Axad 29, Dec 2024 {HMC} Xiisad colaadeed ayaa weli ka taagan degaanka Jiicboor oo ka tirsan gobolka Mudug halkaasoo ay maalmihii la soo dhaafay ku dagaalamayeen labo maleeshiyo beeleed oo ka soo kala jeeda maamulada Puntland iyo Galmudug.

Warar dheeraad ah ayaa ka soo baxaya dagaalka Jiicboor ee galbeedka gobolka Mudug iyo khasaaraha ka dhashay, iyadoo maleeshiyooyinka ay isku adeegsanayaan hub kala duwan oo u badan qoryaha fudud

Inta la xaqiijiyey dagaalka ayaa sababay khasaare isugu jira dhimashada 11 qof iyo dhaawaca 20 kale shalay oo kaliya, waxaana jira warar khasaaraha intaas ka badinaya

Waxaa socda dedaalo lagu doonayo in lagu joojiyo colaada oo ay wadaan waxgarad ka tirsan labada beelood iyo masuuliyiinta labada Maamul ee Galmudug iyo Puntland inkastoo aan weli lagu guuleysan in xabada la joojiyo.

Dagaalka ayaa salka ku haya muran la xiriira cida maamuleysa Jiicboor oo ah dhul abaar ah oo aan laheyn wax nafci ah kuna wanaagsaneyn daaqsiinka arrintaasoo ah arrin nasiib daro ah.

Labada beelood ayaa horey loogu heshiisiiyey gogol ay dhigeen maamulada Puntland iyo Galmudug hase ahaatee heshiiskaas ayaan muddo kooban ka dib burburay ka dib maleeshiyo ka tirsan labada beelood ay dilal isku geysteen.

Axad 29, Dec 2024 {HMC} Warar kala duwan ayaa kasoo baxaya khasaaraha ka dhashay duqeyn culus oo saacadihii lasoo dhaafay ka dhacday gobolka Shabeelaha Hoose, taas oo lala beegsaday saraakiil sar sare iyo xubno ka tirsan kooxda AS.

Duqeynta oo si gaar ah uga dhacday meel u dhow Sabalaale, gaar ahaan aagga deegaanka Haawaay ayaa lagu garaacay goob ay ku shirsanaayeen saraakiil sar sare iyo maleeshiyaad kooxda ka tirsan, sida ay innoo sheegeen ilo wareedyo xilkas ah.

Xubnaha la dilay oo gaaraya ku dhowaad 10 ayaa isugu jiro Soomaali iyo Ajaaaniib, waxaana kamid ah:-

1-Maxamad Maxamuud Saalax Abuu Najiib,
2-Huseen Maxamad Qaasim Abuu Faadil,
3-Maxamad Badhiir Abuu Yaxya,
4- ⁠Abuu Rashiid oo ka soo jeeda dalka Maroco,
5- ⁠Abuu Basiira oo isna ka soo jeeda dalka Yemen,
6-Kamaal Maxamad Cilmi oo ah ninka xukumayay saraakiisha oo dhan.

Wararka ayaa intaasi kusii daraya in xunahan ay diyaarinayeen weeraro ay ka fuliyaan magaalada Muqdisho, kadibna la helay xogtooda oo sidaasi lagu duqeeyay.

Sidoo kale waxaa lagu eedeeyay inay hurinayeen dagaal beeleedyada dalka ka socda, iyaga tashkiilinaya maleeshiyaadka hubka isku haysta ee ku dagaalamaya meelo kala duwan oo kamid ah dalka.

Duqeyntan waxaa ka horreysay mid kale oo ka dhacday aagga degmada Kuunyo Barrow oo lagu dilay horjooge sare oo ka tirsanaa AS, kaas oo u qaabilsanaa gobollada.