Sabti 24, May 2025 {HMC}  Guuleed Saalax Barre oo ah guddoomiyihii hore ee guddiga doorashada Puntland, ayaa ku eedeeyay madaxweynaha Puntland, Saciid Deni, inuu Puntland usoo kiraystay shirkado calooshood u shaqeystaal ah oo usoo saara kheyraadka Puntland.

“Waxaad hadda la socotaan in si aan sharci ahayn lagula soo baxayo kheyraadkii dabiiciga ahaa ee Puntland, in lasoo kiraystay shirkado calooshood u shaqeystaal ah, in la rabo in la boobo kheyraadkii si gaar ah ku jiray gobollada Sanaag iyo Bari,” ayuu yiri Guuleed Salaax oo maanta Garowe ka dagay.

Guuleed Saalax ayaa sidoo kale ku eedeeyay madaxweyne Deni inuu Puntland ka dhigay shirkad ganacsi oo u adeegta xubnaha qoyskiisa, isagoo tilmaamay in ay meesha kasii baxayso rajadii laga qabay in dib u doorshadiisa ay sixidoonto waxyaabihii ka qaldamay muddo xileedkiisii hore.

Waxa uu sheegay madaxweyne Deni inuu mar kale doonayo inuu dhaqaalaha Puntland ku aado Muqdisho, taasoo sida uu sheegay horey ugu horseedday Puntland in dhaqaalihii uu hoos u dhaco, ayna kordhaan xaaladaha shaqo la’aanta iyo tahriibka dhalinyarada waxbaratay.

Wuxuu sheegay in loo baahan yahay in si wadajir ah looga hortago burburka uu madaxweyne Deni ku wado Puntland. Guuleed waxa hadalkiisa kusii daray in khilaafka Puntland iyo Dowladda Federaalka Soomaaliya uu yahay khilaaf ku saleysan dano gaar ah oo uu Deni ka waayay Dowladda Federaalka.

Guuleed ayaa ahaa murashixii madaxweyne Deni kula tartmay wareeggii ugu dambeeyay ee doorashadii madaxtinimada Puntland ee 2024.

Sabti 24, May 2025 {HMC} Xildhibaannada Golaha Shacabka ee Baarlamaanka Federaalka Soomaaliya ayaa kulan ay maanta yeesheen waxa ay ku ansixiyeen Hindise Sharciyeedka Barakacayaasha, kadib dood dheer iyo akhrisyo rasmi ah oo lagu sameeyay sharciga oo ilaa seddex akhrin maray.

Guddoomiyaha Golaha Shacabka Soomaaliya ayaa ku dhawaaqay kadib codeeyn gacan taag ah oo mudanayaasha ay u qaadeen ansixinta Hindisahaan, waxaana uu sheegay in Xildhibaannada Golaha Shacabka ee ansixiyay Hindise Sharciyeedka Barakacayaasha ee ogol u codeysay 136 xildhibaan, halka ay diideen 4 xildhibaan, wax ka aamusay ma jirin, sidaas ayuu ansax ku noqday hindise sharciyeedkaas.

Guddoomiyaha Golaha Shacabka Sheekh Aadan Maxamed Nuur Madoobe ayaa sheegay in sharcigan uu yahay mid muhiim ah maadaama Soomaaliya ay leedahay tiro badan oo barakacayaal ah kuwaas oo u baahan daryeel sharci iyo adeegyo bulsho.

Intaasi kadib Wasiiru dowlaha Wasaaradda Arrimaha Gudaha, Federaalka iyo Dib u heshiisiinta Soomaaliya Saadaad Maxamednuur Caliyow ayaa uga mahadceliyay Mudanayaasha Baarlamaanka sida ay hinsidasahaan u meelmariyeen taa oo muhiim gaar ah u leh Xaquuqda barakacayaasha Soomaaliya.

Hindisahan sharciyeed ayaa la filayaa inuu xoojin doono ilaalinta xuquuqda barakacayaasha gudaha dalka iyo sidoo kale dardargelinta adeegyada lagama maarmaanka u ah noloshooda waxaana Xildhibaanada Golaha Shacabka horgeeysay Wasaaradda Arrimaha gudaha ee Xukuumadda Soomaaliya.