Sabti 21-Sept-2024 {HMC} Ciidanka xoogga dalka Soomaaliya, gaar ahaan guutada 9-aad qeybta 60-aad ee ka howlgala gobolka Bakool, ayaa saakay howlgal qorsheysan ka fuliyay deegaanno dhaca duleedka magaalada Xudur ee caasimadda gobolka Bakool.

Sida aan wararka ku heleyno ciidanka xoogga dalka ayaa saakay howlgal gaar ah ka fuliyay deegaanka Qeydar-Adde oo 30km dhanka waqooyi galbeed kaga beegan magaalada Xudur, halkaas oo la sheegay in ay ku sugnaayeen dagaallamayaal katirsan Al Shabaab.

Dagaal xooggan ayaa ciidanka xoogag dalka iyo Al Shabaab ku dhax maray deegaanka Qeydar-Adde, waxaana halkaasi la sheegay in khasaaro xooggan oo isugu jira dhimasho iyo dhaawac lagu gaarsiiyay Al Shabaab katirsanaa.

Saraakiisha howlgalka hoggaamineysay ayaa sheegay in deeganka ay ciidamada weerarka ku qaadeen fariisimo ku lahaayeen Al Shabaab, waxa ay sidoo kale tilmaameen in deegaankaasi ku yaaleen xeryo Al Shabaab ay dhallinyarada ku tababaraan.

Kooxda Al Shabaab ayaa go’doomisay magaalada Xudur ee xarunta gobolka Bakool, waxa ayna Al Shabaab joogaan inta badan tuulooyinka iyo deegaannada dhaca duleedka degmadaasi oo go’doon ku jirta muddo sannado badan ah.

Sabti 21-Sept-2024 {HMC} Shacabka magaalada Muqdisho ayaa muddooyinkii lasoo dhaafay si weyn uga nastay dhibaato magaalada ku hayeen ciyaalka weerada, waxaana degmooyinka caasimadda laga dareemay xasillooni iyo amni markii ay meesha ka baxeen ciyaal weerarada.

Xaafado katirsan degmooyinka gobolka Banaadir waxaa hadda mar kale kasoo ifbaxaya ciyaalkii weerarada, waxaana wel wel iyo cabsi hor leh lasoo daristay dadka degan xaafadaha mar kale lagu arkay ciyaalka reera dhibka ah ee dadka tuuryeeya .

Sida aan wararka ku heleyno xaafado katirsan degmada Kaaraan waxaa mar kale lagu arkayaa ciyaalka weerarada loo yaqaan, kuwaa oo xaafadaha dhaxdooda isku tuuryeenaya sidoo kale isku raadsanaya tooreeyo iyo baangado.

Ciyaal weeraro raxan raxan u socota oo wata dhagaxaan iyo mindiyo ayaa lagu arkay xaafado katirsan degmada Kaaraan, ciyaalkan ayaana la sheegay in guryaha dhagxaan ku tuurayaan , sidoo kale dhubaateenayaan dadka waddooyinka uga hor yimaada.

Shacabka degan xaafadaha ciyaalka weerarada kasoo cusboonaadeen ayaa ugu baaqay laamaha ammaanka in tallaabo deg deg ah ka qaadaan kana hortagaan ciyaalkan, inta aysan ku faafin xaafado hor leh ayna sii kordhin dhibaatada ay geestay.

Ciyaalka weerarada oo dhibaato badan ku hayay shacabka magaalada Muqdisho ayaa mar qora la waayay, kaddib markii ay dowladda xir xirtay qaar badan oo kamid ahaa ciyaalkaasi, halka kooxda Al Shabaab iyana bilaabeen in ciyaalkaasi ay beegsadaan ayna dilaan qaar kamid ahaa.