Isniin-December-11-2023-{HMC} Wasiirka Arrimaha Dibadda Soomaaliya Mudane Abshir Cumar Jaamac ayaa shalay magaalada Doha kulan kula qaatay wasiiru dowlaha Arrimaha Dibadda ee dalka Qatar Mudane Dr. Mohamed Abdulaziz Al-Khulaifi.

“Waxaan ka wada hadalnay xoojinta xiriirka Diblumaasiyaddeed ee labadeena dal iyo kor u qaadidda iskaashiga naga dhaxeeya ee dhinacyada badan leh,” ayuu yiri wasiir Abshir Cumar Jaamac.

Wasiirka Arrimaha Dibadda Xukuumaadda Federaalka Soomaaliya Abshir Cumar Jaamac iyo Wasiiru dowlaha Arrimaha Dibadda ee dalka Qatar, ayaa si gaar ah isula soo qaaday shirka Arrimaha ammaanka Soomaaliya ee Maraykanka todobaadkaan ka furmaya, kaas oo Qatar ay ka mid tahay shanta dal ee Soomaaliya gacan siinaya.

Kulanka labad mas’uul waxaa goobjoog ka ahaa danjiraha cusub ee dowladda Federaalka Soomaaliya ee dalka Qatar Amb Dr Maxamed Axmed Doodishe iyo ku-xigeenka safiirka Ruun Siciid Qoorsheel.

Isniin-December-11-2023-{HMC} Ku-Xigeenka Xoghayaha Guud ee urur gobaleedka IGAD Mudane Maxamed Cabdi Waare oo dhawaan xilka loo magacaabey ayaa warbaahinta Qaranka u faahfaahiyey muhiimada kursiga loo magacaabey iyo sidey Soomaaliya ugu suura gashey madaxda ugu sareysa IGAD in ay ka mid noqoto.

Madaxweynihii hore ee dowlad gobaleedka Hirshabeelle Maxamed Cabdi Waare ayaa sheegay in booskaan Soomaaliya ay u tahay boos muhiim ah, isaga oo carabka ku dhuftay xilka loo magacaabay in ay markii ugu horreysay qof Soomaali ah uu jagadaas qabto.

Mr Waare oo ka hadlay sida magacaabistiisa ku timid ayaa yiri, “Kursigaan looma tartamin, shirkii IGAD ee lagu qabtay Jabuuti bishii June ayaa lagu go’aansaday in kursigaas Soomaaliya la siiyo, maadaama Soomaaliya ay ahayd waddadamii lagu aasaasay ururka weli aysan ka qaban kursigaas, marka waa laysla gartay, todobada madaxweyne ee markaas joogay ayaa isla gartay.”

Madaxweynihii hore ee dowlad gobaleedka Hirshabeelle Maxamed Cabdi Waare oo maalin ka hor loo magacaabay Ku-Xigeenka Xoghayaha Guud ee urur gobaleedka IGAD ayaa xusay in xilkaan Soomaaliya muhiimad gaar ah u leeyahay, isaga oo sheegay in ay ka soo dhalaali doonta kaalinteeda.

Wasiir dowlihii hore ee Wasaaradda Maaliyadda Xukuumadda Federaalka Soomaaliya Prof. Cabdullaahi Qaloocow oo la hadlay warbaahinta Qaranka ayaa bogaadiyey sida dowladda Soomaaliya ay la soo laabatay jagooyinkii muhiimka ahaa ee ka maqnaa.

“Waan ku boggaadineynaa Dowlada iney lasoo laabato jagooyinkii muhiimka ahaa ee kaga maqnaa ururada iskaashigu nagala dhexeeyo,Mudane Waarana waa nin waayo arag ah oo horey ulasoo shaqeeyey Hay’addo waaweyn,” sida uu yiri Wasiir Qaloocow.

Madaxweynaha Jamhuuriyadda Federaalka Soomaaliya Dr. Xasan Sheekh Maxamuud ayaa soo jeedin uu u sameeyey madaxda dalalka ururka gobaleedka IGAD in Mr Maxamed Cabdi Waare loo magacaabo booska Ku-Xigeenka Xoghayaha Guud ee urur gobaleedka IGAD.

Isniin-December-11-2023-{HMC}  Guddomiye ku xigeenka Hay’adda Maareynta Musiibooyinka Qaranka Dr Axmed Cabdi Aadan ayaa maanta Guddoomiyey kulan gaar ah oo ka qabsoomay xarunta dhexe ee SoDMA, kaas oo u dhaxeeyay hay’adda SoDMA iyo Machadka Caafimaadka Qaranka oo uu hoggaaminayey Agaasimaha guud ee Machadkaas Dr Xuseen Abuukar Muxuddiin.

Kulankan ayaa looga hadlay xaaladda beni’aadannimo iyo tan Cafimaad ee ka dhalatay fatahaadaha cimilada El-Niño, xoojinta dedaallada samata-bixinta iyo sidii dhinacyadu isaga kaashan lahaayeen ka jawaabista khataraha iyo u gurmashada dadka nugul iyo wadaagista xogaha Cafimaadka iyo xoojinta wada shaqeeynta labada dhinac.