Khamiis, 9, May, 2024 {HMC} Hay’adda Maareynta Musiibooyinka Qaranka Soomaaliyed ee SoDMA, ayaa degmada Ceel-baraf ee gobolka Shabeelladda Dhexe waxa ay gargaar ugu qeybisay 1,200 oo qoys oo Bilo ka hor ka soo barakacay colaadii ka dhacday degaanka Eji oo dhaca soohdinta ay wadaagaan gobolada Shabeellada Dhexe iyo Hiiraan.

Qoysaskaan ayaa la gaarsiiyey gargaar iskugu jira qeybaha kala duwan ee raashinka iyo Teendhooyin, si dib u dajin loogu sameeyo, waxana maalmihii danbe ay wajahayeen xaalad adag waxaana Jimcihii Toddobaadkii hore ka jawaabay qeylo dhaantaan Hay’adda Maareynta Musiiboyinka Qaranka ee SoDMA.

Goobta lagu qeybinayey gargaarkaan waxaa goobjoog ka ahaa masuuliyiin ka tirsan Hirshabeelle, waxana ay u mahadnaqeen hay’adda Mareeynta Musiiboyinka Qaranka oo deqdaan shacabkaan soo gaarsiisay.

Khamiis, 9, May, 2024 {HMC} Diyaarad nooceedu ahaa Boeing 767 Cargo Plane oo ay leedahay shirkadda FedEx Express ayaa lagu soo waramay inay si degdeg ah ugu degtay garoonka diyaaradaha ee magaalladda Istanbul ee dalka Turkiye, kadib, markii uu u bixi waayey Taayarka hore.

Muuqaalo lagu baahiyey baraha bulshada iyo warbaahinta qaar ayaa waxaa la arki karaa diyaaradda oo foolka hore dhulka herdiyey, markii ay sida deg dega ah uga degtay garoonka Istanbuulo.

Wasiirka Gaadiidka iyo Kaabayaasha ee dalka Turkiye, Abdulkadir Uraloglu ayaa sheegay in aysan cidna wax ku noqonin shilkaasi iyaaradeed, iyadoo shaqaalihii diyaaradda si nabbad ah loo daad-gureeyey.

Diyaaradda oo tirsiga duullimaadkeeda ahaa (Flight Number) FX 6238 ayaa waxay isaga kala gooshaysay garoonka Charles de Gaulle ee caasimadda dalka Faransiiska ee Paris iyo garoonka magaalladda Istanbul ee dalka Turkiye.

Diyaarada waxay horaadka hore dhigatay dhabaha ay diyaaradaha ka hinqadaan, kuna soo degaan ee Runway 16R ee garoonka magaalada Istanbul, waxaana si KMG ah loo xiray duullimaadkii garoonkaasi.

Docda kale, kooxaha gurmadka garoonka iyo dab-damiska ayaa waxay ku hawlan yihiin sidii diyaarada cilladaysan ee dhorkadda FedEx looga qaadi lahaa dhabaha Runway 16R iyo inay dib u bilowdaan duullimaadyadii garoonka Istanbul.

Khamiis, 9, May, 2024 {HMC} Warar dheeraad ah ayaa kasoo baxaya dab maanta ka kacay suuq ku yaalla bartamaha magaalada Hargeysa, kaas oo ay kuu guuleysteen inay damiyaan ciidanka dab-damiska Somaliland oo faah-faahiyay sida ay wax u dhaceen.

Dabka ayaa ka kacay suuqa hoose ee degmada 26 June, wuxuuna ka kacay mehrad ganacsi oo ku taalla halkaasi, sida lagu sheegay qoraal kasoo baxay ciidanka Dab-damiska.

“Ciidanka Dab-demiska Hargeysa oo damiyay Dab ka kacay meherad ku taala suuqa hoose ee degmada 26 june oo lagu magacaabo ZamZam Solar Tech” ayaa lagu yiri qoraalka.

Ciidamada Dab-damiska oo qaaday howlgal deg-deg ah ayaa isla markiiba damiyay dabkaas, kahor inta uusan ku fidin xarumaha kale ee ka agdhowaa goobta uu ka kacay, sida lagu sheegay warsaxaafadeedka, waxaana la bad-baadiyay hantida ganacsatada.

“Hawlgal adag kadib Ciidanka ayaa damiyay dabkaas oo ahaa mid ku fidaayey meheradii gubatay iyo meheradihii u dhawaa, waxaana badbaaday dhamaan mehradihii ka ag dhawaa” ayaa la sii raaciyay qoraalka.

Dhinaca kale ciidanka Dab-damiska maamulka Somaliland ayaa baaq u diray shacabka iyo ganacsatada oo ay ka dalbadeen inay soo wargeliyaan kahor inta uusan waynaan dabka.

“Ciidanka Dab-demisku wuxuu halkan fariin uga dirayaa bulshada Somaliland in ay soo sheegaan dabku intuu yaryahay, sidoo kale ka digtoonaadaan wax kasta oo keeni ama sababi kara dab, khaasataan korontada” ayaa lagu yiri farriinta loo diray bulshada.

Waxaa kale oo lagu yiri qoraalka “Hadii aad la kulanto masiibo dab soo wac lambarka gurmadka degdega ah ee 990 shirkadaha Telesom/Somtel 24 ka saacadoodba”.

Somaliland waxaa horay dab xoogan uu ka kacay suuqa wayn ee Waaheen, kaas oo gebi ahaan basbeelay, waxaana ka dhashay khasaare hantiyeed oo baaxad leh & burbur xoogan.

Khamiis, 9, May, 2024 {HMC} Ciidanka hay’adda Nabad sugidda iyo sirdoonka Qaranka ayaa howlgalo ay ka sameeyeen magaalada Baydhabo dee xarunta KMG ee Koonfur Galbeed, kusoo qab qabtay xubno badan oo la sheegay in ay katirsan yihiin Al Shabaab.

Taliska ciidanka Nabad sugida ee maamulka Koonfur Galbeed ayaa Magaalada Baydhabo kusoo bandhigey 12 xubnood oo la sheegay in ay katirsan yihiin Al Shabaab , kuwaa oo ciidanka siyaabo kala duwan kusoo qabteen.

Saraakiisha ciidanka NISA ayaa sheegay in kooxdan katirsan Al Shabaab lagu soo qabtay howlgalo kala duwan ay ciidanka ka fuliyeen gudaha magaalada Baydhabo iyo sidoo kale deegaannada kale ee ku xeeran.

Raggan ay ciidanka nabad sugida soo bandhigeen ayaa la sheegay in Al Shabaab u qaabilsanaayeen jabhadaha iyo sidoo kale aruurinta canshuuraha, waxa ayna raggan qaarkood qirteen in Al Shabaab katirsan yihiin.

Ciidanka nabad sugida Soomaaliya ayaa marar badan gacanta ku dhigay xubno badan oo katirsan Al Shabaab , kuwaa oo si dhuumaaleysi ah shaqadooda uga waday deegaanno dowladda maamusho.

Khamiis -09- may -2024 {HMC} – Xildhibaan Cismaan Xaadoole oo ka jawaabay eedeyn looga jeediyey baraha bulshada ayaa isagoo careysan shir jaraa’id ku qabtay goobtii lagu aasay Dhamme Sayid-cali Cabdi oo ahaa sarkaal ka tirsan militeriga, isla markaana dhowaan lagu dilay Muqdisho, kadib is rasaaseyn ka dhacday gurigiisa oo Boondheere ku yaallay.

Xildhibaan Xaadoole ayaa sheegay in cod sir ah uu ka duubay in dibadda jira oo soo wacay, kaas oo kula dooday sababta uu uga aamusan yahay dilka Sayid-cali, isagoo sheegay inuu ugu jawaabay “Waryaa waa nagala dhima jiraye orod buuqa igala tag.”

Xaadoole ayaa sheegay in hadalkaas in laga duubaayo uusan ku tala gelin, balse uu qiyaamay qofkii uu la hadlaayey ee qaraabadiisa ka tirsanaa, wuxuu sheegay in hadalkaas uusan xumaan kala jeedin, isla markaana bilow ilaa dhamaad uu ku howlanaa cadaalad u raadinta sarkaalka la dilay.

Markii ay joogto qadiyadda beesha ama metelaada dadka ku heybta ah, Xaadoole wuxuu ku faanay in qof uga wanaagsan aysan jirin, isagoo sheegay in Sayid-cali ay ahaayeen qaraabo dhow, sidoo kalena uu u ahaa sarkaal militeri ah oo uu ku tashado, hadii cadow soo weerarana ka fujin kara.

Garnaqsigaas kadib, Xaadoole wuxuu faahfaahiyey sida loo xaliyey arrinta Taliye Sayidcali, wuxuu sheegay in ugu dambeyntii xalay uu Taliyaha NISA ogolaaday inuu diyo bixiyo, taas oo ah boqol geel ah.

Xildhibaanka ayaa sheegay in baaritaan la sameeyey lagu ogaaday in taliyaha ay dileen ciidan howlgal ku jira oo 31 nin ah, kuwaas oo amar heystay, isla markaana aysan jirin cid Sayidcali toos u toogatay ee goob is-rasaaseyni ay ka socotay uu ku soo baxay, sidaasna ay xabad ugu dhacday.

Xaadoole ayaa sheegay in 8 maalmood oo meydka sarkaalkaas uu qaboojiye ku jiray, iyaguna ay ku howlanaayeen cadaalad u raadintiisa, ugu dambeyntiina ay ku guuleysteen inay soo dhiciyaan magtiisa.