Isniin 12 Jun 2026 {HMC} Xoghayaha Amniga Gudaha ee Mareykanka, Kristi Noem, ayaa Axaddii sheegtay in boqolaal wakiil oo federaal ah oo dheeraad ah loo dirayo Minneapolis, iyadoo iska diiday baaqyada hoggaamiyeyaasha Dimoqraaddiga ee magaalada ee dalbanayay in ciidamadu ka baxaan, kaddib markii sarkaal ka tirsan laamaha socdaalka uu toogasho ku dilay haweeney dibad-baxaysay.

Wareysiyo badan oo ay bixisay, Noem waxay difaacday tallaabada sarkaalka toogashada geystay ee dilay Renee Nicole Good, oo 37 jir aheyd. Geerideedu waxay kicisay dibadbaxyo cusub oo dalka oo dhan ka billowday, kuwaas oo looga soo horjeedo ololaha adag ee Madaxweyne Donald Trump uu ku wado xakamaynta socdaalka.

Noem waxay mar kale ku celisay sheegashadeeda ah in falalkii Good ay ka samaysay magaalada Minneapolis Arbacadii ay u dhigmaan “argagixiso gudaha ah,” isla markaana wakiilka federaalka ahi uu is-difaacayay markii uu Good ku dhex toogtay gaarigeeda.

Sheekadan waxaa si adag u diiday mas’uuliyiin Dimoqraaddi ah oo uu ka mid yahay Guddoomiyaha Minnesota Tim Walz iyo Duqa Minneapolis Jacob Frey. Waxay sheegeen in muuqaal si weyn u faafay oo goobta laga duubay uu muujinayo gaariga Good oo ka leexanaya wakiilka, isla markaana uusan u muuqan mid halis ku ah noloshiisa.

Markii CNN marar badan ku cadaadisay sida ay u bixin karto hadallo go’aan leh iyadoo baaritaan rasmi ah uu hadda billow yahay, Noem waxay ku adkaysatay in iyada iyo maamulka ay saxan yihiin.

“Maxaan ula murmeynaa madaxweyne ka shaqeynaya in dadka la ilaaliyo?” ayay tiri.

Dhanka kale, iyadoo la hadleysay Fox News, Noem waxay sheegtay in boqolaal sarkaal oo dheeraad ah ay iman doonaan Axadda iyo Isniinta, si ay u suurtagasho in wakiillada socdaalka ee Minneapolis ka howlgala ay shaqadooda “si ammaan ah” u gutaan.

Haddii dibadbaxayaashu “ku kacaan falal rabshado ah oo ka dhan ah hay’adaha ammaanka, ama ay carqaladeeyaan hawlgalladeenna, taasi waa dambi, waana lala xisaabtami doonaa,” ayay Noem ku tiri barnaamijka “Sunday Morning Futures.”

Iska horimaadyo u dhexeeya wakiillada federaalka iyo dibadbaxayaasha ayaa weli ka socday Minneapolis. Waxaa la arkay saraakiil adeegsanaya suntan dadka ka ilmeysiisa si ay uga hortagaan dad calaamado sita oo isugu soo baxay bannaanka xarun ay leedahay Hay’adda Socdaalka iyo Kastamyada (ICE) ee magaalada.

Noem waxay ku eedeysay mas’uuliyiinta Dimoqraaddiga inay sii hurinayaan rabshado ka dhan ah wakiillada socdaalka.

“Haddii aad eegto waxa Guddoomiye Walz sheegay, iyo waxa Frey sheegay, waxay si xad dhaaf ah u siyaasadeeyeen, si aan munaasib ahaynna uga hadleen xaaladda dhulka ka jirta,” ayay Noem ku tiri barnaamijka “State of the Union” ee CNN.

“Waxay kiciyeen dadweynaha. Waxay dhiirrigeliyeen burburka iyo rabshadaha aan aragnay maalmahan u dambeeyay.”

Tan iyo toogashadii Arbacadii, kumannaan qof ayaa dibadbaxyo, intooda badan si nabad ah, uga dhigay magaalooyin kala duwan oo dalka ah, oo ay ku jirto Minneapolis. Booliisku waxay sheegeen in 29 qof la qabtay kaddibna la sii daayay Jimcihii.

Dibadbaxayaashu waxay dalbanayaan baaritaan buuxa oo lagu ogaanayo duruufaha ku xeernaa dhacdada dilka keentay.

Mas’uuliyiinta Dimoqraaddiga ah waxay si gaar ah u dhaliilayaan in hay’adaha maxalliga ah laga reebay baaritaanka, oo uu wado FBI-da.

“Waa inuu noqdaa baaritaan dhexdhexaad ah, aan eex lahayn, oo xaqiiqooyinka lagu helo,” ayuu Frey u sheegay CNN.

Wuxuu sidoo kale sheegay in ay sharciyad leedahay in dibadbaxayaashu isku dayaan inay carqaladeeyaan hawlgallada fulinta socdaalka, sida kii ay Good ku lug lahayd.

“Dabcan shuruucda waa in la dhaqan-geliyaa, balse waxaa kale oo jira waajib ah in fulinta sharciga loo maro si waafaqsan dastuurka,” ayuu Frey raaciyay.

“Waxaan aragnay haween uur leh oo waddada lagu jiidayo. Waxaan aragnay arday dugsiga sare ah—muwaadiniin Mareykan ah, sidaas oo ay tahay—oo la kaxeynayo.”

Axaddii, wakiillo federaal ah ayaa sii waday ololaha Trump ee xakamaynta socdaalka, waxaana la arkay iyagoo dad ku qabqabanaya xaafado la deggan yahay. Sidoo kale, dad ayaa ubaxyo dhigayay xusuus-qoryo ku-meelgaar ah oo lagu maamuusayo Good.

Hawlgalka amni ee federaalka ka fulay Minneapolis ayaa ku soo beegmay xilli Minnesota ay ka socoto baaritaan lacago laga khiyaanay dowladda oo si weyn loo siyaasadeeyey.

Isniin 12 Jun 2026 {HMC} Madaxweynaha Soomaaliya, Xasan Sheekh Maxamuud, ayaa lagu wadaa inuu booqasho rasmi ah ku tago dalka Shiinaha, kaddib casuumaad uu ka helay dowladda Shiinaha, sida uu shaaciyay Wasiirka Arrimaha Dibadda ee Shiinaha, Wang Yi.

Casuumaaddan ayaa timid xilli Wasiir Wang Yi uu ka baaqday safar horay loo filayay inuu ku yimaado magaalada Muqdisho, hase yeeshee uu si cad u muujiyay mowqifka adag ee Shiinaha ee ku aaddan taageerada midnimada iyo madaxbannaanida Soomaaliya.

Madaxweyne Xasan Sheekh Maxamuud ayaa inta uu ku sugan yahay Shiinaha ka qeybgeli doona Shirka Shiinaha iyo Dalalka Carabta, halkaas oo la filayo inuu kulamo gaar ah la yeesho madaxda ugu sarreysa dalkaasi, kuwaas oo diiradda lagu saari doono xoojinta xiriirka laba geesoodka ah iyo iskaashiga istiraatiijiga ah.

Dowladda Shiinaha ayaa mar kale xaqiijisay inay si buuxda u taageersan tahay midnimada dhuleed ee Soomaaliya, iyadoo Wasiirka Arrimaha Dibadda ee Shiinaha, Wang Yi, uu ballanqaaday in la xoojin doono iskaashiga dhanka difaaca, amniga iyo arrimaha siyaasadda.

Sidoo kale, Dowladda Soomaaliya ayaa lagu qanciyay in Madaxweyne Xasan Sheekh Maxamuud iyo Madaxweynaha Shiinaha, Xi Jinping, ay si rasmi ah isku arki doonaan inta lagu guda jiro shirka sare ee Shiinaha iyo Dalalka Carabta, kaas oo dhawaan ka dhacaya dalka Shiinaha.

Arrimahan ayaa lagu xaqiijiyay wada-hadal telefon oo Axaddii dhexmaray Wasiirka Arrimaha Dibadda ee Shiinaha, Wang Yi, iyo Wasiirka Arrimaha Dibadda ee Soomaaliya, Cabdisalaam Dhaay, iyadoo labada dhinac ay adkeeyeen muhiimadda ay leedahay sii xoojinta xiriirka labada dal.

Madaxweynaha Soomaaliya ayaa fursaddan u arkaya mid muhiim u ah dib-u-xoojinta xiriirka istiraatiijiga ah ee Soomaaliya iyo Shiinaha, gaar ahaan dhinacyada siyaasadda, dhaqaalaha, amniga, iyo horumarinta nolosha dadka Soomaaliyeed.

Dhanka kale, labada mas’uul ayaa sidoo kale ka wada hadlay doorka Shiinaha ee taageerada Soomaaliya ee ilaalinta midnimada dhuleed iyo ka shaqeynta nabadda iyo xasilloonida Geeska Afrika, taas oo muujinaysa xiriirka sii xoogeysanaya ee u dhexeeya labada dowladood.

Isniin 12 Jun 2026 {HMC} Wakaaladda wararka ee Tasnim ee Iiraan ayaa daabacday liis cusub oo ah shaqaalaha amniga ee lagu dilay rabshadaha socda

Sida laga soo xigtay Tasnim, wadarta guud ee shaqaalaha ayaa la dilay ilaa Janaayo 11-kii

Warbixinta ayaa lagu sheegay in dadka la dilay ay ku jireen boolis, shaqaale ka tirsan Ciidanka Ilaalada Kacaanka Islaamiga ah (IRGC) iyo ciidankeeda gaarka ah ee Basij

Wakaaladda wararka ayaa rabshadaha ku tilmaantay inay yihiin kuwo ay sameeyeen “argagixiso hubaysan” iyo kooxo ay taageerto shisheeyaha, waxayna ku eedeysay Mareykanka, Israa’iil iyo ururada mucaaradka inay isku dayayaan inay khalkhal galiyaan Iiraan.

Garsoorka Iiraan ayaa ku dhawaaqay in kuwa ku lugta leh rabshadaha lagu maxkamadeyn doono ‘moharebeh’, ama ‘cadowgaa Ilaah, oo lagu ciqaabi doono dil

Isniin 12 Jun 2026 {HMC} Madaxweynaha Dowlad-Goboleedka Puntland Siciid Cabdullaahi Deni ayaa sheegay in uu soo dhaweynayo shirka Madaxweynaha Dowladda Federaalka Soomaaliya ee xubnaha Mucaaradka ah uu la qaadanayo si looga hadlo Xaaladda Dalka.

Siciid Deni ayaa sheegay in Maamulkiisa uu diyaar u yahay ka qaybgalka kulankaas, doorka Dowlad-Goboleedka Puntland ayuu xusay in uu dhexgeynayo goobaha lagu wadahadlayo si loo raadiyo xal midaysan oo dalka dan u ah sida uu hadalka u dhigay.

Deni ayaa intaas raaciyay shirarka u dhaxeeya Madaxda Sare Dowladda Federaalka iyo xubnaha Mucaaradka si looga wadahadlo culayska siyaasadeed ee dalka ka jira maadaama uu tilmaamay in muddo xileedka Hay’adaha Dowladdu uu sii dhammaanayo.

“Waxaynu u baahan nahay in si dhab ah Dadka Soomaaliyeed u wada hadlaan oo la is ixtiraamo, wixii laga badin waayo lagu heshiiyo laguna dhaqmo, Fagaarayaasha dadka isugu yimaado haddii aan aragno mid ah Puntland way tagaysaa, kan la malaynayo ee MW Federaalka ee 20ka Bisha haddii la qabto waan tagaynaa” Sidaasi waxaa yiri, Siciid Cabdullaahi Deni, MW DG Puntland.

Madaxweynaha Puntland ayaa marar kala duwan waxa uu diiday ka qaybgalka shirarkii u dhaxeeyay Dowladda Federaalka, Dowlad-Goboleedyada iyo xubnaha Mucaaradka, waxa uu hadda sheegayaa in uu diyaar u yahay ka qaybgalka shirarka cusub ee la qaban doonno.