Isniin 6 may, 2024 {HMC}  Ra’isul Wasaaraha Xukuumadda Federaalka Soomaaliya iyo wafdi wasiirro ah oo la socda ayaa maanta gaaray magaalada Nairobi ee aasimadda dalka Kenya, waxa ayna wafdigan heshiisyo kala duwan la saxiixan doonaan dowladda Kenya.

Maalmihii lasoo dhaafay magaalada Nairobi waxaa shir uga socday guddiga Wadajirka ah ee Iskaashiga Kenya iyo Soomaaliya, kuwaa oo ka baaraandagayay nuuca heshiisyo cusub ay labada dal ku kala saxiixanayaan Nairobi.

Sida aan xogta ku helnay dowladaha Soomaaliya iyo Kenya ayaana kala saxiixanaya ilaa afar heshiis oo muhiim u ah labada dal, waxaana heshiisyadaasi kamid ah mid la xariira amniga, socdaalka, waxbarashada iyo sidoo kale gaashaandhigga.

Dowladda Kenya ayaa lagu wadaa in ay ogolaato in baasaboorka Soomaaliga loo sahlo dal kugalka ama viisaha, ayna ogolaato baasaboorkaasi in loogu safro kuwa dalalka kale ee Kenya dariska la ah.

Waxaa sidoo kale la filayaa in labada dal ku heshiiyaan in Jaamacadaha dalka Kenya ay aqoonsadaan shahaadooyinka dugsiga sare ee Soomaaliya, si ay jaamacadaha Kenya uga dhigtaan ardayda Soomaaliyeed ee kasoo baxay dugsiyada sare ee Soomaaliya kuyaalla.

Soomaaliya iyo Kenya ayaa sidoo kale kala saxiixan doona in xiriirka ganacsi ee labada dal la hormariyo lana hirgaliyo dhammaan heshiisyadii horey loo galay ee dhinaca ganacsiga, taa oo faa’iido badan ugu jirta dadka iyo dalka Soomaaliya.

Ra’isul Wasaaraha Xukuumadda Federaalka Soomaaliya Xamse Cabbi Barre iyo wasiirro katirsan xukuumadda Federaalka ayaa la filayaa in ay la kulmaan madax iyo wasiirro katirsan dowladda Kenya ayna la saxiixdaan heshiisyada labada dal isku afgarteen.

Isniin 6 may, 2024 {HMC} Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre oo hoggaaminaya wafdi ballaaran, ayaa saakay u ambabaxay Magaalada Nairobi ee caasimadda dalka Kenya.

Xamse Barre iyo wafdiga la socda ayaa magaalada Nairobi u tagaya booqasho rasmi ah oo la xiriirta xoojinta xiriirka iyo iskaashiga ka dhexeeya labada dal ee Soomaaliya iyo Kenya oo xiriir qoto dheer leh.

Ra’isul Wasaaraha Xukuumadda Soomaaliya ayaa inta uu joogo magaalada Nairobi la kulmi doona madax katirsan dowladda Kenya, kuwaa uu kala hadli doono xoojinta xiriirka labada dal iyo sidii loo sii xoojin lahaa iskaashiga labada dal ka dhaxeeya.

Xamse Barre ayaa sidoo kale la filayaa in magaalada Nairobi kula kulmo ganacsatada Soomaalieed iyo jaaliyadda Nairobi ku dhaqan , kuwaa uu iyana uga warbixin doono xaaladda dalka ku sugan yahay .

Isniin 6 may, 2024 {HMC} Xaaladda ka taagan dalka Kenya ayaa kasii dareysa kadib roobabkii lixaadka lahaa ee ka da’ay halkaasi.

Saraakiisha ayaa ku qiyaasay in ka badan 200 oo qof in ay ku dhinteen Kenya tan iyo bishii March, iyada oo 90 kalena la la’yahay.

Kenya oo la daala dhacaysa fatahaado ay dad badan ku dhinteen ayaa geesta kale waxaa laga cabsi qabaa inay wajahdo duufaantii ugu horreysay abid, sida uu sheegay madaxweynaha dalkaasi William Ruto.

“Kenya waxaa laga yaabaa inay wajahdo duufaantii ugu horreysay abid,” ayuu madaxweyne Ruto u sheegay muwaadiniinta isagoo khudbad heer qaran ah u jeediyay dalkaasi, iyada oo xaaladda taagan ay saameysay boqollaal kun oo qof.

Ruto oo Jimcihii hadlay ayaa sheegay in aysan jirin meel kamid ah dalka oo ka badbaadiyay “bur-burka”, wuxuuna ka digay in xaaladda la filayo inay kasii darto maalmaha soo socda, iyadoo la filay cimillo aad u daran.

“Duufaantan oo lagu magacaabo Hidaaya, waxay dhici kartaa wakhti kasta, waxaana la saadaalinayaa inay sababi karto roobab mahiigaan ah, dabaylo iyo mowjado xooggan oo khatar ah kuwaasi oo laga yaabo inay carqaladeeyaan dhaq-dhaqaaqyada badda ee Badweynta Hindiya iyo deegaannada ku teedsan xeebaha Kenya,” ayuu yiri.

Waxa uu intaas kusii daray “Dalkeennu waa in uu si adag oo deg-deg ah uga jawaaaabaa saameeynta dhibaatada ka dhalan karta, lana ilaaliyaa nafta iyo hantida.”

Madaxweyne William Ruto ayaa sidoo kale amar ku bixiyay in dhammaan dugsiyada la xiro muddo aan la cayimin kadib roobabkii lixaadka lahaa ee dalkaasi ka da’ay.