Sabti 13, Dec 2025 {HMC} Johan Forssell, Wasiirka Socdaalka Sweden, ayaa xaqiijiyay in dalkiisu sii wadi doono wada-shaqaynta uu la leeyahay Soomaaliya ee la xiriirta tarxiilka muhaajiriinta laga diiday magangalyada.

Wasiirku wuxuu sheegay in heshiiskaasi uu keenay natiijooyin wanaagsan, isla markaana aysan jirin wax qorshe ah oo lagu joojinayo, balse ay xukuumaddu rabto in ay sii ballaariso heshiisyadan, si loogu daro dalal kale.

Sida lagu sheegay xogta booliiska Sweden, ilaa bishii Nofeembar ee sanadkan, Soomaaliya waxay qaabishay 25 qof oo si qasab ah Sweden looga soo tarxiilay, kuwaas oo 14 ka mid ah loo tarxiilay sababo la xiriira dambiyo ay galeen,Tiradan ayaa si weyn u kordhay sanadihii u dambeeyay, iyadoo ay ka kacday 6 kiis sanadkii 2021, kuna gaartay 29 kiis sanadkii 2023.

Dhanka kale, dowladda Sweden ayaa wajahday dhaliilo xooggan kaddib markii warbaahinta qaarkeed ay shaaciyeen in ku dhowaad 100 milyan oo karoon oo ka mid ah kaalmada Sweden ay si toos ah u gaareen dowladda Soomaaliya, halka 5 milyan oo karoon oo kale oo ka yimid Wasaaradda Caddaaladda Sweden loo adeegsaday maalgelinta saddex shaqo oo ka tirsan xafiiska dowladda Soomaaliya.

Wasiir Forssell ayaa caddeeyay in shaqooyinkaas lagu maalgeliyo hay’adda Qaramada Midoobay u qaabilsan socdaalka (IOM), isla markaana ujeeddadoodu tahay dhisidda awoodda hay’adaha ka shaqeeya dib-u-celinta muhaajiriinta, Wuxuu beeniyay eedeymaha sheegaya in lacagahaasi ay ku dhacayaan “shaqaale magac u yaal” oo aan shaqo dhab ah qaban.

Isagoo ka jawaabaya su’aalo la xiriira musuq-maasuq, gaar ahaan maadaama Soomaaliya lagu tiriyo dalalka ugu musuq-maasuqa badan caalamka, wasiirku wuxuu sheegay in Sweden ay leedahay siyaasad dulqaad-la’aan ah oo ka dhan ah musuq-maasuqa, isla markaana aysan jirin caddeymo muujinaya in musuq ka dhacay arrintan.

Wuxuu intaa ku daray in tallaabo degdeg ah la qaadi doono haddii ay soo baxaan calaamado muujinaya musuq.

Gabagabadii Wasiir Forssell ayaa sheegay in xukuumaddu doonayso in kaalmooyin badan lagu xiro shuruudo la xiriira in dalalku aqbalaan muwaadiniintooda loo diiday joogitaanka Sweden, isagoo xusay in Sweden ay horay heshiisyo noocan oo kale ah ula gashay dalal kale.

Sabti 13, Dec 2025 {HMC} Ciidan gaar ah oo ka tirsan ciidanka Mareykanka ayaa qabtay markab ka soo baxay Shiinaha oo ku socday Iiraan , xilli uu marayay badweynta Hindiya meel aan ka fogeyn xeebaha Sri Lanka ,

kaasoo la sheegay inuu siday agab laga sameeyo hubka , waxay burburiyeen ciidankii Mareykanka dhammaan agabkii markabka uu siday, kadibna markabka waxay u oggolaadeen inuu safarkiisa sii wato, sida uu sheegay wargeyska Wall Street Journal oo xiganaya saraakiil Mareykan ah oo tilmaamay howlgalkan inuu dhacay bishii hore.

Sabti 13, Dec 2025 {HMC} Ruushka ayaa maanta sheegay inay Afrika wajahayso faragelin aan xad lahayn, taa oo lagu sheegay inay khatar gelinayso mustaqbalka qaaradda, sida uu baahiyay telefishinka Ruushka ee RT ,

Wasaaradda arrimaha dibadda Wadanka Ruushka usoo jeedisay ururrada Afrika sida Midowga Afrika inay qaataan doorkooda oo xal Afrikaan oo lagu raadinayo xalka dhibaatooyinka qaaradda, iyadoo si gaar ah loo xusay qalalaasaha ka taagan bariga dalka DR Congo oo salka ku haya awoodda lagu raadinayo xukunka dhulka macdanta leh, wuxuuna Ruushku sheegay in meel kasta oo khayraad ku jiro hadda ay wajahi karaan qalalaase aysan xakameyn karin.

Shiinaha iyo Mareykanka ayaa hadda isku ballaariya meelaha macdanta leh ee Afrika , halka uu Ruushka ka maqanyahay, maamulka dhulka macdanta leh ee qaaradda, balse wax kasta oo hadda ay wajahayso qaaradda wuxuu Ruushka ku sheegay arrin ugu dambeyntii dalalka gelin karta burbur ka dhalanaya muranka iyo qalalaasaha ay ku furayaan dalalka danaha ka leh oo doonaya inay xaaladda uga faa’iideystaan dhinacyo aan awood badan lahayn oo dano gaarka ah leh inay awood u siiyaan gacan ku heynta dhulka khayraadka leh, arrin hadda qaaradda ku fideysa.

Sabti 13, Dec 2025 {HMC} Madaxweynaha Masar, Cabdifataax Al-Sisi ayaa lagu warramayaa inuu diiday la kulanka Netanyahu, kaddib dadaallo uu Mareykanka ku doonayay inay kulmaan, iyadoo Al-Sisi uu ku xiray la kulanka Netanyahu inuu marka hore isbeddel ku yimaado hab dhaqankiisa,

isla markaana ka tanaasulo qorshaha uu wali doonayo ee Falastiiniyiinta in laga saaro marinka Qasa oo meelo ay Masar ka mid tahay loo barakiciyo, sida uu sheegay wargeyska Israa’iil ka soo baxa ee Times of Israel.

Sabti 13, Dec 2025 {HMC} Dalalka Ingiriiska, Turkiga , Norway iyo Japan ayaa warsaxaafadeed wadajir ah ugu baaqay Eritrea iyo Itoobiya inay ilaaliyaan heshiiskii nabadda ee labada dal oo sannadkii 2000 ay ku kala saxiixdeen dalka Aljeeriya , markaa oo la soo gabagabeeyay dagaal muddo socday oo labada dal u dhaxeeyay.

iyadoo sidoo kale dalalkan ay ku baaqeen in labada dal ay dhowraan madax bannaanida iyo wadajirka dhuleed ee midba midka kale , xilli ay sare martay xiisadda u dhaxeysa Eritrea iyo Itoobiya oo warbaahinta isku marinaya hadallo hanjabaad ah.

Sabti 13, Dec 2025 {HMC} Ciidamada Badda ee Puntland (PMPF) ayaa shaaciyay inay gacanta ku dhigeen doon siddey budooyin laga sameeyo walxaha qarxa, taas oo lagu qabtay xeebaha degmada Eyl ee gobolka Nugaal.

Qoraal rasmi ah oo ka soo baxay taliska PMPF ayaa lagu sheegay in howlgalkan uu ka dhacay kaddib kormeer iyo daba-gal ay ciidamada ka wadeen xeebaha Puntland, kadib markii la helay xog la xiriirta doon lagu tuhmayo inay waday agab sharci-darro ah.

Ciidamada ayaa sheegay in budooyinka la qabtay ay ka mid yihiin walxo loo adeegsado farsamaynta qaraxyada, kuwaas oo leh khatar iyo waxyeello ba’an haddii lagu guuleysto in la gaarsiiyo kooxo amni-darro ka shaqeeya. PMPF ayaa ku tilmaamay qabashada agabkan mid guul u ah dadaallada lagula dagaallamayo tahriibinta hubka iyo walxaha qarxa ee mara xeebaha Puntland.

Sidoo kale, taliska PMPF wuxuu xaqiijiyay in doonta ay saarnaayeen toddoba ruux, kuwaas oo labo ka mid ah ay u dhasheen dalka Yemen, halka shanta kalena ay yihiin muwaadiniin Soomaali ah. Dhammaan eedeysanayaasha ayaa hadda ku jira gacanta ciidamada, waxaana lagu wadaa in baaritaan dheeraad ah lagu sameeyo.

Ciidamada PMPF ayaa xusay in howlgallada lagu xaqiijinayo amniga xeebaha Puntland ay sii socon doonaan, iyagoo uga digay shabakadaha ku lugta leh tahriibinta hubka iyo walxaha qarxa inaysan meel ammaan ah ka heli doonin deegaanada Puntland.

Dhanka kale, mas’uuliyiinta amniga Puntland ayaa ku celiyay sida ay uga go’an tahay ka hortagga khatar kasta oo amni oo ka iman karta badda, iyagoo xusay in la adkeyn doono la shaqeynta hay’adaha kale ee amniga si loo sugo nabadda iyo xasilloonida guud ee gobolka.

Sabti 13, Dec 2025 {HMC} Xukuumadda Soomaaliya ayaa billowday kulamo xal loogu raadinayo xakamaynta abaaraha ka jira qaybo kamid ah Dalka, Ra’iisul Wasaare Xamsa Cabdi Barre ayaa maalmo gudahood kula kulmay wakiillo kala duwan oo danaynaya ka qaybgalka arrintaan.

Xamsa Cabdi Barre ayaa fadhi gaar ah la qaatay Safiirrada Dalalka Shiinaha, Ruushka, Qatar, Imaaraatka Carabta, Masar, Sacuudi Carabiya & Hay’ado kala duwan oo ka shaqeeya arrimaha Bani aadamnimada si ay qayb uga noqdaan u gurmashada Dadka abaartu saamaysay.

Wakiilladaan ayaa dhankooda ballanqaaday in ay xoogga saarayaan sidii gargaar bani aadamnimo oo degdeg ah ugu soo diri lahaayeen Soomaaliya si ay Dowladdu ugu qaybiyo ama u gaarsiiso dadka u baahan.

Koofurta, Bartamaha iyo Waqooyiga Soomaaliya waxaa ka jirta Abaar saamayn taban ku reebtay Dadka iyo duunyada, waxa ay qoysaska qaar billaabeen in ay isaga tagaan deegaannadooda si ay u raadsadaan meelaha ka nabadgalay abaartaas.

Sabti 13, Dec 2025 {HMC} DowladdaTurkiga ayaa si rasmi ah u bilowday dhismaha saldhigga hawada sare ee laga gano gantaallada iyo dayax-gacmeedyada, kaas oo markii ugu horreysay laga hirgelinayo gudaha Soomaaliya.

Tani waxay ku soo beegmaysaa xilli Ankara ay si xowli ah ugu socoto inay noqoto quwad kusoo biirta tartanka hawada sare ee caalamka.

Guddoomiyaha shirkadda Baykar, Selçuk Bayraktar, oo ka hadlayay shirkii Take Off İstanbul 2025, ayaa xaqiijiyay in mashruuca dhismaha saldhigga laga bilaabay meel uu ku tilmaamay mid “xeeb bad leh oo istaraatiiji ah” oo ku taalla Soomaaliya.

Bayraktar wuxuu yiri “Turkiga hadda waxay leedahay meel laga gano dayax gacmeedka, Meeshaas waxay leedahay dhul baaxadiisu dhan tahay 30 km x 30 km oo ku habboon hawlgallada hawada sare. Dunida oo dhan waxaa jira oo keliya 12 saldhig oo noocan ah.”

Wuxuu intaas ku daray in saldhigga ay wada isticmaali doonaan shirkado kala duwan oo Turkish ah, sida Roketsan iyo Baykar, isla markaana ay mustaqbalka qorsheynayaan in halkaas lagu duuliyo gaadiidka hawada sare ee ay soo saaraan.

Saldhigga cusub ayaa Soomaaliya ka dhigaya khariidadda hawada sare ee caalamka, iyada oo noqonaysa goob ku cusub gobolka oo ay isticmaali doonaan injineerro iyo khubaro Turkish ah. Waxa uu sidoo kale noqon karaa mashruuc kobciya iskaashiga labada dal ee dhinacyada teknoolojiyadda, ammaanka iyo maalgashiga.