Isniin-13-May-2024 {HMC} Faah-faahinno kala duwan ayaa kasoo baxaya qaraxyo xalay ka dhacay gudaha magaalada Baydhaba ee xarunta KMG ah ee Koonfur Galbeed Soomaaliya, kuwaas oo ay ka dambeeyeen AS.

Qaraxyada oo labo ahaa ayaa waxaa lagu weeraray guryo ay magaaladaasi ka dagan yihiib mas’uuliyiin ka tirsan maamulka, sida ay innoo xaqiijiyeen ilo wareedyo xilkas.

Weerarka koowaad ee qaraxa ah ayaa waxaa lagu qaaday hoy uu dagan yahay sarkaal sare oo ka tirsan ciidanka Koonfur Galbeed, kaas oo magaciisa lagu sheegay Kuuroow Amxaar, waxaana kadib xigay ka hortag ay sameeyeen ciidamada ammaanka.

Sidoo kale waxaa qaraxa labaad lagu weeraray guriga wasiirkii hore ee warfaafinta Koonfur Galbeer Ilyaas Cali Nuur oo haatan ah agaasimaha xarunta Tubsan ee maamulkaasi.

Ma cadda khasaaraha rasmiga ah ee ka dhashay qaraxyadan oo ay mas’uuliyaddooda ay sheegteen maleeshiyaadka kooxda AS.

Dhinaca kale ciidamada ammaanka Koonfur Galbeed ayaa saaka baaritaano dheeraad ah ka wada Baydhaba, si gacanta loogu soo dhigo kooxihii ka dambeeyay weeraradaasi.

Ma jiro illaa iyo hadda wax hadal ah oo kasoo baxay maamulka Koonfur Galbeed oo ku aadan qaraxyadaas iyo howlgallada xigay ee ay sameeyeen ciidamada ammaanka.

Baydhaba ayaa waxaa mararka qaar ka dhaca dilal iyo weeraro ay soo abaabulaan kooxda AS oo go’doomin ku haayo magaaladaas iyo deegaanada kale ee maamulka Koonfur Galbeed Soonaaliya.

Isniin-13-May-2024 {HMC} Ugaas Yuusuf Ugaas Xasan Ugaas Kahliif Ugaas Rooble oo noqonaya Ugaaskii 21-aad ee beesha Xawaadle ayaa maanta lagu caano-shubayaa deegaanka Daharo Ugaas oo ka tirsan magaalada Halgan ee gobolka Hiiraan.

Ugaas Yuusuf ayaa badalaya aabihii Ugaas Xasan Ugaas Khaliif oo Muqdisho ku geeriyeeday bishii Febraayo 2021.

Madax sare oo ka tirsan Dawladda Federaalka ayaa lagu wadaa in ay ka qaybgalaan caano-shubka Ugaaska, waxana magaalada Halgan maalmihii ugu dameeyay ku qulqulayay boqollaal qof oo ka kala yimid dalka gudihiisa iyo dibaddiisa.

Gudoomiyaha Gobolka Hiiraan Muuse Salaad Wehliye, Duqa Baladweyne Cabdulaahi Salaad Iyo Xildhibaano ka tirsan Dowlada Soomaaliya ayaa gaaray Magaalada Halgan ee Gobolka Hiiraan.

Taliyaha NISA Cabdillaahi Maxamed Cali Sanbalooshe iyo xubno ka tirsan Dawladda Federaalka ayaa ku sugan Magaalada Baladweyne Si ay uga qeeyb galaan Caleema-saarka Ugaaska.

Saldanadda beeshan ayaa kamid ah kuwa ugu faca weyn dhulka Soomaalida, waxana si weyn reerka dhexdiisa looga ixtiraamaa Ugaaska markaas xukunka haya.