Isniin 20 Act 2025 {HMC} Gudoomiyaha Cusub ee Gobolka Hiiraan Maxamed Carab Xuseen ayaa qoraalkan hoose ku baahiyay bartiisa Facebooga ah.

Ugu horayn waxaan u mahad celinayaa Allaah subxaanahu watacaalaa.

Marka xiga waxaan u mahadcelinaa Madaxweynaha Dowladda Hirshabeele mudane Cali Cabdullaahi xuseen (guudlaawe) iyo Madaxwayne ku-xigeenka Dowladda Hirshabelle mudane Yuusuf Axmed hagar (dabageed) Oo igu aaminay masuuliyadda culus oo ah guddoomiyaha maamulka gobalka Hiiraan.

Waxaan idiin balanqaadayaa in aan ku shaqayn doono taladiina iyo aragtida Dowladda Hirshabelle haddii alle idmo Sidoo kale waxaan u mahadcelinaa dhammaan asxaabta,ehelka iyo dhamaan bulshada reer Hiiraan oo iisoo hambalyeeyay qaarka isoo wacay oo aan u jawaabi waayay Waxaan uga cudur-daaranayaa in uu igu badnaa wixcitcitaaka saxiibada qoorkoodna aan ka qaban waayay telfoonka

Walaalayaal iga raali noqda .

Walaalayaal waxaan idinka codsanayaa in aad igala shaqaysaan sidii aan ku hormarin lahayn gobalkeenna Anigoo had iyo goor ku shaqayn doona taladiinna.

Bulshada reer Hiiraan waxaan yeelan doonna kulamo iyo wada tashiyo ku salaysan sidii aan u hormarin lahayn Gobolka Hiiraan.

Waxaan ugu baaqayaa hay,adaha samafalka in ay gar-gaar deg -deg ah gaarsiiyaan bulshada reer Hiiraan ee kasoo barakacay Colaada.

Wabilaahi towfiiq.

Isniin 20 Act 2025 {HMC} Wasiirka Arrimaha Dibadda iyo Iskaashiga Caalamiga, H.E. Abdel Salaam Abdi Ali, ayaa maanta oo Isniin ah magaalada Aswan kula kulmay dhiggiisa Masar, H.E Dr. Badr Abdel-Atty, Wasiirka Arrimaha Dibadda, Socdaalka iyo Arrimaha Dibadda ee Masar, oo uu dhinac socday shirka shanaad ee Madasha Nabadda iyo Horumarka Waara ee Aswan.

Kulanka ayaa diiradda lagu saaray xoojinta xiriirka labada dal iyo ballaarinta iskaashiga dhinacyada muhiimka ah, sida amniga, ganacsiga, maalgashiga, caafimaadka iyo horumarinta.

Wasiirradu waxay xaqiijiyeen inay si wadajir ah uga go’an tahay sii xoojinta xiriirka qotoda dheer iyo horumarinta danaha wadaagga ah ee labada dal ee walaalaha ah.

Tallaabo muhiim ah oo lagu xoojinayo xiriirka dhaqaale, waxay labada dhinac ku heshiiyeen in dhawaan la qabto shirka labaad ee ganacsiga Soomaaliya iyo Masar si kor loogu qaado fursadaha ganacsi iyo maalgashi ee labada dal ee walaalaha ah.

Kulanka ayaa sidoo kale looga hadlay sidii ciidamada Masar loo geyn lahaa qaab dhismeedka howlgalka Midowga Afrika ee taageerada iyo xasilinta Soomaaliya (OSSOM).

Intii uu socday kulanka, wasiir Abdel Salaam Cabdi ayaa muujiyay sida dalkiisu uu uga mahadcelinayo taageerada joogtada ah ee Masar, isagoo caddeeyay in Muqdisho ay ka go’an tahay horumarinta iskaashiga ku salaysan qiyamka la wadaago iyo xiriirka taariikhiga ah.

Dhankiisa, Wasiir Abdel Atty ayaa bogaadiyay dardargelinta wanaagsan ee xiriirka Masar iyo Soomaaliya, isagoo caddeeyay sida ay Masar uga go’an tahay horumarinta iskaashiga istiraatiijiyadeed ee taageeraya xasilloonida iyo barwaaqada gobolka Qarnigii Afrika.

Wuxuu soo dhoweeyay horumarka laga gaaray ka qeybgalka Masar ee howlgalka Midowga Afrika ee lagu taageerayo iyo xasilinta Soomaaliya (OSSOM), wuxuuna carrabka ku adkeeyay muhiimadda ay leedahay maalgelin joogta ah oo caalami ah si loo xaqiijiyo guusha howlgalka.

Wasiirka arrimaha dibadda Masar ayaa xaqiijiyay in dalkiisu uu sii wadi doono taageerada uu siinayo dhismaha hay’adaha dowladda Soomaaliya iyo dadaallada nabadda iyo dib u heshiisiinta ee Soomaaliya, isagoo dhanka kale ka dhawaajiyay in la xoojiyo midnimada madaxda Soomaalida si ay u wajahaan caqabadaha amni ee jira.

Labada dhinac ayaa isla gartay baahida loo qabo in la xoojiyo iskaashiga dhanka la dagaalanka argagixisada iyo xagjirnimada, iyagoo carabka ku adkeeyay in nabadda iyo xasiloonida gobolka ay ku xiran tahay wada shaqeyn iyo wadajir.

Wasiirradu waxay soo gebagebeeyeen kulanka sida dhabta ah ee ku saabsan ilaalinta isku xidhka dhow ee heer gobol iyo heer caalami si wax looga qabto caqabadaha guud iyo horumarinta nabadda, horumarka iyo xasilloonida gobolka qarniga Afrika.

Isniin 20 Act 2025 {HMC} Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa Qasriga Madaxtooyada ku qaabilay Guddoomiyaha Golaha Wakiilada Dowlad-goboleedka Waqooyi Bari Soomaaliya, Dr. Aadan Cabdullaahi Aw-xasan.

Madaxweynaha ayaa warbixin ku saabsan xaaladda guud ee deegaannada Waqooyi Bari Soomaaliya, ka dhageystay Guddoomiyaha, Isaga oo kula dardaarmay in Madaxda la doortay ee Maamulku ay xoogga saaraan sidii loo ilaalin lahaa nabadda, wada-noolaanshaha bulsho, xasilloonida iyo midnimada Ummadda Soomaaliyeed.

Kulanka, waxaa ka qayb galay Madaxweynaha Dowlad Goboleedka Galmudug Mudane Axmed Cabdi Kaariye, Wasiiru-Dowlaha Wasaaradda Tamarta iyo Kheyraadka biyaha XFS, Mudane Maxamed Cabdullaahi Faarax iyo Xildhibaanno ka tirsan Baarlamaanka Jamhuuriyadda Soomaaliya.

Isniin 20 Act 2025 {HMC} Guddoomiye ku xigeenka labaad Aqalka Sareee Baarlamaanka Jamhuuriyadda Federaalka Soomaaliya Mudane Cabdullaahi Cali Xersi Timacadde, ayaa maanta shir gudddoomiyay kalfadhiga 7-aad kulankiisa afaraad oo ay maanta soo xaadireen 28-Sanatar.

Ajandaha kulanka maanta ayaa ahaa akhrinta koowaad ee Hindise-sharciyeedka Dad-dhigista iyo Xaaladaha Madaniga ah iyo sii wadista ka doodista warbixin ku saabsan ka talo bixinta kaalinta Aqalka Sare ee Arrimaha Dowladaha Xubinta ka ah Dowlada Federaalka Soomaaliya.

Ugu horrayn Wasiiru Dowlaha Wasaaradda Arrimaha Gudaha, Federaalka iyo Dib-u-heshiisiinta XFS, Mudane Sadad Caliyow, ayaa Sanatarrada Aqalka Sare ka hor jeediyay akhrinta koowaad ee Sharciga Dad-dhigista iyo Xaaladaha Madaniga ah, isagoo si faahfaahsan uga hadlay qodobada sharciga iyo muhiimadda uu dalka u leeyahay.

Intaasi ka dib Sanatarrada Golaha Aqalka Sare ee Baarlamaanka Jamhuuriyadda Federaalka Soomaaliya, ayaa gudagalay doodda sii wadista warbixin ku saabsan ka talo bixinta kaalinta Aqalka Sare ee Arrimaha Dowladaha Xubinta ka ah Dowlada Federaalka Soomaaliya, iyagoo soo jeediyay talooyin iyo aragtiyo maangal ah oo ku aaddan doorka matadaadda Aqalka Sare ee dowlad Goboleedyada.

DHAMMAAD