Sabti , 15, Nov 2025 {HMC}  Warbixin ay qortay Daily Express, oo ah warbaahin laga leeyahay Maraykanka, ayaa sheegaysa in in ka badan 60 khabiir oo sirdoon shisheeye ah ay 24-kii saacadood ee ugu dambeeyay ka baxeen Muqdisho, kaddib markii Safaarada Maraykanka ee Muqdisho ay sheegtay in 11-kii November 2025 la jabsaday nidaamka E-visa ee Dowladda Federaalka Soomaaliya.

Sirdoonka shisheeye ayaa dalka ka baxaya kadib markii la sheegay in kooxo aan la garanaynin ay gacanta ku dhigeen xogta in ka badan 35,000 qof oo isticmaalay nidaamka E- Visa oo ka kala yimid dalal ay ka mid yihiin Maraykanka.

Xogta la jabsaday waxaa ku jiray: magacyada, sawirrada, taariikhaha iyo goobaha dhalashada, cinwaanada, e-mailada, xaaladda guurka, iyo cinwaanada guryaha. Warbixinta ayaa sheegtay in safaaradaha shisheeye ee Muqdisho ay joojiyeen isticmaalka nidaamka E-visa ee dowladda, iyaga oo ka cabsi qaba in xogtooda la faafiyo.

Warbixinnada caalamiga ah ayaa sheegay in Imaaraadka Carabta ay Soomaaliya u adeegsadeen marin ay hubka u mariyaan dagaalyahannada RSF ee Suudaan.

Daily Express waxay sheegtay in xogta la tuhunsanyahay in la jabsaday ay sidoo kale muujisay in calooshooda u shaqaystayaal ka yimid Kolombiya ay soo mareen madaarrada Soomaaliya kahor inta ayna gudbin Suudaan.

Safaarada Marakanka ee Soomaaliya ayaa habeen hore sheegtay in la jabsaday nidaamka lagu kaydiyo xogta dal-ku-galka danabaysan ee Soomaaliya, kadib markii baraha bulshada lagu faafiyay sawiro iyo baasbooro aad u badan oo dadka baahiyay ay sheegeen in ay yihiin dad Soomaaliya usoo safray oo xogtoodii la dhacay.

Dowlada federaalka Soomaliya wali si rasmi ah ugama hadal jiritaanka warkaan, waxaana la filaya in saacadaha soo socda ay ka hadli doonaan.

Sabti , 15, Nov 2025 {HMC} Ciidanka milatariga Suudaan oo ay weheliyaan xoogagga hubeysan ee taageerra ayaa maanta la wareegay magaalada istaraatijiga ah ee Umm Dam Haj Ahmed oo ku taalla waqooyiga Kordofan, halkaa oo ay ka saareen ciidanka kooxda RSF.

Ciidanka milatariga Suudaan , waxay hadda u muuqdaan in bartilmaameedkeedu yahay magaalada istaraatiijiga ah ee Barah, si ay u xoojiyaan amniga magaalada El-Obeid, si loo xoojiyo difaacyada Khartoum iyo gobollada dhexe.

Sabti 15,Nov 2025 {HMC}  Warar soo baxaya ayaa xaqiijinaya in Dowladda Federaalka Soomaaliya—gaar ahaan hay’adaha ay khusayso nidaamka socdaalka iyo duulista hawada—ay haatan ku jiraan shir degdeg ah oo looga arrinsanayo jawaabta rasmiga ah ee ay ka bixin doonaan qalalaasaha ka taagan nidaamka E-Visa iyo mareegtii labaad ee dhawaan la sameeyay oo haatanba dhacsan.

Ilo muhiim ah ayaa sheegaya in isqabqabsi xooggan uu ka jiro hagidda iyo maamulka nidaamka E-Visa, gaar ahaan cidda xaqa u leh soo saarista dal-ku-joogga, taas oo noqotay muran dhexmaraya hay’adaha dowladda qaarkood. Waxaa intaa dheer in qaar kamid ah shirkadaha duulimaadyada caalamiga ah loo sheegay in rakaabka imaanaya Soomaaliya ay ka qaadi karaan dal-ku-galka garoomada dalka gudaheeda, hase yeeshee shirkadaha qaabilsan lacag-qaadista arrintaas ay si adag uga horjeedaan.

Wararka aan heleyno waxay tilmaamayaan in saacadaha soo socda dowladda Federaalka ay soo saari doonto war rasmi ah oo ku saabsan arrintan. Sidoo kale xog hoose ayaa muujinaysa in Madaxweynaha Jamhuuriyadda, Xasan Sheekh Maxamuud, uu amar ku bixiyey in si buuxda loo fuliyo heshiisyadii hore loogu wareejiyey shirkadda loo xilsaaray qandaraaska nidaamka E-Visa.

Sabti , 15, Nov 2025 {HMC} Kulanka wadajirka ah ee Golaha Shacabka & Aqalka Sare Baarlamaanka 11aad ee Jamhuuriyadda Federaalka Soomaaliya ayaa lagu dhagaystay Miisaaniyadda Sanadka soo socda 2026 oo sanadkaan ka duwan sanadihii hore sida hannaanka loo diyaariyay & farsamo ahaan

Kulanka waxaa shirguddoomiye ka ah Guddoomiye ku xigeenka labaad ee Golaha Shacabka Baarlamaanka Federaalka, Cabdullaahi Cumar Abshirow, mas’uulka labaad ee ugu derajo sarreeyay waa Guddoomiye ku xigeenka 2aad ee Aqalka Sare Cabdullaahi Cali Xirsi Timacadde

Miisaaniyadda sanadka soo socda 2026 waa $1.373 Bilyan oo doollar, halka sanadkii hore ahayd Miisaaniyaddu $1.359 Bilyan oo doollar, farqiga kororka oo ah 1% waa $13,750,793 sida ay sheegtay Wasaaradda Maaliyadda Soomaaliya

Isbaddelka sanadkaan ayaa lagu sheegay in mashaariic kala duwan iyo fursado la abuuri doonno, sidaas awgeed loo baahday in kor u kac la sameeyo iyada oo laga tusaale qaadanaya howlahaas kala duwan ee la qabanayo

Kulankaan oo ah kulanka 4aad ee Golaha Shacabka iyo Aqalka Sare Baarlamaanka 11aad ee Jamhuuriyadda Federaalka, miisaanadda waxa ay kamid tahay waxyaabaha indhaha lagu hayo iyada oo Xildhibaannadu su’aalo weydiiyeen mas’uuliyiinta ka socotay Wasaaradda Maaliyadda XFS.

Sabti , 15, Nov 2025 {HMC}  Ciidanka Booliska Puntland ee Gobolka Mudug ayaa sheegay in haweeney lagu magacaabo Hodan Maxamuud Diiriye, oo 34 jir ah ay qiratay dilka Saabiriin Saylaan Cabdulle, oo 14 jir ah.

Eedeysanaha ayaa dhawaan gacanta lagu soo dhigay markii maydka gabadhaan xogteeda la helay, waxaana booliisku uu sheegay in la horgeyn doono Maxkamadda.

Marxuumadda ayaa ku noolayd oo shaqaale ka ahayd guriga eedeysanaha falka geysatay, waxaana baaritaan lagu sameeyay moobaylka eedeysanaha laga helay caddeymo muujinaya iyadoo tacaddiyo joogto ah u geysanaysa marxuumadda, sidoo kalena ku haysay addoonsi shaqo.

Sidoo kale, Baaritaan lagu sameeyay maydka marxuumadda ayaa laga helay dhaawacyo dhowr ah oo ay kamid yihiin in lagu dilay Ceeji, in iyo jirkeeda meelo badan oo kamid ah tooreey loogu geystay.

Shacab badan oo ka caraysan dilka gabadhan ayaa sameeyay isku soo bax ay ku dalbanayaan in ay caddaalad hesho marxuumadda. Booliiska ayaa ugu baaway dadku inay is dajiyaan, iyagoo sheegay in sharciga la waafajindoono eedeysanaha.