Isniin , October -16- 2023-{HMC}  Madaxweynaha Dalka Masar Cabdifitaax Al-Siisi ayaa Israaiil ku eedeeyay in ay dhibaatooyin xooggan ka geysatay dhanka Gaza kaddib markii duqeyn iyo weerar aan loo kala soocin dadka ku sugan Magaaladaas ay geysatay.

Siisi ayaa tilmaamay in sida ay u jawaabtay Israaiil marka laga tusaale qaato weerarka uga yimid dhinaca Xamaas aanay ahayn sida ku habboon ee looga warceliyo marka xaaladdaan oo kale oo bannaanka usoo baxdo.

Kulan gaar ah uu la qaatay Xoghayaha Arrimaha Dibadda Mareykanka Antony Blinken ayuu Madaxweynaha Masar ku sheegay in dib loo furayo marinka rafah ee Gaza si gargaar loo gaarsiiyo Falastiiniyiinta dhibaatooyinka kala kulmay Israaiil.

Masar ayaa horay u xirtay xuduudda ay la wadaagto Magaalada Gaza iyada oo fulineysa heshiiska ay la gashay Israaiil, taasi waxa ay sii adkeysay xaaladda ka taagan bariga dhexe oo dad badan ay waayeen biyo, cunto iyo meelo ay uga baxsadaan duqeynta Israaiil.

“Falcelinta Israell, si weyn ayay uga duwan tahay, xaqa is-difaacidda, waxayna keentay inay si wadar ah u ciqaabto in ka badan 2.3 million oo qof oo ku nool marinka Gaza” ayuu yiri Madaxweynaha Jamhuuriyadda Carabta Masar Cabdifitaax Al-Siisi.

Xoghayaha Arrimaha Dibadda Mareykanka Antony Blinken ayaa ku dulmeereysanaya waddamada carbeed ee heshiiska horay ula galay Israaiil kuwaas oo uu ku cadaadinayo in ay ka falceliyaan weerarkii lagu laayay Yuhuudda, Maxaabiista looga soo qabsaday isla markaana hubka looga soo furtay.

Isniin, October -16- 2023-{HMC}  Ciidamada Booliska Mareykanka ayaa xiray nin waayeel ah oo ku eedeysay in uu toorrey ku weeraray wiil yar oo Muslim ah iyo hooyadiis.

Ninkan oo lagu magacaabo Joseph Chuba, oo 71 jir ah, ayaa lix iyo labaatan jeer toorey ku dhuftay wiil yar oo Muslim ah iyo hooyadiis oo degenaa gurigiisa.

Wiilka yar ee lix jirka ah ayaa geeriyooday, halka hooyada 32 sano jir ah uu ku yaal dhaawac weyn oo halis ah.

Weerarka oo ka dhacay gobolka Illinois waxay boolisku ku tilmaameyn mid ku saleysan ‘Islaam naceyb’ iyada oo la xiriirshay dagaalka ka socda Qasa ee u dhexeeya Xamaas iyo Israel.

ISHA BBC

Isniin , October -16- 2023-{HMC} Magaalada Muqdisho waxaa gabal-dhicii shalay ku soo bilowday diyaarado sida ciidamo lagu soo tababaray dalka Eritrea, kuwaas oo ilaa xalay saqdii dhexe soo degaayey.

Ciidamada laga soo celinayo Eritrea qaarkood waxay dalka ka maqnaayeen in ka badan shan sano, waxayna ciidamadaan soo mareen tababarrada ugu adag ee ciidan la siiyo, maadaama dowladda gacanta ku heysay ee Eritrea ay tahay mid ku ad-adag arrimaha ciidanka.

Dadka reer Muqdisho ayaa xalay isugu soo baxay wadooyinka waaweyn ee caasimadda, iyagoo soo dhaweynaya ciidamada laga soo daabulayo dalka Eritrea oo tababar adag ay ku soo mareen.

Isgoyska Taleex ee magaalada Muqdisho ilaa KM 4 waxaa xalay isugu soo baxay dadweyne aad u badan oo ku faraxsan dib u soo celinta ciidankii tababarka ugu maqnaa dadka Soomaaliyeed.

Markii laga soo tago ehellada, waxaa banaan-baxaan xalay soo camiray dad badan oo ku faraxsan soo noqoshada ciidankaan u soo tababartay dalkooda.

Waxaa la xiray jidadka muhiimka ah ee degmooyinka xiga garoonka Aadan Cadde ee magaalada Muqdisho, si aan loo dhibaatey ciidamadaan cusub.

Ciidamadaan ayaa aad looga sugayey Soomaaliya, dalka ayaa ku jira waayo ay halgan adag lagula jiro AS, waxayna inta badan ciidamadaan ku biirayaan dagaalka ka socda gobollada dalka.

Sida ay ilo xog ogaal ah u sheegeen Warbahinta, waxaa maalin kasta Muqdisho imaa doona dowr diyaaradood oo sida ciidankaas, ilaa ay ka soo dhamaadaan ciidan ku dhow 8,000 oo dalka Eritrea tababar ku dhameystay.