Jimco 28, Nov  2025 {HMC}Warar dheeraad ah ayaa kasoo baxaya shil gaari oo saakay aroortii hore ka dhacay Isgoyska Jubba ee magaalada Muqdisho, kaasoo sababay khasaare isugu jira dhimasho iyo dhaawac.

Shilkan ayaa yimid kadib markii gaari nooca xamuulka qaada ah oo kasoo baxay dekada weyn ee Muqdisho uu ku dhacay Mooto Bajaaj mareysay wadada oo ay saaranayeen sadax ruux.

Sadaxda ruux ee saarna Bajaajta ayaa la xaqiijiyay in mid ka mid ah uu geeriyooday, iyadoo labada ruux ee kale uu soo gaaray dhaawac culus, kuwaas oo loo qaaday xarumaha caafimaadka magaalada Muqdisho.

Wararku waxay intaasi ku darayaan in darwalkii waday gaariga Xamuulka ah uu isaga baxday goobta uu shilka ka dhacay, islamarkaana haatan ay baadi goob ugu jiraan ciidamada amaanka sidii ay gacanta ugu soo dhigi lahayeen.

Shilkaan saakay ka dhacay Isgoyska Jubba ayaa sababay in mudo kooban uu xirmo dhaqdhaqaaqii isku socodka wadadaas, waxaana xusid mudan shilalka noocan oo kale ah inta badan loo sababeeyo khibrad yarida darawalada qaar oo gaadiidka si xad dhaaf ah u kaxeeya, taasina ay keento inay lumiyaan xakamaynta gaariga marka ay wajahaan xaalado halis ah.

Khamiis 27, Nov  2025 {HMC} Diyaarad aan duuliye lahayn ayaa lagu qarxiyay ceelka gaaska Khormor ee ku yaalla gobolka Kurdistaan ee dalka Ciraaq , iyadoo weerarka uu dhacay xilli marxalad xasaasi ah ay ku jirto Ciraaq oo ay socdaan dadaallada lagu soo magacaabayo Ra’iisul wasaaraha cusub , kaddib doorashadii dhawaan ka dhacday Ciraaq.

Laakin muxuu salka ku hayaa weerarka ka dhacay ceelka Khormor?

Weerarkan wuxuu dhaliyay in isla markiiba ay istaagaan dhammaan sahaydii gaaska u socday warshadaha korontada ee gobolka, taas oo saameyn ku yeelatay ku dhowaad sideetan boqolkiiba korontada Kurdistaan.

Weerarkani ma ahayn mid cusub, waayo marar hore ayaa isla goobtan lagu qaaday weerarro ay fuliyeen kooxaha Shiicada Ciraaq, kuwaas oo loo arkay inay si hoose uga amar qaataan Tehran.

Dhacdadu waxay ku soo beegantay xilli dawladda cusub ee Ciraaq laga wadahadlayo, taas oo ka dhigaysa in weerarka loo qaadanayo farriin siyaasadeed. Todobaadkan, Nouri al-Maliki oo ka mid ah magacyada la hadal hayo ee noqon kara ra’iisul wasaaraha Ciraaq ayaa booqday Kurdistaan, wuxuu la kulmay Masu‘ud Barzani.

Waxaa suuragal ah in kooxo doonaya inay carqaladeeyaan wadahadalkaas inay beegsadeen Khormor, si Barzani loogu cadaadiyo go’aanno ku saabsan qaabka lagu dhisayo dawladda cusub. Waxaa kaloo macquul ah in kulankii Maliki iyo Barzani aanu si fiican u dhamaan, weerarkana uu yahay mid ka dhashay khilaaf qarsoon oo labada dhinac u dhexeeya.

Dhanka kale, ceelka gaaska ee Khormor waxaa iminka maamula shirkad laga leeyahay Imaaraadka Carabta oo guulo muuqda ka gaartay kordhinta tamarta gobolka, ilaa heer sahayda korontada ay ku dhowdahay inay noqoto mid si buuxa ugu filan baahida gobolka.

Arrintani waxay keentay in su’aalo la iska weydiiyo cidda ka soo horjeeda maalgashiga Khaliijka ee Kurdistaan inuu guuleysto, iyo in dadka qaarkood aysan dooneyn in Ciraaq yareyso ku-tiirsanaanta gaaska Iiraan.

Waxaa u muuqata in weerarku u yahay farriin laba-geesood ah; mid lagu cadaadinayo Barzani marka uu go’aamada dawladda cusub lagu dhisayo qaadanayo, iyo mid lagu tusayo Imaaraadka in saameyntooda dhaqaale ee Kurdistaan aysan cid walba u farxad gelin.

Marka la isku wada daro, tilmaamaha ugu waaweyn waxay muujinayaan in weerarka ay ka dambeeyeen kooxo gudaha Ciraaq ka dhisan oo leh xiriir dhow oo siyaasadeed iyo mid amni oo ay la leeyihiin Iiraan, kuwaas oo aan doonayn isbeddel ku yimaada dhaqaalaha Kurdistaan, hadday noqon lahayd awood siyaasadeed oo Barzani helayo ama madaxbannaani dhaqaale oo ka imaanaysa maalgashiga Khaliijka.

Xigasho Iman Jamac

Khamiis 27, Nov  2025 {HMC} Trump ,wuxuu bartilmaameed soo noq noqda ka dhigtay Soomaalida deggan gobolka Minnesota, oo mar kale uu hadda ku sheegay inay lunsadeen malaayiin doollar si sharci darro ah , sidoo kalena ay wax u dhimayaan amniga Minnesota, mar kasta oo bulshada Soomaalida uu ka hadlayo waxaa kaloo uu ku soo daraa nidaamka dawladeed ee Soomaaliya oo uu ku sheego mid aan waxba ka jirin.

Hadalladan soo noq noqda kama marna arrimo siyaasadeed oo isugu jirta cadaadis iyo cabsi gelinta cod bixiyaasha Soomaalida , halka uu sidoo kale hadalladiisa ugu muujinayo xagjirka Mareykanka inuu yahay hoggaamiye dalkooda ka ilaalinaya soogalootiga sharci darrada ah, kuwa ku xad-gudbaya shuruucda iyo maaliyadda. Mana aha wax iska dhacaya ee waa culeys ay Soomaalidu leeyihiin.

Marka ay timaaddo waxa ay tahay in ay sameeyaan Soomaalida Mareykanka , waa inaysan Soomaalida Mareykanka ku koobnaan falcelin baraha bulshada, balse waxay u baahan yihiin inay yeeshaan hoggaan matala, oo si toos ah ugu jawaaba siyaasiyiinta hadallada ka dhankaga ah jeediya, kana qayb qaata doodaha warbaahinta Mareykanka.

Haddii aadan is matalin, cid kale ayaa kuu matalaysa, badankoodna waxay kuu sawiri doonaan si xun. Waa in bulshada Soomaaliyeed ee Mareykanka ay xoojiyaan xiriirka ay la leeyihiin Congress-ka, Senate-ka iyo siyaasiyiinta kale ee Mareykanka, si ay u noqdaan bulsho leh saaxiibo siyaasadeed oo difaaci kara marka ay la kulmayaan cadaadiska.

Waxaa la jooga marxalad uga baahan jaaliyadda Soomaalida feejignaan iyo isku xirnaan, tamarta badan ee ay ku bixin jireen isku soo baxyada maamul gobolleedyada iyo qabiilka waa inay markan mideeyaan oo ay diiradda saaran sidii ay u buuxin lahaayeen daldaloolada sharci ee lagu heli karo iyo isku diyaarin difaac sharci, sababtoo ah waxaa cad markan Trump inuu indhaha ku hayo Minnesota oo la arki karo tallaabooyin aysan horey u xisaabin Soomaalida kala qeybsan oo iyadoo aan la kala soo ceyn ay wajihi karaan cawaaqib aan la mahdin.

Marka laga hadlayo bahdilka iyo aflagaadada ka dhanka ah Soomaaliya , waa wax uga baahan dawladda Soomaaliya inay siyaasad ka yeelato, waa wax cad inaysan Soomaaliya ku dhiirran karin tallaabooyin ama xataa habab diblomaasiyadeed oo adag ,laakin hadana waxaa u furan safaaradda Soomaaliya ee Washington inay la shaqeyso ururrada Soomaalida si ay u diyaariyaan warbixin rasmi ah oo muujinaysa horumarka Soomaaliya, amniga Muqdisho, iyo dadaallada dawlad-dhiska.

Khamiis 27, Nov  2025 {HMC} Wasiirka Gaashaandhigga ee Jamhuuriyadda Federaalka Soomaaliya, Mudane Axmed Macallin Fiqi, ayaa xafiiskiisa ku qaabilay Safiirka Boqortooyada Sacuudi Carabiya ee Soomaaliya, Mudane Axmed Bin Maxamed Al-Muwallad.

Wasiir Fiqi ayaa bogaadiyay doorka muhiimka ah ee Boqortooyada Sacuudi Carabiya ee ku aaddan taageerada Soomaaliya, gaar ahaan dhinacyada difaaca, la dagaallanka argagixisada, iyo mashaariicda lagu horumarinayo awoodda Ciidamada Qalabka Sida ee dalka, taasoo gacan ka geysaneysa xasiloonida Soomaaliya, ilaalinta nabadda iyo amniga gobolka.