Arbaco 25-Sep-2024 {HMC} Ra’iisul Wasaaraha Xukuumadda Soomaaliya, Mudane Xamsa Cabdi Barre, ayaa kulan kula yeeshay madasha shirka Qaramada Midoobay ee New York, Wakiilka Gaarka ah ee Midowga Yurub u qaabilsan Geeska Afrika Annette Weber.

Ra’iisul Wasaare Xamse Barre iyo Wakiilka Midowga Yurub ayaa ka wada hadlay xoojinta xiriirka iyo wadashaqeynta ka dhaxeysa EU iyo Soomaaliya, gaar ahaan dhinacyada horumarinta dhaqaalaha, amniga iyo siyaasadda.

Waxa ay isla soo qaadeen labada masuul caqabadaha soo wajahaya gobolka Geeska Afrika, iyagoo hoosta ka xariiqay baahida loo qabo in ay muhiim tahay in laga wada shaqeeyo amniga iyo nabadda gobolka, lagana horgago xasaradaha.

Ra’isul Wasaaraha Soomaaliya Xamse Cabdi Barre oo ka qeyb galaya madasha shirka Qaramada Midoobay ee New York, ayaa halkaasi kulamp duceedyo kula qaadanaya madax kala duwan oo New York u tagay ka qeybgalka shirka.

Arbaco 25-Sep-2024 {HMC} Maamulka ku meel gaarka ah ee SSC Khaatumo ayaa si kulul uga horyimid talaabo uu qaaday maamulka Puntland.

Wasiirka Wasaaradda Warfaafinta maamulka SSC Khaatumo Najiib Barkhadle Warsame ayaa xadgudub iyo meel ka dhac ku tilmaamay in Puntland ay sheegato qeybo ka mid ah dhulka SSC Khaatumo.

”Waa wax aan sinaba loo aqbali karin, in maamulka aanu deriska nahay ee Puntland, uu sheegto dhulka Dowladda SSC-Khaatumo qaar ka mid ah, waa xad-gudub iyo meel kadhac dawladda SSC-Khatumo ay uga digayso maamulka Puntland” ayuu yiri Wasiirka Warfaafinta SSC Khaatumo Najiib Barkhadle Warsame.

Wasiir Warfaafinta SSC Khaatumo ayaa sidoo kale uga digay hay’adaha arintaan ka qayb qaadanaya iney ka fogaadaan wax walba oo keeni kara khatar amni oo ka dhalan karta murun dhuleed, wuxuuna xusay in SSC Khaatumo ay diyaar u tahay inay difaacato dhulkeeda iyo dadka degan.

Hadalkan kasoo yeeray Wasiir Najiib Barkhadle Warsame ayaa kusoo aadaya, iyadoo Puntland ay qorsheyneyso iney ka hirgelineyso qaybo ka mid ah Sool iyo Cayn Mashaariic ay ka heshay dowlada Jarmalka, taasoo ay fulineyso Hay’adda Uniceif ee Soomaaliya.

Arbaco 25-Sep-2024 {HMC} Wasiirka Arrimaha Dibadda ee Soomaaliya, Danjire Axmed Moalim Fiqi, ayaa la kulmay Xoghayaha Guud ee INTERPOL, Jürgen Stock, si loo xoojiyo doorka Soomaaliya ee dagaalka ka dhanka ah dambiyada caalamiga ah iyo argagixisada. Soomaaliya, oo ah difaac koowaad, ayaa door muhiim ah ka ciyaarta ka hortagga in khatarahan ay ku fidaan gobolka iyo caalamka intiisa kale.

Intii lagu guda jiray kulanka, Wasiir Fiqi wuxuu carabka ku adkeeyay baahida loo qabo in si wadajir ah loola shaqeeyo INTERPOL si loo xoojiyo awoodda booliska Soomaaliya ee la dagaallanka argagixisada, dembiyada internetka, iyo ka ganacsiga sharci darrada ah ee hubka. Waxa uu sidoo kale tilmaamay horumarka ay Soomaaliya ka gaartay maaraynta hubka, taasoo sababtay in laga qaado cunaqabatayntii hubka ee mudada dheer jirtay, taas oo guul weyn u ah sugidda amniga adduunka oo idil.

Xoghayaha Guud ee INTERPOL, Jürgen Stock, ayaa bogaadiyay horumarka ay Booliska Soomaaliyeed ka gaareen la dagaallanka dambiyada abaabulan, wuxuuna ballan qaaday inay sii xoojin doonaan wada shaqeynta laamaha amniga Soomaaliya, gaar ahaan booliska, si kor loogu qaado awooddooda dagaalka ka dhanka ah dambiyada caalamiga ah. Wasiir Fiqi waxa kale oo uu soo bandhigay mudnaanta istaraatiijiyadeed ee Soomaaliya ee sanadaha soo socda, isagoo diiradda saaray iskaashiga dhinaca amniga.