Jimco 11-Oct-2024 {HMC} Wasiirka Tamarta dowladda Turkey Alparslan Bayraktar ayaa sheegay in markabka sahminta shidaalka ee Oruç Reis uu ku sii dhowaanayo xeebaha Soomaaliya, halkaasi oo la filayo in uu ka billaabo shidaal baaris.

“Markabkeena Oruç Reis, oo ay weheliyaan maraakiibta caawineysa iyo maraakiibta ciidamadeena badda, waxa ay si nabad ah uga gudbeen Kanaalka Suweys, waxayna hadda ku wajahan yihiin Soomaaliya,” ayuu wasiirka ku yiri qoraal uu soo dhigay barta X.

Markabka ayaa xeebta Istanbul ka soo dhaqaaqay 5-tii October kadib markii loo sameeyey xaflad sagootin ah, oo ay ka qeyb-galeen mas’uuliyiin Soomaali iyo Turkish ah, oo uu ka mid yahay madaxweyne Reece Tayyip Erdogan.

Howlgalka markabkan ayaa ka dambeeyey heshiis Iskaashi Difaaci iyo Dhaqaale oo ay kala saxiixdeen Ankara iyo Muqdisho.

Markabka Oruc Reis ayaa sahmin doona aag dhan qiyaastii 5,000 km isku wareeg ah, sida ay sheegtay wasaaradda tamarta Turkey.

“Waxaan saadaalineynaa in goobta uu ka shaqeyn doono Oruc Reis ay tahay gobol leh rajooyin shidaal,” ayuu wasiirka tamarta Alparslan Bayraktar ku yiri bayaan uu soo saaray 3-dii October.

Waxa uu intaas ku daray in shirkadda Turkish Petroleum ay haysato shatiyada sahmin ee dhul-badeed loo qeybiyey saddex goobood oo ka kooban 15,000 oo km oo isku wareeg ah.

Sahminta ayaa la filayaa inay socoto ilaa toddoba bilood.

Xiriirka Ankara iyo Muqdisho ayaa sii xoogeysanayey sanadihii dhowaa, ayada oo labada dhinac ay kala saxiixdeen heshiisyo iskaashi oo ay ku jiraan kuwa dhaqaale iyo kuwa difaac.

Jimco 11-Oct-2024 {HMC}  Madaxweynaha Somaliland, Mudane Muuse Biixi Cabdi waxa uu wareegto madaxweyne uu soo saaray cafis guud u fidiyey Maxaabiista dembiyada fudud ku xukuman ee xabsiyada Somalilamd ku xidhan.

Muuse Biixi ayaana cafis u fidiyay maxaabiis kala duwan oo gaareysa 413 maxbuus, maxaabiistan cafiska loo fidiyay ayaana ah kuwa dambiyada fud fudud galay.

Waxaanay u dhignayd Wareegtada Madaxweynuhu Sidan:-

Markaan Arkay: Qodobka 90aad Faqraddiisa 5aad ee Dastuurka Somaliland;

Markaan Arkay: Qoraalka Taliska Guud ee Ciidanka Asluubta ee summaddiisu tahay TCA/G-1/09/2024, kuna taariikhaysan 07/01/2024, ujeeddadiisuna tahay Soo-gudbin Liisaska Maxaabiista Cafiska galaya Sannadkan 2024-ka;

Markaan Arkay: Soo-jeedinta Xafiiska Xeer Ilaaliyaha Guud ee summaddiisu tahay XIG/JSL/02/2024, kuna taariikhaysan 07/01/2024;

Markaan La-tashaday: Hay’adaha Ay Khusayso;

Waxaan Go’aamiyey;

In laga bilaabo taariikhda maanta aan Cafis Guud u fidiyo Maxaabiista dembiyada fudud ku xukuman ee xabsiyada dalka ku xidhan, oo tiradoodu dhan tahay 413 (Afar Boqol, Saddex iyo Toban) maxbuus. Cafiskani saamayn kuma laha xuquuqda madaniga ah iyo raadka ciqaabeed ee ka dhalanaya dembiyadda ay ku xukunnaayeen. Waxa cafiskan fulinaya Xafiiska Xeer Ilaaliyaha Guud ee Qaranka, iyada oo la raacayo liiska Maxaabiista.

Jimco 11-10-2024 {HMC} Warrarka ka imaanaya ismaamulka Tana River ee dalka Kenya ayaa sheegaya in dagaal uu dhexmaray miliishiyooyin ka soo kala jeeda qawmiyaddaha Soomaalida iyo Munya ee halkaas ku wada nool.

Maamulka deegaanka ayaa laga soo xigtay in ugu yaraan sideed qof ay ku dhinteen dagaalka oo dhacay maalintii shalay ahayd. Waxa jira dhawaacyo aan tiradooda la sheegin oo isna la kala geeyay isbitaallada.

Boqollaal qoys ayaa ka barakacay tuulooyinka uu dagaalku saameeyay ee Bangale, Nanighi iyo KBC.

Dagaalka ayaa ka soo bilowday todobaad kahor tuulada Caanoole, waxana uu ku fiday tuulooyin dhawra. Dagaalka ugu culus ayaa shalay dhacay.

Ciidamo isugu jira boolis iyo milatari ayaa la geeyay deegaannada ay dagaaladu ka dhaceen si nabad loogu soo dabbaalo.