Axad 25 May 2025 {HMC} Taliyaha Ciidanka Dhulka ee Xoogga Dalka Jeneraal Sahal Cabdullaahi Cumar iyo wafdi Saraakiil ah oo uu hogaaminayo ayaa gaaray degmada Moqokori ee gobolka Hiiraan,

Guddoomiyaha gobolka Hiiraan Muuse Salaad Wehliye iyo saraakiil ciidan ayaa Taliyaha iyo wafdigiisa ku soo dhaweeyey Degmada Moqokori.

Taliyaha Ciidanka Dhulka Generaal Sahal Cabdullaahi Cumar ayaa Hiiraan u tegay dardargelinta dagaalka Al-shabaab ee ka socda soohdinta gobollada Hiiraan iyo Shabeellaha Dhexe.

Ciidamada Qaranka iyo kuwa deegaanka ayaa maalmihii lasoo dhaafay dagaal adag oo ka dhan ah ururka Al-shabaab ka waday xuduudka goboladda Hiiraan iyo Shabeeladadhexe.

Axad 25 May 2025 {HMC} Dowladdaha ciidamadooda ka jooga Soomaaliya ayaa codsaday in la bixiyo $93.8 milyan oo ah mushaarka iyo kharashaadka la xiriira ciidamadaasi, iyagoo muujiyay niyad jab xooggan oo ay ka qabaan maalgelin la’aanta howlgalka xasillinta Soomaaliya.

Wadamadan, oo ah kuwa loo yaqaan TCCs (Troop Contributing Countries), ayaa ka digay in deymaha is biirsaday ay khatar gelinayaan kalsoonida iyo joogitaanka ciidamadooda ku sugan gudaha Soomaaliya, xilli aan weli si buuxda loogu wareejin masuuliyadaha howlgalka cusub ee AUSSOM.

Sida ay warbixinaha muujinayaan, deymaha la xiriira mushaaraadka iyo kharashaadka ciidamada ee laga leeyahay howlgalka hore ee ATMIS ayaa gaaraya $93.9 milyan. Lacagahan ayaa lagu leeyahay muddada u dhaxaysa 2022 ilaa 2024, waxaana ay u kala baxayaan sidan:

Uganda: $34.5 milyan

Kenya: $15.7 milyan

Ethiopia: $17.2 milyan

Burundi: $18.1 milyan

Jabuuti: $8.3 milyan

Dad ku xeer dheer dhanka amniga ah ayaa sheegay in deymahan ay saameyn weyn ku yeesheen howlgalka, iyadoo la filayo in arrintan si qoto dheer looga doodo shir dhowaan ka dhici doona magaalada Doha ee dalka Qatar. Shirkaas waxaa isugu imaanaya Qaramada Midoobay iyo beesha caalamka.

Qorshaha shirka ayaa ah in laga gaaro xal ku saabsan maalgelinta howlgalka AUSSOM, gaar ahaan kaddib markii Dowladda Mareykanka ay diidday inay maalgeliso, iyadoo kasoo horjeesatay qaraar uu Golaha Ammaanka ee Qaramada Midoobay ansixiyay, kaasi oo qeexayay habka maalgelinta cusub ee howlgalka xasillinta Soomaaliya.