Isniin 28, April 2025 {HMC} Taliyaha ciidanka booliiska Soomaaliyeed Sarreeye Guuto Asad Cismaan Cabdullaahi, 34 sanno kaddib dib u howlgeliyey hoggaankii dhismaha ciidanka booliiska oo qaabilsanaa hirgelinta dhismayaasha dowladda iyo horumarinta adeegyada kaabayaasha dhaqaale ee guud ahaan Dalka.

G/le Sare Axmed Xusseen Maxamed ayuu taliyuhu u magacaabay dhawaan hoggaanka shismaha, waxaana markiiba uu ka howlgalay diyaarinta qorshaha uu hogaankan ku howlgalayo, isagoo kaashanaya khubaro uu taliyuhu u xushay dib u howlgelinta shaqadii uu dowladda u hayey Hogaankaa, si markale dib loogu howlgeliyo awoodii uu u lahaa hirgelinta dhismahayaasha dowladda .

Gudoomiyaha gobalka Banaadir Maxamed Axmed Amiir, ayaa taliyaha guddoonsiiyey ruqsadda uu gobalka Banaadir uu hoggaanka dhismaha uga howlgeli karo si uu doorkiisa uga qaato hirgelinta dhismayaasha iyo dib u habeynta xarumaha loogu adeego bulshada ee gobalka Banaadir ku yaala.

Dib u howlgelinta hoggaanka dhismaha, ayaa soo celinaya nidaamka dowladmimo ee dhinaca dhismayaasha dowliga iyo awoodii uu hogaankaasi ulahaa fulinta adeegyadaasi, waxa uuna sanadihii lasoo dhaafay hoggaankan ahaa mid magac ahaan kaliya u jiray.

Isniin 28, April 2025 {HMC} Mas’uuliyiin ka tirsan maamul goboleedka Puntland oo shir ku yeeshay magaalada Garoowe, ayaa soo saaray go’aanno adag oo ku saabsan xakamaynta tahriibta dhallinyarada oo dhawaanahan xargaga goosatay si weyna u kordhay.

Shirkan waxaa ka qayb-galay mas’uuliyiinta labada wasaaradood ee Amniga iyo duulista Hawada Puntland oo ay weheliyaan saraakiisha Booliska, Laanta Socdaalka (Immigration) iyo mas’uuliyiinta garoonka diyaaradaha Garoowe, waxaana ka soo baxay go’aanno ku saabsan xakamaynta Tahriibta.

Shirka ayaa lagu go’aamiyay in si buuxda looga hortago dhammaan falalka tahriibinta iyo socdaalka sharci-darrada ah ee sii kordhaya, gaar ahaanna dhalinyarada sida sharci-darrada ah looga dhoofiyo garoomada Puntland, kuwaasi oo adeegsada dukumentiyo been abuur ah oo suuqa laga sameeyay.

“Qof kasta oo lagu qabto garoomada Puntland isagoo ku lug leh tahriib ama adeegsanaya dukumentiyo been abuur ah, waaa in ay si wadajir ah tallaabo adag uga qaadaan Laanta Socdaalka (Immigration) iyo Booliska, si sharciga la marsiiyo” ayaa lagu yiri Qoraal ka soo baxay Shirkaasi.

“In si adag oo dhakhso leh sharciga loo mariyo tahriibayaasha iyo shabakadaha tahriibta shaqeeya, islamarkaana shirkadaha diyaaradaha iyo kuwa tigidhada ay ka wda wada shaqeeyan hubinta saxda ah ee dokumentiyada rakaabka u safraya dibadda, si aysan ugu dhuuman Tahriibayaasha” ayuu sii raaciyay go’aanka dowladda.

Dhallinyaro badan oo Soomaaliyeed oo tahriib ahaa , ayaa ka dhoofay garoomo diyaaradeed oo kuyaalla deegaannada Puntland, waxa ayna inta badan dhallinyaradan loo qaadayay dalka Algeria, halkaas oo hadda ka furmay marin cusub ay usii maraan Yurub dhallinyarada tahriib doonta ah.

Isniin 28, April 2025 {HMC} Kuuriyada Waqooyi ayaa markii ugu horreysay si rasmi ah u xaqiijisay in ay ciidamo u dirtay Ruushka si ay uga taageeraan dagaalka ka dhanka ah Ukraine.

Warbixin ay baahisay wakaaladda wararka ee dawladda Kuuriyada Waqooyi, ayaa lagu sheegay in hoggaamiyaha dalkaas, Kim Jong Un, uu go’aansaday in ciidamo dagaal loo diro Ruushka, iyadoo la raacayo heshiiska difaaca wadajirka ah ee labada dal.

Sida ay sheegtay Wakaaladda, Kim Jong Un ayaa amray in ciidankaasi la diro si ay “u baabi’iyaan una tirtiraan kooxaha neo-Nazi ee Ukraine” isla markaana ay gacan ka geystaan xoreynta gobolka Kursk, iyaga oo taageeraya ciidamada Ruushka.

Mas’uuliyiin ka tirsan sirdoonka Mareykanka, Kuuriyada Koonfureed, iyo Ukraine ayaa horay u sheegay in Kuuriyada Waqooyi ay dhamaadkii sanadkii hore u dirtay Ruushka ilaa 10,000 ilaa 12,000 oo askari.