Khamiis 27, Nov 2025 {HMC} Wasiirka Gaashaandhigga ee Jamhuuriyadda Federaalka Soomaaliya, Axmed Macallin Fiqi, ayaa xafiiskiisa ku qaabilay Safiirka Boqortooyada Sacuudi Carabiya ee Soomaaliya, Axmed Bin Maxamed Al-Muwallad.

Qoraal ka soo baxay Wasaaradda Gaashaandhigga ayaa lagu sheegay in Wasiir Fiqi uu ku bogaadiyay doorka muhiimka ah ee Boqortooyada Sacuudi Carabiya ee ku aaddan taageerada Soomaaliya, gaar ahaan dhinacyada difaaca, la dagaallanka Al-Shabaab, iyo mashaariicda lagu horumarinayo awoodda Ciidamada Qalabka Sida.

Safiirka Boqortooyada Sacuudi Carabiya ee Soomaaliya, Axmed Bin Maxamed Al-Muwallad ayaa dhankiisa uga mahaceliyay Wasiirka Gaashaandhigga ee Jamhuuriyadda Federaalka Soomaaliya, Axmed Macallin Fiqi soo dhaweentiisa ee Xafiiska.

Boqortooyada Sacuudi Carabiya ayaa Soomaaliya ka fulisa mashaariic horumarineed oo ku saabsan dhanka arrimaha Bani’aadannimada, kaabayaasha dhaqaalaha, iyo waxbarashada.

Khamiis 27, Nov 2025 {HMC}  Guddoomiyaha Golaha Shacabka, Shiikh Aadan Maxamed Nuur (Madoobe), ayaa maanta shir guddoomiyey kulanka Guddiga Joogtada, kaas oo ka qabsoomay xarunta guddoonka iyo guddiyada Baarlamaanka ee Villa Hargeysa.

Guddoomiyaha ayaa ka warbixiyay shuruucda horyaalla Baarlamaanka, iyo sidoo kale la xisaabtanka wasaaradaha iyo hay’adaha dowladda,

Sidoo kale, Guddomiyaha ayaa guddiga la wadaagay faahfaahin ku saabsan shirkii Guddoomiyaasha Baarlamaannada Urur Goboleedka Bulshada Bariga Afrika ee Kampala ka dhacay, halkaas oo Soomaaliya loogu doortay shir-guddoonka guddoomiyaasha baarlamaanada ururka.

Waxaa sidoo kale lagu go’aamiyay in Soomaaliya ay martigeliso shirka Guddoomiyaasha Baarlamaannada Urur Goboleedka Bulshada Bariga Afrika bartamaha sanadka 2026.

Ugu dambeyn, Guddoomiyaha Golaha Shacabka ayaa ku boorriyey guddiyada in ay sii dardar geliyaan ka shaqeynta shuruucda horyaalla, ayna golaha u soo gudbiyaan si waajibaadka sharci dejinta dalka loo hormariyo.

Khamiis 27, Nov 2025 {HMC}  Dowladda Federaalka Soomaaliya ayaa maanta si rasmi ah u dhaqan-gelisay nidaamka cusub ee ETA oo lagula soconayo dhammaan socdaalka iyo dadka duulimaadyada caalamiga ah ku imaanaya gudaha Soomaaliya.

Nidaamka cusub ayaa shirkadaha diyaaradaha ku amraya in aysan soo qaadi Karin qof aan heysan oggolaanshiyaha Dowladda Federaalka iyo Nidaamka E-visa.

Baaritaanka ETA-da ayaa noqonaya mid toos ah oo laga hubinayo rakaabka ka hor inta aysan ka soo duulin garoomada caalamiga ah.

Sidoo kale, nidaamka ayaa qorshahiisa yahay in lagu ilaaliyo amniga guud ee dalka gaar ahaan si looga taxadaro nabad galyo darro.

Tallaabadan waxay imaaneysaa xilli Somaliland iyo Puntland ay horey u muujiyeen diidmo ay kaga soo horjeedaan nidaamka e-visa-ha federaalka, in ay si madaxbannaan u maamulanayaan Hawada.

Khamiis 27, Nov 2025 {HMC}  Dowladda Soomaaliya ayaa sheegtay in ciidanka Hay’adda Sirdoonka iyo Nabadsugidda Qaranka ee (NISA) ayaa gacanta ku dhigtay shabakad ka kooban 11 ruux, kuwaas oo lagu eedeeyay in ay falal amni darro ah ka geysteen magaalada Muqdisho, iyo deegaanno ka tirsan labada Shabeelle.

Warkaan oo ka soo baxay Hay’adda NISA, isla markaan lagu faafiyay warbaahinta dowladda ayaa lagu yiri, “NISA ayaa gacanta ku dhigtay shabakad Khawaarij ah oo ka kooban ilaa 11 dhagar-qabe, kuwaas oo ku howlanaa falal argagixiso isla markaana ku dhuumaaleysanayay Muqdisho iyo deegaanno ka tirsan Gobollada Shabeellada Hoose iyo Shabeellada Dhexe.”

Sidoo kale warsaxaafadeedka ka soo baxay Hay’adda ayaa lagu yiri, “Dhagar-qabeyaashan ayey Khawaarijtu u soo diyaariyeen inay fuliyaan shirqoollo argagixiso, basaasnimo, iyo inay isku dhex qarin karaan shacabka, Ciidanka Sirdoonka Qaranka oo hayay xogtooda oo dhammeystiran ayaa mid mid u soo qabtay xilli ay qaarkood gacanta kula jireen fal-dambiyeedyo argagixiso.”

NISA ayaa sheegtay in xubnahaan loo gudbin doonaa hay’adaha ku shaqada leh, si looga qaado tallaabada ku habboon. Sidoo kale Hay’adda ayaa muwaadiniinta ugu baaqday in la soo wadaagaan wixii khatar amni oo ay la kulmaan.

Magaalada Muqdisho iyo deegaannada ku hareersan ayaa laga dareema amni ay kaalin wanaagsan ka qaateen ciidanka amniga gaar ahaan Hay’adda NISA, oo ciidamado ku labisan dareeska Hay’adda lagu arkayay badi waddooyinka caasimadda.

Mustaqbal