu dilay iyo sidoo kale hadey jiraan khasaare kale oo ka dhashay howlgalkan ka dhacay duuleedka degmada Afgooye ee gobolka Shabeellaha Hoose.

Ugu dambeyntii qoraalka kasoo baxay NISA ayaa sidoo kale lagu sheegay howlgallada ka dhanka ah Al-shabaab ay sii wadi doonan ciidamadeed ilaa inta ay ka xaqiijinayaan amniga guud ee dalka.