Arbaco  27 , Aug 2025 {HMC} Ra’iisul Wasaaraha Xukuumadda  Federaalka Soomaaliya, Xamsa Cabdi Barre, ayaa booqasho ku tagay xarunta Warshadaha Tamarta iyo Kiimikada ee Ningdong oo ku taalla Gobolka Ismaamulka Ningxia Hui, kaas oo ah aag horumarineed oo muhiim ah, iyo mid ka mid ah xarumaha hormuudka u ah Shiinaha ee isbeddelka warshadaha iyo tamarta.

Booqashada ayaa ujeedkeedu ahaa in Soomaaliya ay ka sii faa’iideysato khibradda Ningxia ee ku saabsan sida ay u abuureen warshado kala-duwan oo tamarta dhaliya, horumarinta warshadaha, iyo u guurista tamarta nadiifta ah, iyadoo Soomaaliya ay sii waddo hirgelinta Qorshaha Isbeddelka Qaranka.

Ra’iisul Wasaaraha ayaa ku tilmaamay gobolka Ningxia in uu yahay tusaale wax ku ool ah oo ka tarjumaya sida horumarka warshadaha iyo tamarta loogu adeegsan karo siyaasad cad oo waara. Wuxuu xusay in casharrada iyo khibradaha laga dhaxli karo Ningxia ay Soomaaliya u furayaan waddooyin iskaashi oo muhiim ah, kuwaas oo lagu gaari karo horumar muuqda oo dhinacyada tamarta, warshadaha iyo dhaqaalaha ah.

“Soomaaliya waxay hiigsanaysaa in ay dhisto waax tamareed oo casri ah, abuurto fursado warshadeed oo cusub, isla markaana ay dardar geliso shaqo abuurka dhallinyarada dalka oo ah laf-dhabarka mustaqbalka qaranka iyada oo kaashaneysa tignoolajiyadda horumarsan iyo maalgelinta shisheeye” ayuu yiri Rai’isul Wasaare Xamse Cabdi Barre.

Arbaco  27 , Aug 2025 {HMC} Soomaaliya ayaa Mareykanka ka raadinaysa Macaamil ka ganacsata shidaalka weli dhulka hoostiisa ku jira ee aan la soo saarin.

Safaaradda Soomaaliya ee Maraykanka ayaa sheegtay in magaalada Houston ee gobolka Texas uu maanta ka furmay “fursad cusub” oo lagu sii xoojinayo wadahadallada iyo iskaashiga shirkadaha tamarta Mareykanka iyo Soomaaliya.

Qoraalka ay soo saartay Safaaradu ayaa lagu sheegay in Soomaaliya ay ka go’an tahay horumarinta iskaashi dhinaca batroolka iyo gaaska ah, isla markaana ay aaminsan tahay mustaqbal ku dhisan ganacsi iyo maalgelin wadaag ah.

Wasiirka Badroolka Soomaaliya Dahir Shire Maxamed ayaa hogaaminaya wafdiga Soomaaliya ee shirka caalamiga ah uga qaybgalaya Maraykanka.

Tani waa xeelad cusub oo ay Dowladda Soomaaliya rabto in ay Mareykanka uga jeediso Somaliland taas badalkeeda uu la macaamilo Soomaaliweyn danaha uu leeyahayna ka fushado.

Lama oga in ay shaqayn doonto iyo in kale balse waxaa muuqata in markaan DFS ay tab iyo xeelad wixii ay taqaanay iskugu geynayso sidii loo baajin lahaa Aqoonsi laga yaabo Inuu ku yimaado sifo aan la filaynin.

Arbaco  27 , Aug 2025 {HMC} Dowladda Itoobiya ayaa sheegtay in aysan jirin wax cabsi ah oo ay ka qabto in ciidamada Masar la keeno Soomaaliya si ay uga qeyb qaataan howlgalka nabad ilaalinta ee Midowga Afrika.

“Annagu ma nihin kuwa cabsi qaba ama dareemaya khatar, waana awoodnaa inaan is difaacno,” ayuu yiri Safiirka Itoobiya ee Soomaaliya, Suleyman Dedefo, oo wareysi siiyay Universal Somali TV.

Safiirku wuxuu sheegay in joogitaanka ciidamada Masar ee Soomaaliya uusan wax faa’iido ah u yeelan doonin xaaladda amni ee Soomaaliya, hase yeeshee wuxuu carrabka ku adkeeyay in Dowladda Federaalka Soomaaliya ay xaq u leedahay inay dal kasta oo ay saaxiib la tahay ciidamadoodu yimaadaan Soomaaliya. Wuxuuna sheegay Itoobiya in aysan wax diidmo ka qabin arrintaas.

Suleyman Dedefo ayaa intaas ku daray in waxa laga filan karo joogitaanka ciidamada Masar ay noqon karto in ay loolan siyaasadeed iyo mid istiraatiiji ah la galaan ciidamada Itoobiya ee ku sugan Soomaaliya.

Hadalka Safiirka Itoobiya ee Soomaaliya ayaa kusoo aaday, xilli dhawaan Dowladda Masar ay Soomaaliya usoo dirayso cutubyo kamid ah ciidamadeeda si ay qeyb uga noqdaan howlgalka AUSSOM.

Masar iyo Itoobiya waxaa ka dhaxeeya xiisad ka dhalatay biyaha webiga Niil. Itoobiya ayaa biyo xireen weyn ka dhisatay dalkeeda, iyadoo Dowladda Masar ay kasoo horjeeddo qorshahaan, una aragto mid ku khatar ku ah biyaha webiga Niil ee dalkeeda.

Arbaco  27 , Aug 2025 {HMC} Cutubyo ka tirsan ciidanka Daraawiishta Puntland ayaa saaka laamiga dheer ee deegaanka Kalabayr ee gobolka Bari xiray, iyaga oo ka gadoodsan mushaar la’aan muddo dheer heysatay.

Ciidanka ayaa halkaasi ku joojiyay gaadiid badan oo xamuul ah oo kasoo dhaqaaqay dekedda magaalada Boosaaso kuna sii jeeday gobollada kale.

Waxay xukuumadda Puntland si cad ugu dalbanayaan in degdeg loogu bixiyo xuquuqda iyo mushaaraadkooda, iyagoo ku goodiyay in aysan furi doonin jidka ilaa inta cabashadooda laga xalinaayo.

Saraakiisha hoggaaminaysa ciidanka ayaa sheegay in ay marar badan u gudbiyeen cabashooyin iyo dalab rasmi ah xukuumadda madaxweyne Siciid Cabdullaahi Deni, balse aysan wax jawaab ah ka helin.

Sida ay sheegeen, tani ayaa sababtay in ay qaadaan tallaabadan culus ee ah xiritaanka waddada muhiimka ah ee isku xirta Boosaaso iyo gobollada kale ee Puntland.

Xukuumadda Puntland weli kama aysan hadlin gadoodka ciidamada, balse xaaladda ayaa abuurtay hakad weyn oo ku yimid isku socodka gaadiidka iyo dhaqaalaha gobolka.