Jimco 20 March 2026 {HMC} Maraykanka ayaa ka fiirsanayaa inuu ka qaado cunaqabataynta qaar ka mid ah shidaal Iiraan, isagoo isku dayaya inuu xakameeyo saameynta dagaalku uu ku yeeshay suuqyada tamarta.

Xooghayaha Maaliyadda Scott Bessent ayaa fikradda kusoo bandhigay wareysi uu siiyay Fox, isaga oo sheegay in tallaabadan ay ka dhigi karto Shidaalka mid u furan iibsadayaasha caalamka. Caalamka oo dhan, qiimaha tamarta ayaa sare u kacay maadaama dagaalku saameyn ku yeeshay maraakiibta iyo wax soo saarka.

Haddii tallaabadan la fuliyo, waxay noqon doontaa beddel weyn oo ka dhan ah siyaasadda Maraykanka ee muddada dheer jirtay – taasoo leh natiijo aan la hubin.

Khubaradu waxay sheegeen in saameynteedu ay u badan tahay mid xaddidan oo kaliya, waxayna sidoo kale kordhin kartaa lacagaha u socda xukuumadda Iiraan ee Maraykanku weerarayo.

“Si si fudud loo dhigo, waa arrrin yaab leh,” ayuu yiri David Tannenbaum, agaasimaha Blackstone Compliance Services “Dhab ahaantii, waxaan u oggolaanaynaa Iiraan inay iibiso saliida, taasoo markaa loo adeegsan karo maalgelinta dagaalka.”

Ka hor dagaalka, Shiinuhu wuxuu ahaa iibsadaha ugu weyn ee saliida ka imanaysa Iiraan, isagoo qaadan jiray qiimo dhimis weyn sababo la xiriira cunaqabataynta ay soo rogeen Maraykanka iyo dalal kale.

Wareysiga uu siiyay Fox Business, Khamiistii, Bessent ayaa sheegay in ka-reebitaanka xayiraadaha iibka uu ka caawin karo in qayb ka mid ah sahaydan loo wareejiyo dalalka kale ee u baahan saliida, sida Hindiya, Japan iyo Malaysia, halka Shiinaha lagu qasbayo inuu bixiyo “qiimaha suuqa”.

Wuxuu sheegay in Maraykanku uu eegayo ka-qaadista xayiraadaha iibka ee Shidaalka Iiraan ee badda ku xaniban, taas oo uu qiyaasay inay tahay ku dhawaad 140 milyan oo fuusto. Wuxuu qiyaasay in tallaabadan ay hoos u dhigi karto qiimaha caalamiga ah muddo 10 ilaa 14 maalmood ah.

Laakiin Bessent ma uusan faahfaahin sida ka-reebitaanku u shaqeyn doono ama haddii ay ku jiri doonaan xeerar looga hortagayo in lacagta iibka ay ku laabato dowladda Iiraan. Waaxda maaliyaddu waxay diiday inay bixiso faahfaahin dheeri ah oo ku saabsan soo jeedinta.

Madaxweyne Donald Trump ayaa markii la weydiiyay haddii uu horey u sii wadi doono fikradda ayaan bixin jawaab cad, isagoo Khamiistii u sheegay wariyeyaasha, “wax kasta oo loo baahan yahay ayaan sameyn doonaa si aan u ilaalino qiimaha,”

Sababta oo ah sahayda laga hadlayo waa mid yar marka loo eego baahida guud, khubaradu waxay ka digayaan in ka-reebitaanku saameyn weyn ku yeelan doonin qiimaha.

Intaa waxaa dheer, inkasta oo joojinta cunaqabatayntu ay u furi karto fuustooyinka iibsadayaal badan, inta badan saliida ayaa horey u gaartay suuqa.

“Waa wax yar ku kordhin kara… laakiin ma u maleynayo inuu beddel weyn yahay, sidoo kale wuxuu keenaa su’aalo badan,” ayay tiri Rachel Ziemba, oo ah khabiir sare oo ku meel gaar ah oo ka tirsan Xarunta cusub ee Amniga Maraykanka, oo ah hay’ad cilmi-baaris.

Soo jeedintan ayaa raacaysa dadaallo kale oo Maraykanku ku doonayo inuu ku kordhiyo sahayda, oo ay ku jirto sii deynta malaayiin fuustooyin oo shidaalka ah iyo joojinta qaar ka mid ah cunaqabataynta Shidaalka Ruushka toddobaadkii hore.

Go’aanka labaad wuxuu dhalay jawaab celin weyn oo ka timid hogaamiyaasha Yurub, kuwaasoo sheegay inuu xoojin doono xukunka Putin oo sii dheereyn doono dagaalka Ukraine.

Ma cadda haddii soo jeedinta Bessent ay keeni karto jawaab lamid ah tan gudaha Maraykanka, halkaas oo Aqalka Wakiillada todobaadkan ansixiyeen sharci lagu xoojinayo cunaqabataynta saliida Iiraan.

Mike Lawler, oo ah Jamhuuri laga soo doorto New York oo sharciyadan hindisay, ma uusan ka jawaabin codsi faallo. Senator Jeanne Shaheen, oo ah dimuqraadiyada ugu sareysa ee guddiga arrimaha dibadda, sidoo kale ma uusan ka jawaabin codsi faallo.

Ziemba waxay sheegtay inaysan u malaynaynin in Maraykanku doonayo lacagta iibka shidaalka in ay gaarto dowladda Iiraan – laakiin waxay noqon kartaa mid adag in si dhab ah looga hortago.

In Maraykanku xitaa ka fiirsanayo tallaabo noocan ah waa calaamad muujinaysa welwelka maamulka ee la xiriira la yaabka tamarta ee hadda jira, ayay tiri.

“Dowladda Maraykanku waxay si cad u wajahaysa xaalad kasta oo fuusto kasta la tiriyo sababtoo ah baaxadda la yaabka sahayda,” ayay tiri. “Waxay ka raadinayaan Shidaaldheeri ah meel kasta oo ay ka heli karaan.”

Qiyaastii shan meelood meel (1/5) ee 100 milyan oo fuusto oo shidaal ah oo adduunku isticmaalo maalin kasta ayaa caadi ahaan mara marinka Hormuz, taas oo ku teedsan qayb ka mid ah xeebta Iiraan. Laakiin tan iyo markii dagaalku bilaabmay dhammaadkii Febraayo, maraakiibta ku jirta kanaalka ayaa istaagtay.

In kasta oo qaar ka mid ah fuustooyinka la marsiinayay kanaalka si guul leh, khubaradu weli waxay qiyaasayaan in dagaalku ka saaray suuqa ku dhawaad 1/10 sahayda adduunka.

Welwelka ku saabsan xaaladda ayaa kordhay, maadaama weerarada is-daba-joogga ah ee waxyeelada goobo gaas oo muhiim ah oo ay maamulaan Iiraan iyo Qatar ay kordhisay halista in awoodda bixinta shidaalka la xaddidi karo sanado badan, xitaa haddii khilaafku si dhakhso ah loo xaliyo.

Xigasho BBC

Jimco 20 March 2026 {HMC} Deeggaanka Daawiidoow oo Baydhabo 25 kilomitir u jira, dagaal ayaa hadda kasocda. Weerarka waxaa qaaday ciidanka Koonfur Galbeed.

Sida ay sheegeen dadka deegaanka, halka lagu dagaallamayo ayaa ah waxaa isku aruursanayay ciidamo ka tirsan kuwa mucaaradsan maamulka Koonfur Galbeed, kuwaas oo isku magacaabay “Ciidanka Badbaadada Koonfur Galbeed.”

Waxaa xusid mudan in aan la xaqiijin karin khasaaraha rasmiga ah, maadaama dhinacyada dirirtu ka dhexeyso mid walba uu sheeganayo guulo kala duwan, isla markaana aan weli helin goobjoogayaal ka madaxbannaan labada dhinac.

Waxaana sidoo kale isku daynay inaan la xiriirno dadka deegaanka, balse weli kama aanan helin jawaab dhanka taleefanka.

Jimco 20 March 2026 {HMC} Waxaan hadda maqalnaa Madaxweynaha Mareykanka Donald Trump, kaas oo xulafada Nato ku tilmaamay “fulayo” isla markaana sheegay inay “fududahay” inay oggolaadaan in maraakiibtu si ammaan ah ku maraan Marinka Hormuz.

Halkan waa qoraalkiisa oo dhammaystiran oo uu soo dhigay bartiisa bulshad aee Truth Social:

“Mareykanka la’aantiisa , NATO WAA SHABEEL WARQAD AH! Ma aysan rabin inay ku soo biiraan dagaalka lagu joojinayo Nukliyeerka Iran.

“Hadda oo dagaalkaas dhanka Millatariga looga GUULEYSTAY, ayada oo khatar aad u yar ay iyaga soo gaartay, waxay ka cabanayaan qiimaha sarreeya ee saliidda oo lagu qasbay inay bixiyaan, laakiin ma rabaan inay gacan ka geystaan furista Marinka Hormuz, oo ah dhaqdhaqaaq millatari oo fudud kaas oo ah sababta kaliya ee ka dambaysa qiimaha saliidda ee sarreeya.

“Aad bay ugu fududahay inay sameeyaan, khatartuna aad ayay u yar tahay. FULAYO, waana soo XUSUUSAN DOONNAA!”

Jimco 20 March 2026 {HMC} Xisbullah ayaa maalintii Jimcaha iska fogeeyay wax ay ugu yeereen eedaymo “la dhow dhowray,” ka dib markii mas’uuliyiinta Imaaraadka Carabta ay ku dhawaaqeen inay fashiliyeen “shabakad argagixiso” oo xiriir la leh kooxdaas iyo taageeraheeda Iiraan, iyadoo la xiray ugu yaraan shan xubnood oo ka tirsan kooxdaas.

Tani waa markii saddexaad muddo toddobaad gudihiis ah oo Xisbullah ay inkirto wax xiriir ah oo ay la leedahay shabakado lagu xirxiray dalalka Khaliijka, oo ay ku jirto dalka Kuwayt, kaas oo ku dhawaaqay xarigga 26 qof oo toddobaadkan lala xiriiriyay xisbiga.

Ururka ayaa bayaan uu soo saaray ku xaqiijiyay in “uusan wax joogitaan ah ku lahayn gudaha Imaaraadka Carabta ama dalalka kale, hadday ahaan lahayd magac kale, magac ganacsi, ama si kasta oo kale.”

Wakaaladda wararka rasmiga ah ee Imaaraadka ee WAM ayaa soo xigatay Adeegga Amniga Qaranka ee Imaaraadka horraantii Jimcihii, iyagoo sheegay in shabakadu ay “isku dayday inay dhex gasho dhaqaalaha qaranka oo ay fuliso qorsheyaal khatar gelinaya xasilloonida maaliyadeed ee dalka,” taas oo qayb ka ah “qorshe hore loo soo agaasimay oo lala xiriirinayo dhinacyo dibadda ah oo xiriir la leh Xisbullah iyo Iiraan

Xigasho BBC

Jimco 20 March 2026 {HMC} Aqalka Cad wuxuu raadinayaa lacag dheeraad ah oo milateriga la siiyo oo gaaraysa $200 bilyan, taas oo dheeraad ku ah miisaaniyadda difaaca ee sannadlaha ah ee $838.7 bilyan ee uu Congress-ku horay u ansixiyay bishii Janaayo. Pentagon-ku wuxuu sheegay in dagaalku ku kacay $11.3 bilyan toddobaadkiisii ugu horreeyay oo qura.

Iska horimaadku wuxuu galay toddobaadkiisii afaraad maalintii Sabtida, iyadoo saraakiishu ay soo jeedinayaan inuu sii socon karo toddobaad ilaa saddex toddobaad

Isku soo duub, sumcadda diyaaradda F-35 hadda waxay gashay waji kale. Hal diyaarad oo la beegsaday kama dhigayso barnaamijka oo dhan mid aanan shaqaynayn. Su’aasha se mudan in la is weydiiyo waa, in F-35 ay u babac dhigi karto dhibaatooyinka dagaalka hawada sare ah oo lala galo kuwa la tartamaya Mareykanka sida Shiinaha ama Ruushka. Iiraan ayaa dhanka jawaabta su’aashaas hadda tilaabo u qaaday.

Halkii mid oo F-35 ah sameynteedu wuxuu ku kacayaa ilaa $77 milyan. Midda Khamiistii degtay waxay u badan tahay inay tahay mid la hagaajin karo.

Laakiin gudaha Beijing iyo Moscow, waxaa indhaha dhan lagu hayaa sidii loo heli lahaa jawabata wixii dhacay khamiistii iyo waxa suurtagalka ka dhigay.

Dagaalkan oo ah mid lagu dagaallamayo qayb ahaan fahamka, qayb ahaanna iska-caabbinta, muhiimad gaar ah ayay u leedahay in Iiraan ay ka takhalustay aaminaadii ahayd in F-35 aan shiish lala heli karin. Natiijadda xigtana waxa ay u badan tahay mid aysan Washington jeclaysan doonin.

Jimco 20 March 2026 {HMC} Meel kamid ah hawada dalka Iiraan ayaa maalinimadii Khamiista, 19kii Maarso, ayaa gantaal ama wax u eg uu ku helay diyaarad Mareykanku leeyahay oo F-35 ah. Milateriga Maraykanka ayaa xaqiijiyay in diyaaradda ay ku dhacday rasaas looga shakisan yahay inay ka timid dhanka Iiraan xilli ay ku jirtay hawlgal dagaal, waxayna ku guulaysatay inay si degdeg ah ugu degto saldhig diyaaradeed oo Maraykanku ku leeyahay gobolka.

Pentagon-ku wuxuu dhacdadan ku tilmaamay mid baaritaan lagu sameynayo oo jirta. Waana weedh la dhihi karo waa la filayay oo taxadar ayay ka muujinayaan intaysan wax sheegin. Laakiin dhacdadani si walba taxadar uga dheer, oo waa ba mid aan hore loo arag.

In ka badan toban sano oo hawlgalo dagaal laga fulinayay Suuriya, Liibiya, Qasa iyo meelo ka baxsanba, ma jirin F-35 waligeed lasoo sheegay in ay ku dhacday rasaas cadow. Rikoodhka diiwaankaas hadda Iran ayaa soo afjadhay.

Waxa ay Iiraan Khamiistii samaysay waa inay burburisay dooddii ololaha cirka ee laga iibiyay caamadda, si dad badan u aaminaan caqiidada ah in wax kastoo dhaca aan la beegsan karin F-35.

F-35 waxaa lagu dhisay hal istiraatiijiyadeed oo abuurkeeda oo dhan ubuc u ahayd. Richard Aboulafia, maamulaha shirkadda la talinta ee Maraykanka ee AeroDynamic Advisory ahna mid ka mid ah codadka loogu tixraaca badan yahay falanqaynta duulista milateriga, ayaa mar dhexdaas ah F-35 ka yiri: “Wax walba oo cirkaa heehaabaya, si kastuu u hormarsan yahay, waa wax mar uun ishu qaban kadho. Fikirka ah inaad haysato qalab ku qarinaya waa mid aad u khatar badan., oo jar kaa tuuri kara.”

Hadalkaas dad badan ayaa u qaatay inuu ku liidayo tayada diyaaradda. Laakiin, wuxuu saxayay khuraafaad barnaamijka diyaaraddani laftiisu gacan ka geystay dhisiddiisa.

Lockheed Martin waxay ku tilmaantay F-35 inay awood u leedahay inay u shaqayso sidii calaamad le’eg xajmiga kubbadda golf-ka, taas oo si wax ku ool ah aan looga arki karin raadaarka marka ay fog tahay.

Madaxweynaha Maraykanka Donald Trump, ayaa si ku celcelis ah marar badan u dhiirrigeliyay barnaamijkan, isagoo isu-soo-baxyo kala duwan ugu sheegay taageerayaashiisa in diyaaraddani ay tahay mid aan la shiishi karin.

Warkaas waxaa diiday reer Tehran. Oo Trump ku yiri, ku laabo halkaas aad ku sheegtay inay tahay mid aan la haleeli karin.

XIGASHO BBC

Khamiis 19 March 2026 {HMC} Xildhibaano ka tirsan labada Aqal ee Baarlamaanka Federaalka Soomaaliya, isla markaana taageersan maamulka Koonfur Galbeed, ayaa eedeyn culus u jeediyay ciidamada Itoobiya ee ku sugan degmada Buur Hakaba.

Xildhibaanadan ayaa sheegay in ciidamada Itoobiya ay jebiyeen amarro ka soo baxay maamulka Koonfur Galbeed, kaddib markii ay u oggolaadeen wasiirro ka tirsan dowladda federaalka inay halkaas ka abaabulaan ciidamo.

Arrintan ayay ku tilmaameen mid si toos ah uga hor imaaneysa awoodda iyo maamulidda dowlad-goboleedka.

Waxay sidoo kale ka digeen in tallaabooyinkan ay sii hurin karaan xiisadaha siyaasadeed iyo kuwa amni ee ka taagan deegaannada Koonfur Galbeed, iyagoo ugu baaqay dhammaan dhinacyada inay ixtiraamaan nidaamka maamul iyo amni ee u yaalla dowlad-goboleedka.

Xildhibaanadu waxay carrabka ku adkeeyeen in lagama maarmaan ay tahay in la ilaaliyo wada shaqeynta hay’adaha dowladda iyo in aan la abuurin xaalado keeni kara isku dhac hor leh.

Ilaa iyo hadda, wax war rasmi ah kama soo bixin dhinaca ciidamada Itoobiya iyo dowladda federaalka Soomaaliya ee ku aaddan eedeymahan.

Xildhibaano federaalka ah oo ku eedeeyay Ciidamada Itoobiya Faragelin ay ku hayso Buur Hakaba

Xildhibaano federaalka ah oo ku eedeeyay Ciidamada Itoobiya Faragelin ay ku hayso Buur Hakaba

Jimce 20, Maarso 2026 {HMC} Milatariga Israa’iil ayaa sheegay inay weerareen xeryo ay leeyihiin ciidamada Suuriya habeenkii xalay iyagoo ka jawaabaya waxa ay ku sheegeen inay yihiin weeraro ka dhan ah bulshada Druze ee koonfurta dalka.

“Tani waxay ahayd jawaab celin dhacdooyinkii shalay, oo lagu weeraray dad rayid ah oo Druze ah aagga [Suwayda],” ayay militariga Israa’iil ku sheegeen qoraal ay soo dhigeen Telegram Jimcihii.

“[Ciidanka Israa’iil] uma oggolaan doonaan waxyeello inay soo gaarto Druze ee Suuriya waxayna sii wadi doonaan inay u dhaqmaan si ay u ilaaliyaan.”

Kooxda dabagalka xuquuqda aadanaha ee Suuriya ayaa Khamiistii sheegtay in dagaal uu ka qarxay ciidamada dowladda iyo dagaalyahanno ka socda qabiillada deegaanka oo ka dhan ah kooxaha Druze ee ka soo horjeeda miyiga galbeed ee Suwayda.

Dagaalku wuxuu bilaabmay ka dib markii madaafiic hoobiyeyaal ah ay ku dhaceen meelaha ay gacanta ku hayaan kooxaha Druze.

Duqeynta ayaa markii dambe ku dhacday xaafado ay degan yihiin oo ku yaal magaalada Suwayda, taasoo argagax iyo cabsi ku beertay dadka deegaanka, sida ay sheegtay hay’adda dabagalka Suuriya.

Wakaaladda wararka ee SANA ee dawladdu maamusho ee Suuriya ma aysan aqoonsanayn dagaalka ka dhacay Suwayda ama weerarkii Israa’iil.

Rabshado ayaa markii ugu horreysay ka qarxay Suwayda Luulyo 13-keedii, kuwaas oo u dhexeeya dagaalyahannada qabiilka Bedouin iyo kooxaha Druze.

Ciidamada dowladda ayaa loo diray inay joojiyaan dagaalka, laakiin dhiiggu wuu sii daatay, Israa’iilna waxay weerarro ku qaadday ciidamada Suuriya waxayna sidoo kale duqeysay bartamaha caasimadda, Dimishiq, iyagoo ku marmarsiyoonaya inay ilaalinayaan Druze-ka.

Israa’iil ayaa horey u sii gashay dhulka Suuriya ka dib markii uu dhacay Bashar al-Assad bishii Diseembar 2024, iyagoo qabsaday aagga difaaca waxayna sheegeen in heshiiskii 1974-kii ee Suuriya uu burburay.

Isku dhacii ugu dambeeyay ee u dhexeeyay dalalka deriska ah ayaa yimid iyadoo dagaal uu ka socdo Bariga Dhexe ka dib markii Mareykanka iyo Israa’iil ay weerareen Iiraan Febraayo 28.

Khudbad uu jeediyay ka dib salaaddii Ciidul Fitriga ee Jimcihii ka dhacday Dimishiq, Madaxweynaha Suuriya Axmed al-Sharaa wuxuu sheegay inuu ka shaqeynayo sidii Suuriya looga ilaalin lahaa colaad kasta.

“Waa muhiim in la xasuusto in Suuriya ay had iyo jeer ahayd goob colaadeed iyo colaadeed 15-kii sano ee la soo dhaafay iyo ka hor, laakiin maanta waxay la jaanqaadaysaa dhammaan waddamada deriska ah ee gobolka iyo caalamkaba,” ayuu yiri.

Wuxuu intaas ku daray in Suuriya ay “si buuxda ula garab taagan tahay dowladaha Carabta”.