Isniin 15 Sep 2025 {HMC} Sida muuqata dagaal adag ayaa ka socda Facebook, kadib markii maalmahii lasoo dhaafay uu Muungaab lacagta ka jartay dad u badnaa masaakiin & shaqaale hoosaad, kadibna uu ku bedelay kuwa ay qaraabo yihiin, waxaana la abuuray dacaayad lagu baahiyay suuqa, si loo khaldo ra’yul caamka guud.

Markii lagasoo gudbay boosaskii dadkii hoose, waxaa jiray maalmahii lasoo dhaafay dhowr qof oo kale oo boosaskii laga tuuray, waxaana lagu bedelay xigtada Guddoomiyaha, taas oo ayaana abuurtay kacdoonka cusub, muddo si hoose loo qarinayay kadib hadda ayuu bannaanka usoo baxay.

Guddoomiye Muungaab waxa uu hadda wajahayaa laba mushkilad oo waaweyn, waana musuq baahsan & kacdoon isaga ka dhan ah oo ka imaanaya beelaha ay kasoo jeedaan dadka uu boosaska ka tuurtay.

Ma jirto illaa & hadda in la go’aamiyay xil ka qaadistiisa, laakiin waxaa haysta culeys ku filan.

Boqol maalin oo musuq maasuq ah.

WQ Abdi Aziz Ahmed

Axad 14 Sep 2025 -{HMC} Madaxwaynaha Jamhuuriyadda Federaalka Soomaaliya Mudane Xasan Sheekh Maxamuud ayaa caawa gaaray magaalada Doxa ee caasimadda dalka Qadar, isaga oo ku biiraya hoggaamiyeyaasha dalalka Islaamka oo ka qaybgali doona Shirwaynaha Dalalka Islaamka iyo Carabta.

Madaxwayanha ayaa inta uu Shirku socdo waxaa uu sidoo kale kulamo-doceedyo la yeelan doonaa qaar ka mid ah hoggaamiyeyaasha dhiggiisa ah ee goobjoogga ah.

Axad 14 Sep 2025 -{HMC} Roobab xooggan oo baaxad weyn lahaa ayaa Maanta ka da’ay magaalada Ceerigaabo Gobolka Sanaag ee Soomaaliland.

Roobabka xooganaa ayaa sababay khasaare maaliyadeed oo ballaaranan, kuwaas oo sameyntooda si weyn looga dareemaya Magaalada iyo deegaanada hoos yimaado.

Doha, 14 Sep 2025 -{HMC} Wasiirka Arrimaha Dibadda Soomaaliya oo kaga qaybgalay Dooxa kulanka heer Wasiir ee loogu gogol-xaarayo Shir-madaxeedka wadamada Carabta iyo Islaamka

Wasiirka Arrimaha Dibadda iyo Iskaashiga Caalamiga, Mudane Cabdisaalan Cabdi Cali, ayaa maanta oo Axad ah kaga qeybgalay magaalada Dooxa shirka heer Wasiir ee loogu gogol-xaarayo Shir-madaxeedka deg-degga ah ee ay iskugu imaanayaan madaxda iyo hoggaamiyeyaasha wadamada xubnaha ka ah Ururrada Jaamacadda Carabta iyo Iskaashiga Islaamka, kagana hadlayaan weerarka Israa’iil ku qaaday dalka Qatar.

Shirka ayaa lagu faaqiday weerarkii Israa’iil ku qaaday Qatar 9-kii Septembar, iyadoo la adkeeyay muhiimadda ay leedahay midnimada wadamada Carabta iyo Islaamka si looga tacaalo arrintan, iyadoo go’aannada ku xusan war-murtiyeedka shirka la go’aamiyay in loo gudbiyo shir-madaxeedka beri oo Isniin ah furmaya si loo meel-meeriyo.

Waxaa la filayaa in Shir-madaxeedka degdegga ah uu soo saaro mowqif mideysan oo ka tarjumaya welwelka hoggaamiyeyaasha gobolka ee ku aaddan saameynta weerarka ku yeelan karo amniga iyo xasilloonida gobolka.

-Axad 14 Sep, 2025 {HMC} Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa maanta kulan gaar ah la yeeshay Safiirka Ururka Jaamacadda Carabta u fadhiya Soomaaliya, Cabdalla Cuteybi.

Kulanka ayaa looga hadlay iskaashiga ka dhexeeya dowladaha xubnaha ka ah Ururka Jaamacadda Carabta ee ku aaddan dhinacyada siyaasadda, dhaqaalaha iyo amniga.

Ra’iisul Wasaaraha, ayaa uga mahadceliyay Ururka Jaamacadda Carabta, taageerada iyo iskaashiga ay wadaagaan, gaar ahaan wadashaqeynta kala dhaxeysa dowladda iyo shacabka Soomaaliyeed.

Danjiraha Jaamacadda Carabta, Cabdalla Cuteybi, ayaa xusay in ay sii xoojin doonaan doorka Soomaaliya ay ku leedahay horumarinta iskaashiga dalalka ku mideysan Ururka.

Sidoo kale, Danjiraha ayaa shaaciyay in dhawaan ay Soomaaliya soo gaari doonaan wafdi ka socda Ururka Jaamacadda Carabta, kuwaas oo hirgelin doona mashaariic kala duwan.

-Axad 14 Sep, 2025 {HMC} Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Sheekh Aadan Maxamed Nuur (Madoobe) ayaa maanta kulan kula qaatay magaalada Muqdisho Safiirka Dowladda Mareykanka u qaabilsan Soomaaliya Ambassador Richard H. Riley oo ay wehliyaan kuxigeenkiisa Justin Davis iyo Matthew Younger oo ah Madaxa Siyaasadda ee Safaaradda Mareykanka ee Soomaaliya.

Kulanka waxaa diiradda lagu saaray xoojinta xiriirka saaxiibtinimo ee ka dhaxeeya Soomaaliya iyo Mareykanka.

Safiirka Mareykanka ee Soomaaliya ayaa ku amaanay Guddoomiyaha Golaha Shacabka hoggaankiisa iyo kaalinta uu ku leeyahay horumarinta shaqooyinka Golaha, gaar ahaan meelmarinta sharciyada muhiimka u ah dowladnimada iyo xoojinta hay’adaha dastuuriga ah ee dalka.

Guddoomiyaha Golaha Shacabka ayaa dhankiisa bogaadiyay taageerada joogtada ah ee Dowladda Mareykanka ay siiso Soomaaliya, isagoo xusay kaalinta ay ka qaadato dhinacyada siyaasadda, amniga iyo dhaqaalaha.

Ugu dambeyn labada dhinac ayaa isku raacay in la sii adkeeyo xiriirka iyo iskaashiga labada dal ee dhinacyada kala duwan.