Talaado 17 -Sept-2024 {HMC} Saraakiisha caafimaadka Falastin ayaa sheegay, in ugu yaraan 16 qof lagu dilay duqeyn ay ciidamada Isra’il Isniinti ku garaaceen Marinka Gaza, iyada oo dadka la dilay ay ku jiraan shan dumar ah iyo afar carruur ah.

Isbitaalka Al Cawda oo la dhigay qaar ka mid ah meydadka ayaa sheegay in duqeyn lagu bartilmaameedsaday guri ku yaalla xerada qaxootiga ee Nuseyraat lagu dilay 10 qof oo ay ku jireen afar dumar ah iyo laba carruur ah.

Weerarkaasi ayaa sidoo kale lagu dhaawacay 13 kale sida ay xaqiijiyeen saraakiisha caafimaadka.

Weerar kale ayaa lala eegtay guri ku yaalla magaalada Gaza ayaa lagu dilay lix qof oo ay ku jireen laba carruur ah iyo haweeneey, sida uu xaqiijiyay Adeega Waaxda Difaaca.

Isra’il ayaa sheegtay in ay beegsato kaliya kooxaha hubeysan isla markaana ku eedeysay Xamaas iyo garabyada kale ee hubeysan ee Falastiiniyiinta in ay ka dhex dagaallamaan meelaha ay daganyihiin rayidka.

Hase yeeshee millatariga Isra’il ayaanan inta badan ka hadlin duqeymaha ay ku baaba’aan inta badan dadka rayidka ah ee u badan dumarka iyo carruurta.

Talaado 17 -Sept-2024 {HMC} Ninka looga shakisanyahay in uu isku dayay khaarijinta madaxwynihi hore ee Mareykanka Donald Trump, xilli uu ku sugnaa beetiisa lagu ciyaaro golf-ka ee gobolka Florida ayaa Isniinti lagu soo oogay laba danbi.

Ryan Routh, oo ah 58 jir, ayaa shalay kasoo hor muuqday maxkamad heer federal ah oo ku taalla magaalada West Palm Beach, halkaas oo ay dacwad-oogayaashu ku soo oogen danbiyo kala ah in uu qori heystay isaga oo danbiile ah iyo in uu tirtiray nambarka aqoonsiga hubka.

Rowe ayaa la xiray 40 daqiiqo kaddib marki uu isku dayay in uu dilo madaxweynihi hore ee Mareykanka Donald Trump, oo hadda u ordaya xilka madaxtinimada isaga oo ah murashaxa xisbiga Jamhuuriga.

Waxay aheyd marki labaad oo uu Donald Trump ka badbaadayo isku day dil muddo laba bil gudahood.

Isku daygi hore ee lagu khaariji rabay Trump ayaa dhacay 13-ki bishi July, kaddib marki wiil dhalinyaro ahaa oo marki danbe ay ciidamada amniga dileen uu meel sare kasoo toogtay Trump, kaddibna ka dhaacay dhegta.

Weerarkaas ayaa waxaa duubay kaamirooyinka telefishannada Mareykanka oo tabinayay hadal-jeedin uu Trump kula hadlayay taageerayaashiisa gobolka Pennsylvania.