Khamiis 20 June 2024 {HMC} Guddoomiyaha Hay’adda Maareeynta Masiibooyinka Soomaaliyeed Md. Maxamuud Macalin iyo wafdi uu hoggaaminayo ayaa todobaadkan howlo shaqo u joogay magalada Himeji ee dalka Japan iyaga oo ka qayb-galaya shir laba sanadle ah oo lagu magacaabo Madasha Caalamiga ah ee Fahamka Halista “Understanding Risk Global Forum“.

Gudoomiyaha ayaa Madasha ka jeediyay khudbadiisa oo uu kaga hadlay sooyaalka hay’adda SoDMA, guulaha ay gaartay labadii sano ee la soo dhaafay, howlaha hortabinta u leh hay’adda iyo caqabadaha horyaalla hay’adda. Wafdiga ayaa sidoo kale ka qaybgalay shirar doceedyo iyo doodo looga hadlayay arimaha la xiriira maaraynta masiiboouyinka dabiiciga ah iyo kuwa aan dabiiciga ahayn.

Ugu danbeeyntii, Guddoomiye Maxamuud ayaa u mahad celiyay Bankiga Adduunka oo abaabulka shirka iyo dowladda Japan oo martigalisay.

Khamiis 20 June 2024 {HMC} Wasiirka Amniga Gudaha Xukuumadda Federaalka Soomaaliya Mudane Cabdullaahi Sheekh Ismaaciil {Fartaag}, ayaa maanta xafiiska ku qaabilay Danjiraha Midowga Yurub u fadhida Soomaaliya Marwo Karen Johanson.

Kulanka ayaa diiradda lagu saaray xoojinta wada shaqeynta iyo iskaashiga labada dhinac, qorshaha marxaladda kala-guurka ee Ciidanka Midowga Afrika ee ATMIS, tababarrada Ciidamada Daraawishta Boliiska, horumarinta sharciyada iyo qorshaha xasillinta goobaha laga xoreeyay Khawaarijta.

Labada dhinac waxay isla garteen in la joogteeyo kulamada, isla markaana la dardargeliyo hirgelinta hawlaha qorsheysan iyo ka baaraandegga hawlaha hortebinta uleh amniga sida ugu dhaqsiyaha badan.

Khamiis 20 June 2024 {HMC} Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre, ayaa maanta wareegto uu soo saaray ugu magacaabay Dr Aweys Cabdullaahi Cali La-taliyaha sare ee dhaqaalaha.

Wareegtada kasoo baxday xafiiska Ra’isul Wasaare Xamse Cabdi Barre ayaa sidoo kale loogu magacaabay Dr Aweys Cabdullaahi in uu noqdo agaasimaha waaxda qorsheynta dhaqaalaha ee Xafiiska Ra’iisul Wasaaraha .

Ninkan loo magacaabay labada xil ee lataliyaha iyo agaasinka ayaa la sheegay in uu kamid yahay dadka aadka ugu dhaw Ra’isul Wasaaraha, waxa uuna qeyb ka yahay xubno badan oo xilal looga tixay xafiiska Ra’isul Wasaaraha.

Xafiisyada Madaxweynaha iyo Ra’isul Wasaaraha ayaa xilal u badan lataliyaal looga magacaabay xubno ku yimid saaxiibtinimo iyo xubno kale oo iyana lagu magacaabay ballanqaadyo loo sameeyay siyaasiyiin dano lagu meel marsaday.

Khamiis 20 June 2024 {HMC} Boqolaal ka tirsan Ciidamada itoobiya ayaa shalay ilaa manta kasoo gudbay Xadka Gobolka Hiiraan uu la wadaago Dowlad Deegaanka Soomaalida Itoobiya. Ciidamadan oo aad u hubeeysan ayaa kasoo gudbay Degmada Feerfeer Soomaaliya oo ku taalla Xadka

Dadka ku nool degmada Feerfeer Soomaaliya ayaa Hiiraanweyn u sheegay in ay arkeeyn Ciidamo farabadan oo itoobiyaan ah kuwaas oo lug uga soo gudbay Xadka shalay ilaa manta iyada oo wato Gaadiid dagaal oo aad ufarabadan

ilaa iyo hada lama-oga ujeedka Rasmiga ah ee ka dambeeysay in Ciidamadan ay kasoo gudbaan Xadka Gobolka Hiiraan uu a wadaago Dowlada Deegaanka Soomalida Itoobiya. Arintan ayaa dadka deegaanka waxaa ay ku abuurtay Walaac xoogan

Ciidamada Soo gudbay ayey dadka deegaanka sheekeyn In lagu Qiyaasay ilaa toban-kun oo askari, Deegaanada Jawiil Jiracle ilaa Beergadiid ayaa Manta lagu arkay Ciidamadan Itoobiyaanka ah kuwaas oo wato gaadiid dagaal oo aad u badan

Dhaq dhaqaaqa ay Bilaabeen Ciidamada Itoobiya ayaa kuso aadeysa xilli Khilaaf Xoogan oo udhaxeeyo Dowladaha Soomaaliya iyo Itoobiya. Dowlada Soomaaliya ayaa sheegtay in guud ahaan Soomaaliya laga Saarayo Ciidamada itoobiyaanka ah sanadkan gaar ahaan Bisha Juun

Dowlada Itoobiya oo hadalkan ka jawaabtay ayaa sheegtay in Soomaaliya ay ku joogto Magaca ATMIS Ila aiyo hadane dhinacooda uunan war kasoo gaarin.

Khamiis 20 June 2024 {HMC}  Madaxweynaha JFS Mudane Xasan Sheekh Maxamuud iyo wafdi uu hoggaaminayo oo maanta dalka dib ugu soo laabtay kadib safaro shaqo uu ku tagay dalalka Norwey, Switzerland, Turkiga iyo Jabuuti.

Madaxweynaha Jamhuuriyadda ayaa magaalada Oslo ee dalka Norway uga qeybgaley Madasha Nabadda ee Oslo , halkaas oo uu hadal ka jeediyay. Waxaa sidoo kale uu Madaxweynaha uu kulamo la yeeshay Boqorka iyo Ra’iisul Wasaaraha Norway.

Sidoo kale Madaxweynaha dowladda Soomaaliya Xasan Sheekh Maxamuud waxaa uu dalka Switzerland uga qeybgaley shir caalami ah oo looga hadlayey colaadda u dhexeysa Ruushka iyo Ukraine

Madaxweyne Xasan Sheekh Maxamuud ayaa ugu dambeyn safarkiisa shaqo kusoo gabagabeeyay dalalka Turkiga iyo Jamhuuriyadda walaalaha nahay ee Jabuuti isagoo la kulmay madaxda labadaasi dal.

Khamiis 20 June 2024 {HMC}  Ciidanka xoogga dalka gaar ahaan kumaandooska Gorgor, ayaa howlgal qorsheysan oo ay ka fuliyeen gobolka Shabeelaha Hoose waxa ay ku dileen sargaal katirsanaa Al Shabaab oo xilal kala duwan soo qabtay.

Ciidanka Gorgor ayaana gurigiisa oo kuyaalla deegaanka Shaamgarre ugu galay sargaalkan oo lagu magacabayay Sakariye Cabduqaadir Shabeelow (Moosow) , waxaana la sheegay in ciidanka ninkaasi goobtaasi ku dileen.

Taliyaha ururka 1-aad ee ciidamada Gorgor Cabdisalaan Jaamac Xasan ayaa warbaahinta u sheegay in ninkan ay dileen uu soo noqday madaxii miinooyinka Al Shabaab deegaannada Bariire iyo Owdheegle, haddana uu Al Shabaab u qaabilsanaa dhinaca jaajuusnimada .

Waxa uu sheegay taliyaha Gorgor in ninkan ay dileen uu ahaa nin shar badan oo dhibaatooyin badan ku hayay dadka deegaanka, waxa uu sheegay in dad badan ka gubay gaadiid iyo mootooyin kuwa kalana uu dhac u geestay.

Taliyaha ururka 1-aad ee ciidamada Gorgor Cabdisalaan Jaamac Xasan ayaa sidoo kale sheegay in ay jiraan dad kale oo lagu tuhmayo in ay katirsan yihiin Al Shabaab oo howlgalka lagu soo qabtay, kuwaa uu sheegay in ay ka socdaan baaritaanno.