Sabti 9 Aug 2025 {HMC} Taliyaha Ciidanka Dhulka Xoogga Dalka Soomaaliyeed, Jeneraal Sahal Cabdullaahi Cumar, ayaa maanta kormeer shaqo ku tagay deegaanka istiraatiijiga ah ee Bariire ee gobolka Shabeellaha Hoose, halkaasi oo Ciidanka Xoogga Dalka iyo saaxiibadooda Ciidamada Uganda ee UPDF ay ka saareen kooxda Al shabaab

Intii uu socday kormeerka, Jeneraal Sahal ayaa booqday gododkii iyo xarumihii maleeshiyaadka Al shabaab  laga saaray, halkaas oo lagu arkayay meydad badan oo cadawga ah, hub farabadan iyo saanado kale oo ciidan oo ay ka carareen.

Taliyaha Guutada 17-aad ee Kumaandooska Xoogga Dalka, Gaashaanle Cali Cageey, ayaa taliyaha ugu warbixiyay xaaladda amniga iyo sida ay ciidanku u xaqiijiyeen xasilloonida deegaanka.

Jeneraal Sahal Cabdullaahi Cumar ayaa bogaadiyay geesinimada iyo howlkarida Ciidanka Xoogga Dalka iyo saaxiibadooda UPDF ee qeybta ka ahaa howlgalka, isaga oo ku dhiirrigeliyay inay sii laba-laabaan dadaallada lagu ciribtirayo kooxda Al shabaab.

Sabti 9 Aug 2025 {HMC} Ciidamada Dowladda Federaalka Soomaaliya oo kaashanaayo kuwa nabad ilaalinta soomaaliya ayaa kooxda al shabaab ka saaray magaalada Bariire halkaas oo mudo labo bil ah ay haysteen kooxda.

Dowladda Soomaaliya ayaa maanta soo Bandhigatay Hub ay sheegtay in ay ka furatay kooxda AS kadib markii ay shalay qabsadeen degaanka Bariire ee Gobolka Shabeellaha Hoose.

Saturday 9 Aug 2025 {HMC} Gaari bas ah oo ay saarnaayeen dad tacsi ah ayaa ku burburay galbeedka Kenya, waxaana ku dhintay 25 qof, sida ay sheegeen maamulka deegaanka.

Wadaha gaari ayaa xakameyn waayay gaariga, waxa uuna ka baxay waddada waxa uuna ku rogmaday bohol ku teedsan waddada weyn ee Kisumu-Kakamega galabnimadii Jimcaha, sida lagu sheegay warbixin uu soo saaray booliiska oo ay aragtay BBC-da.

Deegaankan ayaa caan ku ah shilal badan oo dhimasho sababay. Booliska ayaa sheegay in 10 haween ah, 10 rag ah iyo hal gabar yar ay ku dhinteen goobta, iyadoo 20 ka mid ah rakaabka ay ku dhaawacmeen, oo shan ka mid ah ay halis yihiin.

Afar qof ayaa markii dambe ku dhintay isbitaalka, sida ay saraakiisha u sheegeen Warbaahinta Gudaha.

Rakaabka ayaa ka soo laabtay goob uu aas ka dhacayay, waxaana la rumeysan yahay in dhammaan ay ka soo jeedaan hal qoys.

si rasmi ah looma cadeeyn Sababta shilka keentay , sida uu booliisku sheegay.

Gaariga wuxuu ahaa gaari dugsiga sare ee iskuul uu leeyahay, balse wax arday ah ma saarneyn maaddaama loo adeegsaday in lagu soo qaado dadka tacsida ka qeyb galayay.

Baska ayaa kasoo laabaty munaasabad aas ah oo ka dhacaysay deegaanka Nyahera wuxuuna kusii jeeday Nyakach, oo isu jiray qiyaastii 62 km (38.5 meyl).

Sabti 9 Aug 9, 2025 {HMC} Booliska ayaa sheegay in ilaa hadda ay xabsiga dhigeen in ka badan 50 qof dibadbax ka dhacay magaalada London oo lagu taageerayay kooxda la mamnuucay ee Palestine Action.

In ka badan 100 qof ayaa isku mar soo bandhigay boorar ay ku qoran yihiin farriimo isku mid ah “Waan ka soo horjeedaa xasuuqa. Waxaan taageersanahay Palestine Action”, iyagoo qeyb ka ahaa mudaharaadka, oo ay soo qabanqaabiyeen Difaaca Xeer-beegtideena oo ka dhacay fagaaraha Baarlamaanka Westminster.

Dawladdu waxay mamnuucday kooxda Palestine Action bishii Luulyo iyadoo la raacayo sharciga argagixisada ee 2000, taas oo ka dhigaysa xubinnimada ama taageerada kooxda dembi dambiyeed, ciqaabtiisu gaadhayso ilaa 14 sano oo xadhig ah.

Iyadoo mudaaharaadku uu wali socdo, booliska magaalada caasimadda ah ayaa yiri: “Waqti ayay qaadan doontaa, laakiin waxaan xiri doonnaa cid kasta oo taageero u muujisa kooxda Palestine Action.”

Sabti 9 Aug 9, 2025 {HMC} Guddoomiyaha Guddiga Arrimaha Dibadda ee Aqalka Sare ee Mareykanka, Sen. Jim Risch, ayaa soo jeediyay in la xaddido maalgelinta Mareykanka ee Hawlgalka Taageerada iyo Xasilinta Midowga Afrika ee Soomaaliya (AUSSOM).

Soo jeedintan ayaa mamnuucaysa in Mareykanku bixiyo lacagaha qiimeysan ee uu u maro Qaramada Midoobay si loogu taageero AUSSOM, ilaa iyo inta Wasaaradda Arrimaha Dibadda ee Mareykanku ay caddeyso in hawlgalku u hoggaansamayo shuruudo adag oo uu dejiyay Washington.

Shuruudahaas waxaa ka mid ah in AUSSOM uusan taageereynin qiyam ka soo horjeeda dimuqraadiyadda, qiyamka Mareykanka, ama xuquuqda aadanaha.

Senator Risch, oo ay garab socdaan Senator Ted Cruz iyo Rick Scott, ayaa ku dooday in Midowga Afrika uusan buuxin shuruudaha iyo habraacyada maalgelinta ee ay Mareykanku ka dalbadeen, taas oo ay sheegeen inay muujinayso dayac iyo in aan lagu tixgelin lacagta canshuur bixiyayaasha Mareykanka. Waxay sidoo kale soo jeediyeen in la raadiyo qaab maalgelin kale oo ay dowladaha Afrikaanka ah ka qaadaan mas’uuliyad dheeraad ah.

Hawlgalka AUSSOM, oo hore loogu yaqaanay ATMIS, ayaa ah hawlgal ay Midowga Afrika ku taageerto dowladda Soomaaliya dagaalka ka dhanka ah kooxda Al-Shabaab iyo xasilinta ammaanka dalka. Xaddidaadda maalgelinta Mareykanka ayaa keeni karta saameyn ku saabsan awoodda hawlgalkan, maaddaama Washington uu yahay mid ka mid ah taageerayaasha ugu waaweyn ee dhaqaale iyo qalab ahaanba.

Go’aankan soo jeedinta ah wuxuu imaanayaa xilli Soomaaliya ay weli wajahayo weerarro joogto ah oo ay Al-Shabaab ka fuliso gobollo badan, isla markaana loo baahan yahay taageero ciidan iyo dhaqaale oo joogto ah si loo hubiyo amniga iyo xasiloonida.

Sabdi, 09 August 2025 {HMC}  Dowladda Soomaaliya ayaa ku dhawaaqday in ay xoojineyso xiriirka diblumaasiyadeed ee ay leedahay dalka Singapore oo kamid ah wadamada ugu horumarsan dunida.

Wasiirka Arrimaha Dibadda Soomaaliya, Cabdisalaam Cabdi Cali, ayaa hambalyo u diray Dowladda iyo shacabka Singapore ee u dabaaldegaya sanad-guuradii 60-aad ee xornimadooda.

Wasiir Cabdisalaam ayaa sheegay in dalka Singapore yahay mid horumarsan oo leh hoggaan arragti fog, isla markaasna ay mudan yihiin in laga faa’iideysto.

Wasiirka ayaa xusay in Soomaaliya ay xoojineyso xiriirka diblumaasiyadeed ee ay la leedahay dalkaasi Singapore, lana yeelan doonto wada tashiyo.

Isagoo ku hadlaya magaca Dowladda Soomaaliya, Wasiirka ayaa rajo ka muujiyay in xiriirka saaxiibtinimo iyo iskaashi ee labada dal uu sii xoogaysto, si labada shacabba ay uga faa’iidaystaan.

Dalka Singapore ayaa xurnimada ka helay Maleysiya 9 bishii Agoosto ee 1965, waxaana uu kamid yahay dalalka ugu horumarsan dunida.