Jimco 01 Agoosto 2025 {HMC} Cutubyo ka tirsan Kumaandooska Danab ee Ciidanka Xoogga Dalka Soomaaliyeed ayaa howlgal ballaaran ka wada deegaanka Leego ee gobolka Shabeellaha Hoose, iyo waddada muhiimka ah ee isku xirta gobolkaasi iyo gobolka Bay.

Ujeeddada howl-galka ayaa ah sugidda amniga deegaannadaasi, iyadoo la xakameynayo dhaqdhaqaaqa xubno ka tirsan As oo mararka qaar ku dhuunta halkaas.

Ciidamada Danab ayaa sidoo kale baaritaanno ku sameeyay gaadiidka dadweynaha iyo dadka isticmaalaya waddooyinka, si loo xaqiijiyo nabadgelyada guud ee shacabka ku nool aaggaasi.

Wasaaradda Gaashaandhigga Soomaaliya ayaa qoraal kooban oo ay soo saartay ku bogaadisay geesinimada iyo dedaalka ay muujiyeen ciidamada Danab.

“Wasaaradda Gaashaandhigga Soomaaliya waxay ammaan iyo bogaadin u diraysaa geesiyaasha Danab ee si joogto ah ugu taagan ilaalinta shacabka iyo sugidda xasilloonida dalka,” ayaa lagu yiri bayaanka.

Howl-galkan ayaa qeyb ka ah howl-gallada gaar ah ee kooxda As lagula dagaalamayo, kaasi oo ay ka kaashanayaan ciidamada qaranka iyo kuwa xaq-udirirka deegaanka.

Si kastaba, Dagaalladan oo bilihii lasoo dhaafay uu ku yimid gaabis ayaa horseeday in kooxdu dib ula wareegto deegaanno iyo degmooyin muhiim ah oo ku yaalla Hiiraan iyo Shabeellaha Dhexe, waxaana ugu dambeeyay Moqokori oo illaa iyo hadda ay haysato kooxdu.

Inkastoo Dowladda Soomaaliya ay sheegtay inay ka go’an tahay ciribtirka kooxda As iyadoo kaashanaysa shacabkeeda iyo saaxiibada caalamka, haddana weli ma muuqdo duullaan culus oo kooxda dib looga furanayo deegaanada ay qabsatay.

Jimco 01 Agoosto 2025 {HMC}- Ciidamada Puntland, kuwaas oo fadhigoodu yahay deegaanka Kalabayr ee gobolka Bari, ayaa xalay gacanta ku dhigay laba xubnood oo kamid ahaa firxadkii argagixisada Daacish ee lagu jebiyay hawlgalkii Calmiskaad.

Saraakiil ka tirsan hawlgalkan ayaa xaqiijiyay in labada xubnood oo ajnabi ah laga qabtay buuraha u dhaw deegaanka Kalabayr, halkaasi oo ay u soo firxadeen, kaddib markii ciidamada Puntland si buuxda u kala daadiyeen awooddii mileeshiyaadka Daacish.

Saraakiishu waxay sheegeen in labada argagixiye loo gudbin doono taliska guud ee hawlgalka Calmiskaad ee magaalada Boosaaso, si baaritaan dhammaystiran loo sameeyo, islamarkaana loo horgeeyo hay’adaha garsoorka, gaar ahaan maxkamadda Ciidamada Qalabka Sida ee Puntland.

Ciidamada Puntland ayaa muujiyay dadaal joogto ah oo lagu xaqiijinayo ammaanka iyo xasiloonida gobolka, iyagoo ka hortagaya kooxaha argagixisada ee halista ku haya bulshada.

Jimco 01 Agoosto 2025 {HMC} Guddoomiyaha Maamulka Gobolka Banaadir ahna Duqa Magaalada Muqdisho, Xasan Maxamed Xuseen (Muungaab), ayaa ku dhawaaqay deeq lacageed oo gaaraysa $200,000, taasoo lagu taageerayo dadaallada gurmad ee lagu wajahayo abaarta ba’an ee ka taagan Gobolka Awdal ee Waqooyiga Galbeed Soomaaliya.

Ku dhawaaqistan ayaa timid kadib kulan uu Guddoomiyuhu la yeeshay wasiirro iyo xildhibaanno ka tirsan Dowladda Federaalka Soomaaliya oo laga soo doorto Gobolka Awdal, kuwaasoo uga warramay xaaladda cakiran ee bini’aadantinimo ee gobolkaas ka jirta, gaar ahaan baahiyaha degdegga ah ee ay dadka reer Awdal la daalaa dhacayaan.

Muungaab ayaa sheegay in isu-gurmashada iyo midnimada shacabka Soomaaliyeed ay tahay tiir-dhexaadka samatabbixinta dadka ay abaaruhu saameeyeen.

Wuxuu xusay in Maamulka Gobolka Banaadir iyo shacabka Muqdisho ay garab taagan yihiin walaalahooda Awdal, iyaga oo deeqdan lacageed ugu talagalay in si degdeg ah loogu fuliyo howlaha gargaarka naf-badbaadinta ah.

Deeqdan ayaa si rasmi ah loogu wareejin doonaa Hay’adda Gargaarka iyo Maareynta Musiibooyinka Qaranka (SODMA), si loo hubiyo in si hufan oo qorsheysan loogu adeegsado wax-ka-qabadka abaarta iyo ka hortagga faafitaankeeda.

Jimco 01 Agoosto 2025 {HMC} Madaxweynaha Puntland Siciid Cabdullaahi Deni ayaa Dowladda Federaalka Soomaaliya ugu baaqay inay joojiso dagaallada ay ka waddo gobolka Gedo, isagoo sheegay in colaadahaasi ay carqaladeynayaan dadaallada lagu wajahayo kooxaha argagixisada.

Madaxweyne Deni ayaa tilmaamay inay tahay nasiib darro in dowladda federaalka ay ciidamo u daabusho gobolka Gedo, taasoo keentay iska horimaadyo u dhexeeya ciidamadii dowladda dhexdeeda. Wuxuu xusay in arrintaasi sababtay khasaare isugu jira dhimasho iyo barakac baahsan.

“Waxaan ugu baaqayaa dowladda dhexe in caqligu taliyo oo la xushmeeyo danaha shacabka Soomaaliyeed. Tallaabooyinka haatan socda waxay muujinayaan khatar weyn oo burbur qaran keeni karta, haddii aan laga baaqsan,” ayuu yiri Madaxweyne Deni.

Wuxuu ku eedeeyay dowladda federaalka in ay hurinayso colaado sokeeye oo salka ku haya dano siyaasadeed oo gaar ah, halkii laga filayay inay ilaaliso midnimada iyo wadajirka ummadda Soomaaliyeed.

“Waxaa murugo leh in dowladdii loo igmaday inay difaacdo wadajirka qaranka ay ku mashquulsan tahay abaabulka fowdo iyo dagaallo aan dan guud ka tarayn, iyadoo leh yoolal siyaasadeed oo gaaban,” ayuu yiri Deni.

Madaxweynaha Puntland wuxuu sidoo kale sheegay in tallaabooyinka ay qaadayso dowladda federaalka ay dhaawacayaan kalsoonida iyo taageerada caalamka uu siiyo dib u dhiska Soomaaliya.

Wuxuu hoosta ka xarriiqay in xilli Al-Shabaab ay dib u qabsadeen deegaanno muhiim ah, haddana dowladda federaalka ay ku mashquulsan tahay weerarro ka dhan ah deegaanno nabdoon.

Jimco 01 Agoosto 2025 {HMC} Xuutiyiinta ayaa digniin rasmi ah u diray dalalka Carabta, wuxuu yiri hoggaamiyaha sare ee Xuutiga ; “ Shidaalka aad bixisaan ayaa lagu dilaa ilmaha Qasa.”

Hadalkan waxaa xigay in si lama filaan ah warbaahinta Israa’iil ay diiradda u saareen digniin amni oo loogu sheegayo Israa’iiliyiinta inay ka soo baxaan dhulka Carabta , waxaa lagu celceliyay khatar ka jirta Imaaraadka Carabta oo dhalisay diyaaraddo gaar ah in lagu daabulay diblomaasiyiintii Israa’iil ka joogtay!

Isla markii guddiga amniga Israa’iil ayaa iyagana baahiyay war saxaafadeed ay ku sheegeen inuu go’ay xiriirkii Israa’iil ay lahayd sirdoonka Carabta , waxaa farta lagu fiiqay Abu Dhabi oo la sheegay in kalsooni darro amni ay soo kala dhexgashay! Illaa xataa warbixinta lagu muujiyay labo arrin oo cusub kuwaasoo kala ah:-

Carabta way kacsanyihiin waxayna doonayaan inay nacaybka Yahuudda si ficil ah u muujiyaan ka fogaada!
2 . Israa’iiliyiinta ha is qariyaan yaan lagu arag wax calaamad caddeynaysa inay Yahuud yihiin.
Digniinta golaha amniga Israa’iil, waxaa kaloo lagu sheegay inay Israa’iiliyiinta ka fogaadaan inay muujiyaan inay yihiin Yuhuud, ama adeegsiga astaanta iyo calanka Israa’iil, taa oo ay sheegeen inay ku soo jiidi karto khatar.

Isku xirka dhacdooyinkan, ayaa loo qaatay inay jirto khatar amni oo dhab ah, ama kacdoon bulsho oo ku soo wajahan boqorada kuraastooda ilaashanaya ee Carabta.

Waxaa cad inay Carabta la kulmayaan fadeexad aan taariikhdooda ka hari doonin , muuqaallada ka imaanayana Qasa waxay noqdeen uurku taalo aan go’in, illaa qoysas reer galbeed ah ay cunada joojiyeen, halka Carabta la dhiigga iyo diinta ah Qasa aysan waxba diirin, balse hubaal in aamusnaanta ay dhalin doonto qarax dadweyne!

Khamiis 31 July 2025{HMC}  Allaha u naxariistee Aadan Axmed Khaliif oo kamid ahaa dhalinyarada Magaalada Baladweyne ayaa Duhurnimadii maanta Lagu dilay meel aan ka fogeeyn xerada daraawiishta.

Ehelada aadan ayaa sheegay in aan si dhab ah loo ogeeyn sababta ka dambeeysay Dilka Wiilkooda, waxaana wali meeydkiisa uu yaala Magaalada.

Wararka Qaar ayaa sheegaya in rasaas dad lagu kala Celinayay uu ku dhintay halka kuwa kalena ay sheegayaan in marxuunka iyo Qofka dilka geeystay ay Xurguf hore ka dhaxeeysay.

Ninka dilka geeystay ayaa baxsaday waxaana marxuunka lagu wadaa in maalinta bire ah La aaso Sida ay ehadiisa u sheegeen Hiiraanweyn.

Ma jiro wax war ah oo ka soo baxay Ciidamada Booliska Magaalada Baladweyne ee Gobolka Hiiraan.