Talaado 17 -Sept-2024 {HMC} Waxaa saakay saacado dib loo dhigay diyaarado rakaab u qaadi lahaa magaalada Baydhabo ee xarunta KMG ee maamulka Koonfur Galbeed, kaddib amar kasoo baxay laamaha ammaanka iyo sidoo kale hay’adda Duulista Rayidka Soomaaliya.

Sida aan wararka ku helnay dedaalo badan oo la sameeyay ayaa saacado kaddib sahashay in la fasaxo diyaaradihii magaalada Baydhabo u duuli lahaa, waxaana rakaabkii markii hore loo sheegay in duulimaadka la baajiyay ku farxeen in la fasaxay.

War goordhaw kasoo baxay Hay’adda Duulista Rayidka Soomaaliyeed (SCAA) , ayaa lagu sheegay in aysan jirin wax duulimaadyo ah oo kusii jeeday magaalada Baydhabo oo maanta la baajiyay, waxa ayna hay;adda sheegtay in aysan wax hakkad ah ku imaan duulimaadyadii tagi jiray Baydhabo.

”Hay’adda Duulista Rayidka Soomaaliyeed (SCAA) waxa ay u xaqiijineeysaa dhammaan Shacab weynaha Soomaaliyeed in aysan jirin wax isbedel ama hakad ah oo ku yimid Duulimaad-yadii maalin-laha ahaa ee tagi jiray magaalada Baydhaba” ayaa lagu yiri warka kasoo baxay Hay’adda Duulista Rayidka..

Warkan sheegayay in la hakiyay duulimaadyadii maalinlaha ee aadi jiray magaalada Baydhabo , ayaa kusoo aadaya xilli khilaaf meel xun gaaray oo u dhaxeeya Madaxtooyada Soomaaliya iyo Madaxweynaha Koonfur Galbeed uu taagan yahay.

Talaado 17 -Sept-2024 {HMC} Maxkamadda Gobolka Hiiraan,qeybta ciqaabta, laanta tashiga, ayaa maanta u fadhiisatay dhageysiga garmaqalka ciqaabta ah ,ee Namabarkiisu yahay 0045/2024 kaas oo eedeysane ka yahay Cabdi Xuseen Muxumed ina Madiino Cismaan Jabriil oo ku eedeysan dilka marxuum Nabadoon Xassan Maxamuud Jimcaale (Xassan Yare)

Ugu horreyn Guddoomiyaha Maxkamadda Gobolka Hiiraan Mudane Cali Xuseen Sabriye ayaa Eedeysanaha u akhriyey eedda uu xafiiska xeer ilaaliyaha guud uu ku soo eedeeyay eedeysanaha.

Si waafaqsan qod.114 XHC. Xafiiska xeer ilaaliyaha ayaa Maxkamadda hor keenay baaraha kiiskan iyo Cadeeymihiisa waxaana su’aalo weydiiyay dhinacyada dacwada iyo Maxkamadda.

Sidoo kale maxkamadda ayaa dhageeysatay dooda eedeeysanaha iyo Qareenkiisa si waafaqsan Q 116 XHCS

Ugu dambeyn Maxkamadda Gobolka Hiiraan ayaa soo Gabagabeeysay Galdacwadeedkaan ayadoo sheegtay in ay go’aan ka soosaari doonto.