Axad 14 Sep, 2025 {HMC} Magaalada Dooxa ee caasimadda Qadar waxaa maanta ka furmaya shir-wadaagga gogol-xaarka ah ee Wasiirrada Arrimaha Dibadda dalalka xubnaha ka ah ururrada Jaamacadda Carabta iyo Iskaashiga Islaamka, oo ujeedkiisu daaranyahay isku-duwidda mowqifyada iyo dejinta ajandaha shir-madaxeedka deg-degga ah ee madaxda iyo hoggaamiyeyaasha carbeed ay iskugu imaanayaan oo lagaga hadlayo duqeymaha cirka ee Israa’iil ka geysatay Qadar.

Afhayeenka Xoghayaha Guud ee Ururka Jaamacadda Carabta, Jamaal Rushdi, ayaa sheegay in shirka Dooxa uu xambaarsan yahay farriin ku aaddan midnimo buuxda oo ay la leeyihiin Qatar.

Rushdi ayaa u sheegay Wakaalladda Wararka Qatar ee (QNA) in shir madaxeedkan ugu horreyn looga hadli doono cawaaqib xumada ka dhalan karta weerarka Israa’iil ay ku qaadday Qadar, waxaana la filayaa in dalalka Carabta iyo kuwa Islaamka ay si buuxda u muujiyaan fekerkooda.

Dalalka ka qeyb galaya waxaa ka mid ah Soomaaliya, oo Wasiirka Arrimaha Dibadda iyo Iskaashiga Caalamiga, Cabdisalaan Cabdi Cali, uu shalay gaaray halkaas.

Axad 14 Sep, 2025 {HMC} Nabadoon Cumar Cabdilaahi Cabdi oo kamid ah Odayaasha degmada Badhan, ayaa ku geeriyoodey duqayn ay galabta gobolka Sanaag ka gaysteen diyaarado aan Sumaddooda la aqoonsan oo kuwa dagaalka ah.

Nabadoonka ayaa duhurkii kasoo baxay degmada Ceel-buh ee gobolka Sanaag isagoo wata gaarigiisa gaarka u ahaa, dadka deegaanka ayaa Daljir u sheegay in nabadoonka uu la socdey nin aysan garanayn oo 3 habeen u joogey degmada Ceel-buh.

Wararka ayaa sheegaya in nabadoonka iyo ninkii la socdey ee dadka deegaanku aysan aqoonsan ay ku dhinteen duqaynta, ninka la sheegay inuu la socdey nabadoonka ayaa ilo xog ogaal ahi sheegeen in 4 habeen uu u hoydey degmada Ceel-buh oo uu deganaa hotel kuyaala halkaasi.

Lama oga bartilmaameedka rasmiga ah ee diyaaradahan, iyadoo nabadoonka gaariga la duqeeyay lahaa uu ahaa nin caanka ah deegaanka oo lagu yaqaan ka shaqaynta maslaxada deegaanka.