Arbaco 5 June 2024 {HMC} Jawaabta kooxda iska caabinta Falastiin ee Xamaas ee ku aaddan hindisaha xabbad-joojinta ee madaxweynaha Mareykanka Joe Biden ayaa weli la sugayaa, sidda laga soo xigtay Aqalka Cad.

lataliyaha amniga qaranka ee Aqalka Cad Jake Sullivan ayaa u sheegay warfidiyeenka.
“Waxaan jawaab ka sugeynaa Xamaas iyada oo loo marayo dhexdhexaadiyeyaasha Qatar,” Sullivan ayaa yiri.

“Agaasimaha CIA Bill Burns ayaa ku sugnaan doona Doha si uu ula tashado dhexdhexaadiyeyaasha Qatar hindisaha xabbad joojinta Gaza,” Sullivan ayaa raaciyay.

Qatar ayaa Gaza ka dhex dhexaadineysay Israel iyo Xamaas.

Raiisel wasaaraha Israa’iil Benjamin Netanyahu ayaa weli ah mid aan mugdi ku jirin oo uu “dal-daloolo” ka helay soo jeedinta Biden halka saaxiibadiisa xagjirka ah ay ka soo horjeedaan heshiis kasta oo xabbad joojin ah oo lala galo Hamas.

Waxay ku hanjabeen inay jabin doonaan xukuumadda isbahaysiga ee Netanyahu haddii uu aqbalo heshiiska Biden

Afhayeen u hadlay Xamaas ayaa dhanka kale ku celiyay in aysan aqbali karin wax heshiis ah ilaa ay Israa’iil samayso go’aan “cad” oo ah xabbad-joojin joogto ah iyo inay gebi ahaanba ka baxdo go’doominta Gaza

Arbaco 5 June 2024 {HMC} Soomaaliya ayaa lagu wadaa in ay kursi aan joogto ahayn ku yeelato Golaha Ammaanka ee Qaramada Midoobay, iyadoo aan lagula tartami doonin kursiga wadamada Afrika.

Inta lagu guda jiro kalfadhiga 78-aad ee Golaha Guud ee Qaramada Midoobay oo dhacaya 6-da June ayaa la qorsheeyay in codbixinta la qaado.

Soomaaliya ayaa ah dalka matalaya Qaarada Afrika, mana jiro dal kale oo Afrika ka socda oo tartanka la galaya, waxaana ay noqon doontaa markii labaad oo Soomaaliya ay ka mid noqoto xubnaha aan joogtada aheyn ee Golaha

Soomaaliya ayaa taageero xooggan ka heshay ururka Midowga Afrika oo ansixiyey in Soomaaliya ay noqoto musharaxa kaliya ee u taagan kursiga Afrika.

Wasiirka Arrimaha Dibadda iyo Iskaashiga Caalamiga Soomaaliya Axmed Macallin Fiqi iyo wafdi uu hoggaaminayo ayaa gaaray magaalada New York ee dalka Mareykanka, isaga oo ka qeybgalaya meertada 78-aad ee fadhiga guud ee Qaramada Midoobey oo lagu dooranayo xubnaha Golaha ammaanka.

Laga bilaabo 1-da Janaayo 2025, Soomaaliya iyo xubnaha aan joogtada ahayn ee Golaha ammaanka waxaa u bilaaban doona muddo xileedkooda oo ku eg 31-ka December 2026.

In Soomaaliya ay hesho kursiga aan joogtada aheyn ee Afrika ay ku leedahay golaha ammaanka ee QM, waxay ku timid dedaal diblomaasiyadeed oo ay dawladdu bixisay, kuna kasbatay in loo garto inay kaligeed u tartanto kursigaas.