Talaado June, 25, 2024 {HMC} – Madaxweynaha dowlad goboleedka Galmudug mudane Axmed Cabdi Kaariye ayaa furay shirka nabadeynta beelaha kasoo kala jeeda degmooyinka Xeraale iyo Cabudwaaq, kuwaasoo dhawaan maleeshiyaad kala taabacsan ay diriri dhexmartay.

Madaxweynaha ayaa ku boorriyey salaaddiinta iyo nabaddoonnada inay guud ahaan reer Galmudug gaar ahaan dadka ay kasoo kala jeedaan u qaadaan nabad waarta, isla markaana dhinac looga soo wada jeesto cid kasta oo nabadda lid ku ah.

Sidoo kale Madaxweynaha ayaa guddi culimo ah oo loo saaray xal u helidda dirirta beelaha walaalaha ah kula dardaarmay iney xaqa u hiilliyaan cidna aysan u eexan, isla markaana ay dowladdu ku garab taagan tahay.

Labada Mareexaan iyo Dir ayaa dhowaan maleeshiyaad kala taabacsan waxay ku dagaalameen degaano u dhexeeya degmooyinka Caabudwaq iyo Xeraale, kaasoo salka ku hayey dilal aano qabiil, waxaana dagaalkaas ku naf waayey dad ka badan 50 qof halka ku dhowaad 100 kale ay ku dhaawacmeen.

Talaado June, 25, 2024 {HMC} –  Ciidamada Israel ayaa la sheegay weerar dhinaca cirka ah oo aroornimadii maanta ka fuliyeen magaalada Gaza ku dileen xubno badan oo katirsan qoyska hoggaamiyaha ururka Xamaas Ismaaciil Haniyah.

War ay soo saarray hay’adda difaaca madaniga ah ee Gaza ayaa lagu sheegay in weerarka Israel ka fuliyeen xerada qaxootiga Al-Shati lagu dilay xubno katirsan qoyska Hoggaamiyaha ururka Xamaas.

Afhayeenka difaaca madaniga ah ee Gaza Mahmud Basal, ayaa sheegay in weerar dhinaca cirka ah ay fuliyeen ciidamada Israel lagu dilay toban qof bay ku jirto Sahra Haniyeh oo la dhalatay hoggaamiyaha Xamaas.

Hoggaamiyaha ururka Xamaas Ismaaciil Haniyah ayaa horey loogu dilay magaalada Gaza saddex wiil uu dhalay iyo afar kale uu awoowe u ahaa, waxaana weerarkan uu dhacay Bishii April ee sannadkan, gaar ahaan maalintii Ciidul Fitriga.

Israel ayaa dad ku dhaw 40-kun oo qof ku xasuuqday magaalada Gaza ee dhulka Falastiin, ciidamada Israel ayaana wali wada duullaanka ay wali ku beegsanayaan dadka shacabka ah aan waxba galabsan.