Jimco Nofembar 24, 2023 {HMC} Waxaa maanta oo Jimco ah lagu wadaa in uu si dhab ah u dhaqangalo heshiiska maxaabiis is dhaafsiga ah ee Xamaas iyo Israaiil ay todobaadkaan ku gaareen Magaalada Dooxa Caasimadda Dalka Carbeed ee Qatar si loo helo xabbad-joojin waqti kooban ah

Xamaas waxa ay maanta sii deyneysaa Maxaabiis ay kasoo qafaalatay Yuhuudda oo gaaraya 13 ruux oo dhammaantood ah Haween & Carruur waxaana dhankooda loosii daynayaa Dad kale oo Ciidanka Israaiil ay ka afduubteen Magaalada Gaza

Israaiil ayaa ku qasban fulinta heshiiskaan iyada oo ugu horreyn xabbad-joojinta dhaqangelisay aroornimadii hore ee Jimcaha Maanta si loo helo marin nabadgalyo ah oo suuragelin kara in la adkeeyo wada-xaajoodka labada dhinac

Qaabka Maxaabiista loo kala wareejinayo ayaa lagu sheegay in Xamaas ay keeneyso kaddib Israaiil ay sii deyneyso iyada oo ay soo gudbineyso liiska Dadka ay hayaan sida lagu sheegay war uu daabacay Teleefishinka Aljazeera

Xamaas ayaa Maxaabiista Yuhuudda ah waxa ay geyneysaa Marinka Rafax ee ah Xuduudda Magaalada Gaza ay la wadaagto Jamhuuriyadda Carabta Masar maadaama Israaiil ay ku kalsoon tahay dhinaca Xukuumadda Qaahira

Taliyaha Ciidanka Sirdoonka Yuhuudda ayaa dalbaday in Xamaas ay soo hormariso Liiska Magacyada Dadka ay sii deyneyso si ay waalidiintooda iyo ehelkooda ay ugu wargeliyaan si ay u tagaan goobaha caafimaad ee lagu hubinayo

Mareykanka ayaa sheegay in keliya Xamaas aanay gacanta ku heyn Maxaabiista Yuhuudda balse loo baahan yahay in wadahadalka uu qayb ka noqdo Ururka Islaamik Jihaad si loo dhammeystiro heshiiska Maxaabiistaas lagu sii deynayo.

Jimco Nofembar 24, 2023 {HMC} Xukuumadda Somaliland ayaa ka hadashay warka kasoo baxay dowladda Itoobiya ee ay ku sheegtay inay kula jirto wada-hadallo ku saabsan dekedda magaalada Berbera

Wakaaladda wararka Itoobiya ee ENA ayaa wasiirka gaadiidka iyo saadka Dr. Alemu Sime kasoo xigatay in wada-hadalladaas ay marayaan meel wanaagsan

Isaga oo xusaya in Itoobiya ay 95% badeecadaha ay lasoo degto iyo kuwa ay dhoofiso u isticmaasho dekedda Jabuuti, wasiirka ayaa sheegay inay socdaan dadaallo lagu raadinayo dekedo kale, islamarkaana ay meel wanaagsan marayaan wada-hadallada ku aaddan isticmaalka dekedda Berbera, sida ay sheegtay EPA

Isaga oo ka jawaabaya ayaa wasiirka arrimaha dibadda ee xukuumadda Somaliland Dr. Ciise Kayd wuxuu ku adkeystay in aysan waxaba ka jirin sheegashada Itoobiya

“Arrintaan waxay ku saabsan tahay sheekadii hore ee 19%,” ayuu yiri wasiirka oo sheegay in arrintani mar hore ahayd, warkeediina hadda dhamaaday

Heshiiskaas ayuu sheegay in Itoobiya ay ka soo bixi waysay shardigii laga rabay ee ay qaybta uga noqon laheed dekadda Berbera ee ay haatan gacanta ku hayso DP World
“Itoobiya waa ay bixin waysay lacagtii laga rabay, sidaas ayayna ku waysay qaybtii ay rabtay,” ayuu wasiir kayd sii raaciyay hadalkiisa

Dad badan oo ku nool Geeska Afrika oo Soomaalidu ugu horeyso ayaa walwal ka muujiyay in Itoobiya ay si walba ku qaadan doonto badaha ku teedsan wadamada ay dariska yihiin
Abiy ayaa horey uga digay in deked la’aanta dalkiisa ay mustaqbalka noqon karto il colaadeed, wuxuuna ku baaqay dadaallo wax looga qabanayo arrintaas si loo ilaaliyo xasilloonida gobolka

Itoobiya ayaa albaabkii badda uu kasoo xirmay 1993-kii markii Eritrea ay heshay madax-banaani, kadib 30 sano oo dagaal ah

Somaliland ayaa sheegatay inay ka go’day Soomaaliya 30 sano kahor, balse ma haysato aqoonsi caalami ah, taasi oo adkeyneysa heshiis kasta oo Itoobiya ay ku dooneyso inay dekad uga hesho Soomaaliya, ayada oo aan soo marin dowladda federaalka
Dowladda federaalka ayaa horey u sheegtay inay diiday codsi uga yimid itoobiya oo ku saabsan inay la gasho wada-xaajood ku saabsan sidii ay uga heli laheyd deked ku taalla Badda Cas

Inkasta oo Soomaaliya ay “si aad uga go’an tahay” horumarinta nabadda, amniga, ganacsiga iyo is-dhex-galka, haddana ma xiiseynayso bixinta helitaanka hanti istaraatiiji ah sida deked, waxaa sidaas warbaahinta Bloomberg u sheegay wasiiru-dawlaha Arrimaha Dibadda Cali Cumar {Cali Balcad}

“Madax-banaanida iyo wadajirka dhuleed ee Soomaaliya – berriga, badda iyo hawada – sida uu dhigayo dastuurkeena, waa muqaddas mana furan in laga doodo,” ayuu yiri.