Axad-05-may -2024 {HMC} Ra’iisul Wasaaraha Xukuumadda Soomaaliya, Mudane Xamsa Cabdi Barre, ayaa maanta xafiiskiisa ku qaabiley Danjiraha Dowladda Isu-tagga Imaaraadka Carabta u fadhiya Soomaaliya, Mudane Axmed Juma Al Rumaithi.

Kulanka ay yeesheen Ra’isul Wasaare Xamse Barre iyo Safriirka Imaraadaka Carabta ayaa looga wada hadlay xoojinta xiriirka iyo iskaashiga soo jireenka ah ee ka dhaxeeya labada dal ee Soomaaliya iyo Imaaraadka.

Waxa ay sidoo kale kulanka uga wada hadleen sidii dowladda Imaraadka Carabta u kordhin laheyd taageerada dhaqaale ay siiso Soomaaliya, iyo sidii ay u taageeri laheyd ciidanka dowladda ee dagaalka kula jira Al Shabaab.

Dowladda Imaaraadka Carabta ayaa kamid ah dowladaha sida weyn u taageera Soomaaliya , saameyn weyna ku leh siyaasadda iyo maamulka dalka, waxa ayna Imaaraadka dowladda ku taageertaa dhaqaale kala duwan.

Axad 5, May 2024 {HMC} Magaalada Banjul ee caasimadda dalka Gambia, waxaa kulan duceed ku yeeshay Ra’isul Wasaare kuxigeenka Xukuumadda Soomaaliya Saalax Axmed Jaamac iyo Wasiirka Arrimaha Dibedda ee dalka Azerbaijan, Jehun Bayramov.

Kulanka labada masuul yeesheen ayaa looga wada hadlay inta badan xoojinta xiriirka u dhaxeeya labada dal iyo sidoo kale in ay yeeshaan Soomaaliya iyo Azerbaijan iskaashi cusub oo dhinacyo badan leh.

Sidoo kale kulanka ayaa lafa-guray in labada dal iskaashi iyo mowqif mideysan ka yeeshaan arrimaha shirarka caalamka, xoojinta iyo horumarinta danaha wadajirka ee labada dal ee khuseeya ganacsiga, dhaqaalaha, tamarta iyo iskaashiga aadminimo.

Wasiirka Arrimaha Dibedda ee dalka Azerbaijan ayaa ballanqaad la xariira in deeqo waxbarasho siinayaan ardayda Soomaaliya la wadaagay Ra’isul Wasaare kuxigeenka Soomaaliya oo dhankiisa uga mahadceliyay deeqdaasi.

Dowladda Azerbaijan ayaan xiriir muuqan la leh Soomaaliya, waxa ayna deeqdan waxbarasho ay ugu deeqday ardayda Soomaaliyeed noqoneysaa markii ugu horreysay ay ku deeqdo, waxaana haddii laga dhabeeyo ballantan wax badan ka faa’idi doono arday Soomaaliyeed.