Talaado, 9 Dec 2025 {HMC} Ra’iisul Wasaaraha Xukuumadda Federaalka Soomaaliya, Xamse Cabdi Barre ayaa maanta kulan gaar ah la yeeshay Madaxweynaha iyo Agaasimaha Guud ee hay’adda Caalamiga ah ee Samafalka David Miliband, oo booqasho shaqo ku yimid dalka.

Kulanka ayaa waxaa looga hadlay lagu soo hadal qaaday arrimo la xiriira gurmadka abaaraha ka jira qeybo kamid ah dalka oo la sheegay in ay saameysay in badan 4.4 Soomaali ah.

Ra’iisul Wasaaraha muujiyay welwelkiisa la xiriira xaaladda Abaaraha ka jira dalka, isagoo mas’uuliyiinta IRC ka codsaday in ay qeyb ka noqdaan gurmadka dadka wajahaya dhibaatada.

Agaasime David Miliband ayaa ku ammaanay Dowladda Soomaaliya dadaallada ay waddo, isagoo tilmaamay in ay qeyb ka qaadan doonaan gurmadka abaaraha, isla markaasna ay la wadaagi doonaan Xubnaha kale ee Beesha Caalamka.

Ra’iisul wasaare Xamse ayaa maalmihii la soo dhaafay kulamo looga hadlay howlaha isku duwista gargaarka binu aadanimo la yeelanayay saaxiibada Soomaaliya.

Talaado, 9 Dec 2025 {HMC} Faahfaahino dheeraad ah ayaa ka soo baxaya howlgallo ay Ciidanka Kumaandooska Danab ka fuliyeen tuulooyin u dhaxeeya deegaannada Towfiiq iyo Tooratoorow ee gobolka Shabeellada Hoose.

War-saxaafadeed ka soo baxay Wasaaradda Gaashaandhiga Soomaaliya ayaa lagu sheegay in howlgalka lagu qabtay xubno ka tirsan AS iyo hub ay wateen.

Sidoo kale, bayaanka ayaa lagu sheegay in howlgalka intuu socday ay ciidamada gacanta ku dhigeen sarkaal lagu magacaabo Sakariye oo uu dhalay mid kamid ah hoggaamiyeyaasha AS.

Dhinaca kale, ciidamada Danab ayaa gacanta ku soo dhigay mooto ay AS u adeegsan jireen gaadiid ahaan, hub iyo agab kale.

Ugu dambeyn, bayaanka Wasaaradda ayaa lagu sheegay in ciidanka ay sii wadi doonaan howlgallada ay amniga ku xaqiijinayaan ee ay ka wadaan gobollada dalka.

Gobolka Shabeellada

Hoose ayaa waxaa maalmihii la soo dhaafay waxaa ka socday howlgalka Duufaanta Aamusan oo ay qeyb howlgalka Midowga Afrika ee AUSSOM.

Hoos ka akhriso War-saxaafadeedka Dowladda

Talaado, 9 Dec 2025 {HMC} Waddamada Cambodia iyo Thailand ayaa dagaal xooggan uu ka qarxay xuduudaha ay wadaagaan, iyadoo dhinac walba aanu muujinayn wax tanaasul ah tan iyo markii uu burburay xabad-joojintii Axaddii.

Milatariga Thailand ayaa sheegay in ay iska horimaadyo ka dhaceen shan gobol oo xuduudda ah, isla markaana saddex askartooda ka tirsan ay ku dhinteen tan iyo markii uu dagaalku dib u bilowday.

Cambodia ayaa sheegtay in weerarrada Thailand ay ku dileen toddoba qof oo rayid ah.

Hoggaamiyihii hore ee Cambodia ee ruug-caddaaga ahaa, Hun Sen, ayaa sheegay in ciidamada Cambodia ay “ka jawaabeen” weerarrada Thailand ee Talaadadii, ka dib wax uu ku tilmaamay muddadii dulqaadka.

Taliyaha ciidanka Thailand (Chaiyaphreuk Duangpraphat) ayaa sheegay inuu hiigsanayo inuu curyaamiyo awoodda ciidan ee Cambodia.

Talaado, 9 Dec 2025 {HMC} Waxaa xalay magaalada Muqdisho ka dhacay kulan siyaasadeed oo muhiim ah, kaas oo ka qabsoomay hoyga uu magaalada ku degan yahay Guddoomiyaha Golaha Shacabka BFS Sheekh Aadan Maxamed Nuur {Madoobe}

Kulankaas ayaa waxaa iskugu yimid qaar ka mid ah Xildhibaanada Baarlamaanka Federaalka Soomaaliya ee ka soo jeeda Koofur Galbeed.

Kulanka ayaa waxaa hoggaaminayey Guddoomiye Sheekh Aadan Madoobe iyo Madaxweynaha Koofur Galbeed Cabdicasiis Xasan Maxamed {Laftagareen}

Wararka kasoo baxay kulanka ayaa sheegaya in Xildhibaanada iyo Madaxweyne Laftagareen ay isla qaateen go’aanka ah in mar labaad ay u dhisayaan Madaxweyne Cabdicasiis Laftagareen, taas oo sii xoojinaysa qorshaha Laftagareen uu ku doonayo inuu ku helo taageero ballaaran.

Kulamadan ayaa loo arkaa tallaabo uu Madaxweyne Laftagareen ku doonayo inuu ku kasbado beelaha iyo siyaasiyiinta kasoo jeeda deegaanada Koofur Galbeed, iyada oo uu Muqdisho ka wado socdaallo iyo kulamo siyaasadeed oo xoogan.

Horey, Madaxweyne Laftagareen ayaa heshiisyo kala duwan la galay siyaasiyiinta isaga ka soo horjeeday oo uu horeeyo Guddoomiyihii hore ee Golaha Shacabka Maxamed Mursal Sheekh Cabdiraxmaan iyo siyaasiyiin kale, si uu u ballaariyo saameyntiisa siyaasadeed.

Sidoo kale, Laftagareen ayaa la filayaa inuu sii wado kulamo uu la yeelanayo beelo iyo hoggaamiyeyaal kale oo siyaasadeed, si uu u helo taageero cusub oo ku aaddan qorshihiisa mustaqbalka siyaasadeed.

Talaado, 9 Dec 2025 {HMC} Golaha Ammaanka ee Qaramada Midoobay ayaa fadhi gaar ah ka yeelanaya cusboonaysiinta howlgalka Midowga Afrika ee AUSSOM oo waqti ahaan ku siman dhammaadka sanadkaan waa 31ka December 2025.

Howlgalkaan ayaa wajahaya dhibaatooyin dhinaca dhaqaalaha ah kaddib markii maalgalinta dalalkii bixin jiray ay joojiyeen halka qaar kale ay hoos u dhigeen, waxaa socda dedaallo lagu doonayo dalalkaas lagu weydiiyo kaalmo lacageed.

Dhinaca kale, isla fadhiga Golaha Ammaanka waxaa looga doodayaa qaraarka tirsigiisu yahay 2713 ee ka dhanka ah ‘AS’ isla markaana lagula soconayo xayiraadda Badda si aanay ‘AS’ wax uga degin, waqti ahaan waxa uu ku siman yahay 13ka Bishaan.

Golaha Ammaanka ee Qaramada Midoobay ayaa rajo xumo ka muujiyay haddii Xafiisyadaan iyo qaraaraddaan isku sidkan ay waayaan taageero caalami ah maadaama sanado badan ay ku howlanayeen la dagaalanka ‘AS’ sida hadalka loo dhigay.

Sidoo kale waxa uu Golaha Ammaanka dhagaysan doonnaa warbixin la xiriirta wakiilladiisa Soomaaliya si ay ula wadaagaan waxyaabaha qabsoomay, muhiimadda ay leedahay muddo kordhinta iyo caqabadaha dhaqaale ee horyaalla AUSSOM.