Khamiis 13-02-2025 {HMC} — Washington — Madaxweyne Donald Trump ayaa Arbacadi sheegay, in uu si kala gooni gooni ah uu Arbacadi shalay khadka telefoonka kula hadlay, madaxweynayaasha Ruushka iyo Ukraine, Vladimir Putin iyo Volodymyr Zelenskiy, kuwaas oo uu sheegay in ay muujiyeen rabitaankooda ku aadan xal nabadeed oo laga gaaro colaadda u dhaxeysa.

Madaxweynaha Mareykanka ayaa sheegay in uu saraakiisha sare ee Mareykanka ku amray, billaabidda wadahadallo ay arrintan kala galaan Ruushka iyo Ukraine, si loo dhammeeyo dagaalka ka socda Ukraine.

Wadahadalladan ayaa yimid, saacado kaddib markii uu xoghayaha difaaca Mareykanka uu dalka Jarmalka ka sheegay, in xukuumadda Kyiv ay tahay in ay ka tanaasusho, himilooyinkii ay muddada dheer ku taameeysay ee ah, in ay ku biirto isbaheysiga militariga ee NATO iyo in ay dib u soo ceshato dhammaan dhulkii uu Ruushka ka qabsaday.

Tani ayaa muujisay isbedel weyn oo ku yimid siyaasadihi Washington ee dagaalka Ukraine.

Madaxweyne Trump wuxuu wariyaasha ugu sheegay, in uu madaxweyne Putin uu kula kulmi doono dalka Sacuudiga dhawaan.

Khamiis 13-02-2025 {HMC} — Fagaare ku yaal magaalada Baydhabo ee xarunta KMG ah ee maamul Goboleedka Koonfur galbeed ee Soomaaliya ayaa dil toogasho ah lagula fuliyey labo nin oo lagu helay in ay horay dil ugu geysteen gabar Soomaaliyeed.

Raggan dhallinyarada ah oo lagu kala magacaabi jirey Mukhtaar Maxamed Nuur iyo Nuur Maxamed Xasan oo labaduba 20 sano jirro ah, ayaa lagu helay dilka Luul Cabdiladiif Macallin, taas oo toorrey lala dhacay, ka hor inta aan laga qaadan telefoonka gacanta oo nuuciisu ahaa Samsung A15, sida ay sheegtay maxkamadi.

Xafiiska Xeer Ilaalinta Dowlad-goboleedka Koonfur Galbeed oo xukunka toogashada ka akhriyey goobtii lagu fulinayey, ayaa qisaastooda u cuskaday dil bareer ah oo ay 9-kii Fabraayo 2025 ay magaalada Baydhabo ugu geysteen marxuumad Luul.

Dacwad oogayaasha kiiskan ayaa markii hore ku andacoodey in marxuumadda la kufsaday ka hor intii aan la dilin, balse eedeysaneyaasha dambigaas waa lagu waayey.

Sayga marxuumad Luul oo goobta ka hadlay ka gadaal markii xukunka lagu fuliyey raggii diley xaaskiisa, ayaa dowladda Koonfur Galbeed uga mahadnaqay sida ay uga jawaabeen codsi uu u diray maalmo ka hor, kaas oo uu ku dalbaday in caddaalada la mariyo gacan-ku-dhiigleyaasha.

Ninkan oo magaciisa ku soo koobay Ilyaas, islamarkaana lugaha naafo ka ah ayaa warbaahinta la hadlay isagoo kor loo sido, wuxuuna sheegay in uu ku faraxsan yahay sida dhakhsiyaha leh ee loo fuliyey xukunka.

Fagaaraha ay ka dhacday toogashada raggan ayaa waxaa goobjoog ka ahaa garsooreyaashii riday xukunka, mas’uuliyiin iyo dadweyne fara badan oo u soo daawasho tagey fulinta xukunka qisaasta ah.

Wasiirrada Caddaaladda iyo Amniga Gudaha Koonfur Galbeed oo qisaasta ka dib warbaahinta la hadlay, ayaa bogaadiyey laamaha ammaanka iyo cid walbo oo gacan ka geysatey soo qabashada gacan-ku-dhiigleyaasha, wuxuuna dhanka kale hay’adaha garsoorka ku ammaanay sida ay u dadajiyeen oofinta xukunka.

Wasiirrada ayaa dhankooda ballanqaaday in dowladda Koonfur Galbeed ay ka go’an tahay fulinta caddaalada, si loo helo amni iyo kala dambeyn.

Dhacdada lagu diley Luul Cabdiladiif Macallin, ka dibna looga qaatay teleefoon nuuca gacanta lagu qaato ah ayaa soo jiitey dareenka dadweynaha, taas oo keentay in degdeg looga dabatago dadkii falkan geystey.

Gaboodfallada ka dhanka ah haweenka iyo hablaha yaryar, ayaa indhawaalaba ku soo badanayey Soomaaliya, walow inta badan dhibbaneyaashu aysan caddaalad helin sida ay dad badani qabaan.

Ma ahan markii ugu horreysey ee xukun dil ah lagula fuliyo Baydhabo gacan-ku-dhiigleyaal geysta fal-dambiyeedyo indhaha dadweynaha soo jiitey.

Bishii May 2023, maxkamadda ciidamada ee gobolka Baay ayaa dil toogasho ah ku fulisay labo nin oo ku eedeysnaa in ay horay dilal uga geysteen magaalada Baydhabo. Waxaana lagu toogtey fagaare ku yaal magaalada Baydhabo oo ay goobjoog ka ahaayeen dadweyne badan.

Sidoo kale bishii Agoosto 2020, waxaa sidan oo kale goob fagaare loogu toogtey labo nin oo lagu helay in ay gudaha magaalada baydhabo kufsi u geysteen ilmo yar. Ragga la toogtey ayaa loo haystey in ay kufsadeen wiilal yaryar, falkaas oo dadweynaha Baydhabo aad uga gilgisheen islamarkaana dadajiyey xukunkooda.

Si kastaba ha ahaatee dilalka haweenka oo aan horay loogu aqoon bulshada Soomaaliyeed dhexdooda ayaa kiisas la xiriira u muuqdaan baryahaan in aad loo maqalyo meelo kala duwan oo Soomaaliya ah.

Khamiis 13-02-2025 {HMC} — Dowladda Britain ayaa Arbacadan sheegtay inay adkeynayso sharciyada socdaalka, si ay uga dhigto mid ku dhowaad aan suurtagal ahayn in muhaajiriinta sharci la’aanta ah ee doonyaha yaryar kusoo gala ay mustaqbalka helaan muwaadannimada British-ka.

Sida ku xusan tilmaamaha cusub, muhaajiriinta kusoo gala badda ama kuwa isku qariya dhabarka gaadiidka waxaa inta badan loo diidi doonaa muwaadannimada.

“Tilmaamahan waxa ay sii xoojinayaan tallaabooyinka caddeynaya in qof kasta oo si sharci-darro ah ku soo gala UK — oo ay ku jiraan kuwa doonyaha yaryar — uu la kulmayo in codsiga muwaadannimada Britain laga diido,” ayuu yiri afhayeen u hadlay Wasaaradda Arrimaha Gudaha (Home Office).

Xukuumadda Ra’iisul Wasaare Keir Starmer ee xisbiga Labour ayaa cadaadis lagu saarayaa inay dhinto soo-galootiga, kaddib markii xisbiga Reform UK ee uu hoggaamiyo Nigel Farage, oo ka soo horjeeda socdaalka, uu doorashadii guud ee u dambeysay ka helay qiyaastii afar milyan oo cod, taasoo ahayd guul aan hore loogu arag xisbi midigta fog.

Hase yeeshee, isbeddelkan sharciyada waxaa dhaleeceeyay qaar ka mid ah xildhibaannada Labour.

“Haddii aan qof siino maqaam qaxooti, sax ma aha inaan ka diidno waddada uu ku noqon lahaa muwaadin British ah,” ayay xildhibaan Stella Creasy ku qortay X, iyadoo intaa ku dartay in siyaasaddan ay “waligood ka dhigeyso kuwa heer labaad ah.”

Free Movement, oo ah bog sharciyada socdaalka ah, ayaa sheegay in isbeddelladan ay leeyihiin awood “lagu xannibi karo tiro badan oo qaxooti ah in ay noqdaan muwaadiniin British ah, taasoo dhaqan-gal ah isla markiiba.”

Waxay tilmaamaha la cusbooneysiiyay ku sifeeyeen “mid aad u naceyb badan oo waxyeello ku ah is-dhexgalka.”

Go’aankan ayaa yimid kaddib markii xildhibaannadu toddobaadkan dood ka yeesheen hindise-sharciyeedka cusub ee Amniga Xuduudaha, Qaxootiga iyo Socdaalka, kaasi oo loogu talagalay in saraakiisha fulinta sharciga la siiyo “awoodo la mid ah kuwa lagula dagaallamo argagixisada” si loo burburiyo kooxaha soo gudbiya muhaajiriinta aan sharciyeysnayn ee ka talaabaya Kanaalka badda.

Socdaalka sharciga ah iyo kan aan sharciga ahayn — oo labaduba haatan maraya heerarkii ugu sarreeyay abid — waxay ahaayeen arrin siyaasadeed oo muhiim ah doorashadii July 2024 oo Starmer uu xilka kula wareegay.

Markii uu xilka la wareegay, wuxuu isla markiiba joojiyay qorshihii ra’iisul wasaarihii isaga ka horreeyay ee Conservative-ka, Rishi Sunak, kaas oo ahaa in laga hortago socdaalka sharcidarrada ah ee UK, iyadoo dadka cusub ee imanaya loogu masaafurinayo Rwanda.

Beddelkeeda, wuxuu ballanqaaday inuu “baabi’in doono burcadda” si loo yareeyo tirada.

Qiyaastii 36,816 qof ayaa laga diiwaangeliyay marinka badda ee England iyo Faransiiska u dhexeeya sanadkii 2024, taasoo ah koror 25 boqolkiiba marka loo eego 29,437-kii yimid 2023, sida ay muujinayaan xogta horudhaca ah ee wasaaradda arrimaha gudaha.