Talaado 17 -Sept-2024 {HMC} Wararka aan ka heleyno garoonka diyaaradaha Aadan Cadde ee magaalada Muqdisho , ayaa sheegaya in saakay la xannibay diyaarado dad rakaab ah u qaadi lahaa magaalada Baydhabo ee xarunta KMG ee maamulka Koonfur Galbeed.

Dad badan oo shacab ah oo saakay aroortii galay garoonka diyaaradaha Aadan Cadde kuna sii jeeday magaalada Baydhabo , ayaa loo sheegay in la joojiyay in wax diyaarado ah aadaan dhinaca Baydhabo, waxaana dadka lagu wargaliyay in guryahooda ku laabtaan.

Laamaha ammaanka dowladda Soomaaliya ayaana la sheegay in diideen in garoonka ka dhoofaan diyaaradaha saakay kusii jeeday magaalada Baydhabo, lamana sheegin ilaa hadda sababaha diyaaradahaasi loo xannibay, mana jiro wax war ah oo laamaha amniga iyo maamulka garoonka kasoo saareen arrinkan.

Diyaaradaha la diiday in magaalada Baydhabo u dhoofaan ayaan la ogeyn in ay raaci lahaayeen siyaasiyiin kasoo jeeda deegaannada Koonfur Galbeed, hasa ahaatee waxaa lasoo tabiyay in dadka garoonka joogay ay u badnaayeen dad shacab ah.

Khilaaf meel xun gaaray oo u dhaxeeya madaxtooyada Soomaaliya iyo Madaxweyne Laftagareen , ayaa sabab looga dhigayaa xannibaadan cusub ee dowladda kusoo rogtay diyaaradaha maalin kasta u duula magaalada Baydhabo.

Masuuliyiin katirsan maamulka Koonfur Galbeed ayaa sheegay in ay ka xun yihiin xannibaada la saaray shacabka kusii jeeday magaalada Baydhabo, waxa ayna cadedeeyeen in aan loo dul qaadan karin dhibaatadaasi ayna qaadi doonaan tallaabooyin adag.

Arrintan ayaa imaaneysa xilli uu guul darro kusoo dhammaaday kulamo Ra’isul Wasaaraha Soomaaliya Xamse Cabdi Barre magaalada Baydhabo kula soo qaatay Madaxweynaha Koonfur Galbeed kaas oo ka biyo diiday in Muqdisho yimaado uuna qaaato rabitaanka Villa Soomaaliya.

Talaado 17 -Sept-2024 {HMC} Madaxweynaha dowlad deegaanka Soomaalida Mustafe Cagjar ayaa si yaab leh uga hadlay masiirka Soomaalida deegaanka iyo jahwareer uu sheegay in looga dan leeyahay suura-xumeynta xukuumadda uu hoggaamiyo.

Madaxweyne Mustafe Cagjar ayaa ganafka ku dhuftay doodda sheegaysa in Soomaalida dowlad deegaanka aysan aheyn Itoobiya, “shacabka deegaanka Soomaaliddu waa Soomaali, waana Soomaali ka tirsan dalka Itoobiya maamul ahaan,” ayuu Mustafe Cagjar ku yiri qoraal uu soo saaray.

Sidoo kale waxa uu sheegay in qofkii ku nool dowlad deegaanka Soomaalida ee yiraahda Itoobiya kama tirsanina uu jahwareersan yahay, maadaama shacabka deegaanka iyagoo Soomaali ah ay haddana kamid yihiin dalka Itoobiya, sida uu sheegay.

Hoos ka aqriso qoraalka

Inkasta oo sawaxan iyo jaahwareerin badan oo looga goleeyahay suuraxumeeynta Xukuumadda Isbadalka ee DDS iyo u xilqarinta nidaamkii dad-qalatadda ahaa ee ay badashay uu si joogta ah isaga socdo, hadana waxaan muran ku jirin in maanta Deegaanka Soomaalida uuna jirin qof lagu qasbo inuu ku hadlo wax uuna raali ka ahayn.

Waxaa hubaal ah in afkaaro kala duwan oo qaarkood lid isku yihiin lagaga dhawaaqo magaaladda Jigjiga dhexdeeda, oo Xorriyadda hadalku ay taaba-gashay.

Mar hadii la yidhaa aan doodno oo si xor ah u hadalno, iyana waxaa meesha taal in dood toosan iyo tu deel-qaaf ku jiro labaduba imanayaan. Waxaa haboon in tii sax loo arkana la taageero, tii qalad loo arkana la naqdiyo. Hadal kasta oo la yidhaana lagala xisaabtamo cidii ku hadashay ee aan wadar dhan lagu weerarin hadal qof ka qaloocday.

Shacabka Deegaanka Soomaaliddu waa Soomaali. Waana Soomaali ka tirsan dalka Itoobiya maamul ahaan. Ciidii tidhaa Soomaali manihina way qaldan tahay; cidii tidhaa Itoobiya kama tirsannina way jaahwareersan tahay.

Shacabka DDS, Shacabka Soomaaliyeed ee kale meel kasta oo uu ku nool yahay waxay u hayaan wanaag iyo abaal.

Si guud, Odayaasha Deegaanku waxay ka hadleen waa xaqiiqdaas jirta. Waxaa kale oo ay ka hadleen in nabad iyo nolol ay rabaan oo ayna diyaar u ahayn cid kasta oo carqaladeeynaysa amniga Deegankooda.

Nuxurka hadalkoodu wuxuu ahaa in cid kale ayna wakiil ka noqon karin masiirka iyo danaha shacabkooda.