Axad-21-April-2024 {HMC} Soddon sano ayaa laga joogaa markuu marxuum Cabdiramaan Axmed Cali (Tuur) yimid Muqdisho kuna baaqay in hab federaal uu yahay kan Soomaaliya dib loogu soo dhisi karo burburkii dowladdii dhexe kaddib. Tuur wuxuu la dhashay marxuum Maxamuud Axmed Cali oo ahaa aabbaha waxbarashada Soomaalida gaar ahaan gobollada Waqooyi. Xilligaas suurtaggal ma ahayn in hab federaal uu Soomaaliya uga hirgalo hab Waqooyi iyo Koofur waayo Muqdisho laba qeyb ayay u kala qeybsanayd; Cabdiraxmaan Tuur wuxuu la jiray Jeneraal Caydiid. Hadalkisii waxaa lagu tilmaamaay inuu colaad ka aloosay waqooyiga gaar ahaan beelihii taageeri jiray ururkii Dhaqdhaqaaqa Wadaniga Soomaaliyeed (Somali National Movement).

Mowqifka midnimada Soomaaliya ee Cabdiraxmaan Tuur wuxuu ku qotomay aqoonta uu u lahaa xiriirka caalamiga ah. Isagu muu la dhacsanayn go’aankii degdegga ahaa lagaga dhawaaqay Burco Maajo 18, 1991, kaasoo lagu shaaciyay in Waqooyiga Soomaaliya uu ka go’ay Soomaaliya inteeda kale. Wuu ogaa in go’aankaas kala goynta Soomaaliya aan la isku raacsanayn, uu xitaa ka hor imanayayay dastuurkii ururka SNM oo si cad u taageerayay midnimada dhuleed iyo siyaasadeed ee Soomaaliya. Marxuum Jaamac Maxamed Qaalib isaguna si la mid sidaas ayuu midnimada u aamminsanaa. Wuxuu aqoon u lahaa siyaasadda Geeska Afrika. Wuxuu qoray buug ku saabsan Soomaali Galbeed, oo uu ku soo bandhigay xogo aan hore loogu adeegsanin qoraallo taariikheed, ku saabsan sida had iyo jeer Xabashidu uga dadaadili jirtay in la tirtiro jiritaanka qaranka Soomaaliyeed.

Qaalib iyo Tuur waxay u soo taagnaayeen xilli Xayle Salaase doonayay in Waqooyiga Soomaaliya lagu biiriyo Itoobiya. Tuur danjire ayuu ahaa; Qaalib madax sirdoon dowladdii rayidka ayuu noqday; xilligii dowladdii kacaanka taliyaha ciidanka booliska iyo wasiirkii horumarinta miyiga ayuu soo noqday. Wargeysyadii ka soo bixi jiray Hargeysa kontomaadkii qarnigii 20aad ayaa gaashaanka u duruuray himiladii gurracnayd ee Xayle Salaase. Indheergaradka siyaasadeed ee Hargeysa xilligaas waxay lahaayeen garasho siyaasadeed oo aad u sarreysa kaddib markii Ingriisku ku ballan-furay beelihii Soomaaliyeed uu heshiiska ilaalinta la saxiixday. Ingiriisku wuxuu dhul Soomaalidu ku nooshahay 1954kii si sharcidarro ah ugu wareejiyay Xabashida (Imbradooriyaddii Itoobiya), oo waxaa laga qoray buugag sida The Betrayal of Somalis iyo The Somali Dispute.

Waxyaabaha Tuur iyo Qaalib ogaayeen waxaa ka mid ah in qarannimadu tahay tiir adag oo ilaaliya xuquuqda shucuubta. Tan labaad taageerada ay u muujiyeen qarannimada iyo midnimada Soomaaliyed waxay ku salaysanayd taageerista xaqa qofka Soomaaliyeed u leeyahay dhowrista naftiisa iyo hantidiisa iyo inuu dalkiisa hooyo meeshuu doono kaga noolaan karo. Intaas haddii la waayo ma jirayso qarannimo Soomaaliyeed oo laga hadlayo: haddii qof sheegto inuu magaalo qof kale oo Soomaaliyeed kaga awood-badan yahay, wuxuu doono samayn karo oo aan lala xisaabtami karin, fursadaha dhaqaalaha ka hor istaagi karo qof kale, maleeshiyo beeleed ugu awood-sheegan karo qof kale oo Soomaali ah xaaladdu kama duwana gumeysigii oo kabo loo tolay (Soomaalida ayaa ku maahmaahda waa kudkii oo kabo loo tolay markay arkaan wax ka sii daran wax kale).

Soddon sano kaddib Soomaalidu waxay isa su’aalaysaa sababaha weli isu awood-sheegasho maleeshiyo beeled iyo ciidamo dhinac-ka-raran ay weli halis ugu yihiin xuquuqda qofka Soomaaliyeed. Ma siyaasiyiita Soomaaliyeed ayaa sidan ku heshiiyay mise aamusnaantooda ayaa mas’uul ka ah in sooyaalkii qabqablayaasha aan weli xiddida loo siibin? 2024 sidii 1994 Waqooyiga Soomaaliya waxaa ka taagan colaado u loogi kara dhulka Soomaaliyeed cadaw muddo u hanqal-taagayay. Marxuum Tuur iyo Marxuum Qaalib way ogaayeen in haybta siyaasadeed ee Soomaalida (the Somali political identity) aan la hoosgeyn karin hayb beeleed. Qaranka Soomaaliyeed ilaalintiisa naf iyo maal baa loo huray. Wax hunguri la siisan karo ma aha.

Axad-21-April-2024 {HMC} Itoobiya ayaa sheegtay inay ka go’an tahay fulinta is-afagaradkii ay la gashay Somaliland, islamarkaana carada dowladda federaalka ee arrintan ku aadan ay tahay wax aan dhaafsiisneyn dib u dhaca ku-meel gaar ah.

Hadalkan ayaa waxaa sheegay Abdulaziz Ahmed Adem, oo ah la-taliyaha sare ee hay’adda Sirdoonka iyo Nabad-Sugidda Qaranka (NISS), sidoo kalena la-taliye u ah Wasaaradda Arrimaha Dibedda.

Waxa uu hadalkan ka jeediyey shir ku saabsanaa amniga gobolka Geeska Afrika oo uu soo abaabulay Machadka Arrimaha Dibedda, kaasi oo ka dhacay Skylight Hotel Addis-Ababa, 19-kii April.

Abdulaziz ayaa ku dooday in helitaanka Itoobiya ee marin badeed ay sahli karto kobaca wadajirka ah ee Itoobiya, iyo Soomaaliya oo leh xeeb dhererkeedu dhan yahay 3,000 oo kilomitir.

Abdulaziz waxa uu ku tilmaamay diidmada Muqdisho ee heshiiska Itoobiya ay la gashay Somaliland inay tahay “dib u dhac,” isagoo ku macneeyey isku day ay dowladda federaalka ku weecineyso caqabadaha siyaasadeed ee ka haysta gudaha Soomaaliya, sida uu hadalka u dhigay.

Wuxuu sheegay in Itoobiya ay sii wadi doonto heshiiska, oo qeyb ka ah sida ay uga go’an tahay is-dhexgalka gobolka.

“Itoobiya waxay soo dhawaynaysaa dadka ka socda dhammaan dalalka deriska ah, gaar ahaan Soomaaliya,” ayuu yiri. “Waa u muhiim labada waddanba inay u midoobaan kooxaha argagixisada loo aqoonsaday sida Al-Shabaab, Daacish iyo kuwa dadka tahriibiya. Haddii aan si wadajir ah u shaqeyno, waan horumari karnaa oo aan ka gudbi karnaa caqabadaha, intii aan ka hortagi lahayn heshiis aan la joojin karin,” ayuu yiri Abdulaziz.

Waxa uu ugu baaqay dalalka gobolka inay ahmiyadda siiyaan iskaashiga iyo barwaaqada, wuxuuna dib u xaqiijiyey in Itoobiya ay ka go’an tahay nabadda iyo wada-shaqeynta dalalka deriska la ah.

Abdulaziiz waxa uu xusay kaalmaynta milatari ee Itoobiya ay ka geysatay dadaallada nabad ilaalinta ee Suudaan iyo Soomaaliya.

Wuxuu ka digay ka bixitaanka ciidamada Itoobiya ee Soomaaliya, isagoo carrabka ku adkeeyay inay halis ku keeni karto Itoobiya iyo sidoo kale gobolka oo dhan.

“Ciidankeenu wuxuu Soomaaliya u sameeyey naf-hurnimo la taaban karo, haddii ay ahaan lahayd xudduudaheeda iyo nabadda. Waxaa naga go’an inaan horumarino xiriir nabadeed oo aan la yeelanno deriska, waxaana diyaar u nahay inaan sameyno dadaallo dheeraad ah oo ku aaddan yoolkan. Waa lama huraan in iyaga iyo kuwa kaleba ay ogaadaan sida aan ugu heellan nahay arrimahan,” ayuu yiri.

Heshiiska is-afgaradka, oo ay Janaayo 1, 2024 kala saxiixdeen Ra’iisul Wasaare Abiy Axmed iyo Madaxweynaha Somaliland Muuse Biixi, ayaa dhaliyay dood weyn oo heer gobol iyo mid caalami ah.

Abiy Axmed ayaa horay u carrabka ugu adkeeyay in Itoobiya ay muhiim u tahay inay hesho marin badeed, arrintaas oo sii xoojisay xiisadda ka taagan Geeska Afrika.

Axad-21-April-2024 {HMC} Mareykanka ayaa si dhaqso ah u billaabaya inuu ciidankiisa kala baxo dalka Niger, kaddib markii militariga afgambiga dalkaa kula wareegay July 2023 , ay tirtireen dhammaan heshiisyadii dalkaa uu kula jiray Mareykanka , iyagoo markaa soo saaray go’aan ay Niger , uga saarayaan Mareykanka .

In ka badan kun askari oo Mareykan ah ayaa baxaya.

Hoggaamiyayaasha militariga Niger, markii ay qaateen go’aanka ay isaga fogeynayaan Mareykanka iyo reer galbeedka , waxay u dhaqaaqeen dhanka Ruushka oo ay ku wareejin doonaan saldhigyada uu ka baxayo Mareykanka.

Nidaamka dunidda ee waqtigan ayaa dawladaha ku qasbay inay wajiga saaraan dalalka quwadda leh.

Laakin miyay habboontahay si aan kala har lahayn in ajaaniib la isugu dhiibo?

Afrika, waa garoon lagu baratamo iyo goob wax-soosaarkeeda dunidda kala ay ka faa’iideysato, sababtana waa nidaamyada ayaa isku dhiiba dalalka kale , taa beddelkeeda waxaan doorbidi lahaa Afrikanka inay diyaariyaan siyaasaddo maamulka u madax banneenayna iyagoo awoodaha ay raadinayaan heshiisyo kala sooc ah la galaya. Hadda Afrika waxaa laga xiiseynaya oo galbeedka isku ballaariyay Ruushka ,

laakin ma aha dal waxtar u leh dunidan , waa dal go’doon caalami ah ku jira oo nidaamkiisa difaaca kuma siinayo horumarin dhaqaale iyo bulsho, kaliya waxa uu uga duwan yahay Mareykanka iyo galbeedka ayaa ah inuusan doonayn calaacal dhexdeed inuu kugu xukumo, waxaa kalo Ruushka loo doorbidaya inuu xorriyad u siinayo hoggaamiyaasha Afrikanka inay xukunka si awood leh u haystaan oo ay joogi karaan illaa dhimashadooda.

Axad-21-April-2024 {HMC} Guddiga Xiriirka Dibadda ee Aqalka Wakiillada iyo Senate-ka Mareykanka ayaa ugu baaqay Biden inuu go’aan ka gaaro in cunaqabateyn lagu soo rogo Ciidamada RSF ee Sudan iyo hoggaamiyahooda Mohamed Hamdan Dagalo.

Haddii Mareykanka soo saaro cunaqabateynta RSF, markaa Imaaraadka ayaa ku qasbanaan doona inuu joojiyo taageerrada uu siiyo, waxa xigana waa inay noqdaan RSF jabhad burburta oo dib isugu dayda si ay u noolaadaan inay ku dhaqaaqan dhac iyo ficil kasta oo ka fog xasillooni.

Dalka Sudan hadda waxay gashay burbur ay wax walba ku wayday, dalkaanna waqti ayay ku qaadanaysa inuu dib usoo celiyo nidamkiisa, sababto ah jeneraalo ayaa iyagoon xisaabin waxa xiga waxay ku dhaqaaqeen afgambi, iyaga ayaa haddana gacmahooda ku burburiyay dalkii oo dhan. Runtii waxaan is waydiiya,

Sidee ayay hal waddo oo isku mid ah u qaadeen jeneraaladii Soomaaliya iyo Sudan , si ay dalkooda u burburiyaan? Ma waxaa jirta istiraatijiyad qoran oo qayb ka ah hababka lagu dhaliyo in dal nidaamkiisa lagu tirtiro?

Axad-21-April-2024 {HMC}  Faah-faahinno dheeraad ah ayaa ka soo baxaya howlgallo ay jiinka wabiga Jubba ee nawaaxiga degmada Jamaame ka wadaan ciidanka Kumaandoska Danab iyo kuwa Jubbaland ee Guutada gurmad Qaran.

Wararka ayaa ayaa sheegaya in ciidanku weeraray godod ay difaac kaga jireen kooxda Al shabaab kadib hawlgallo aan kala joogsi lahayn oo ay ciidamadu maalmihii u dambeeyey ka samaynayeen deegaanno dhaca jiinka wabiga Jubba, gaar ahaan tuulooyinka ku teedsan degmada Jamaame ee gobolka Jubbada hoose.

Howlgalkan ayaa waxaa al shabaab looga dilay in ka badan 50 dagaalyahan halka intaas in Ka badana lagu dhaawacay sida ay sheegeen saraakiisha horkaceysa.

Waxaa kaloo howlgalkan lagu qabtay tiro maxaabiis ah, ciidama ayaana fashiliyay tiro minoyin oo lagu talagalay in lagu dhibaateeyo dadka shacabka ah.

Howlgalkaan oo socday maalmihii la soo dhaafay ayaa ciidamadda dowladdu waxaa ay ku qaarajiyeen saraakiil muhiim u ahaa al shabaab waxaana ka mid ah, Caana-Nuug iyo Sheekh Nuur oo kooxdaas u qaabilsanaa miinada iyo sarkaal kale oo lagu magacaabo Sheekh Xuseen.