Khamiis -Janaury-11-{HMC} Maxkamad kutaalla dalka Liberia ayaa xukun adag oo xabsi daa’in ah ku riday wasiirkii hore ee Wasaaradda Caddaaladda dalka Liberia Gloria Maya Musu-Scott , oo lagu helay in ay si ula kac ah u dishay qof ehelkeeda ah

Gloria Maya Musu-Scott oo sidoo kale horey usoo noqotay xaakim ayaa maxkamadda ku heshay in ay ku lug laheyd dil bareer ah oo loo geestay shaqsi lagu magacaabo Carlo Musu oo 29 jir ahaa

Siyaasiyadan caan ku aheyd u halgamidda xuquuqda haweenka dalka Liberia ayaa hadda ku jirta xabsi kuyaalla dalkaasi, waxaana la filayaa in xukunkan adag ee lagu riday ka qaadato racfaan

Gloria Maya Musu-Scott oo 70-sanno jir ah iyo saddex dumar oo kale ayaa maxkamadda ku heshay in ay si ula kac ah dhaawac halis ugu geesteen Carlo Musa, oo markii dambe dhaawacaasi u dhintay bishii June ee sannadkii hore.

Khamiis -Janaury-11-{HMC}  magaalada Muqdisho ee caasimada Soomaaliya ayaa waxaa maanta ka socda dibadbax weyn oo looga soo horjeedo damaca Itoobiya ee badda Soomaaliya, kadib heshiiskii ay wada galeen maamulka Somaliland iyo Itoobiya

Banaanbaxa oo ay ka qayb-galayaan kumanaan shacab ah iyo mas’uuliyiin ka tirsan dowladda ayaa haatan ka bilowday isgoyska KM4 ee magaalada Muqdisho

Dibad-baxayaasha ayaa ku qaylinaya erayo ka dhan ah Itoobiya oo ku kacday xadgudub ka dhan ah madax bannaanida dhuleed ee Soomaaliya

Sidoo kale waxaa xiran waddooyinka waa weyn ee magaalada Muqdisho, ayada oo lasoo dhoobay ciidamo ka tirsan kuwa ammaanka ee dowladda Soomaaliya

Goobaha waxbarashada iyo ganacsiyada ayaa sidoo kale la xiray, kadib markii ay amartay dowladda Soomaaliya oo iyadu soo qaban-qaabisay dibadbaxaan

Horay reer Muqdisho ayaa u dhigay dibad-bax ay ku diideen heshiiska badda ee Somaliland iyo Itoobiya, kaas oo uu soo qaban qaabiyay maamulk gobolka Banaadir

Soomaaliya ayaa si weyn uga carootay heshiiska Muuse Biixi Cabdi iyo Abiy Axmed, kaas oo Itoobiya loogu saxiixay 20 KM oo kamid ah badda Soomaaliyeed.

Khamiis -Janaury-11-{HMC}  Faah-faahino dheeraad ah ayaa kasoo baxaya dhacdo argagax leh oo xalay ka dhacday magaalada Dhuusamareeb ee xarunta Galmudug, kadib markii lagu gowracay gabar Itoobiyaan ah oo kasoo jeedo qowmiyadda Oromada

Nin mindi ku hubeysan ayaa lagu soo warramayaa inuu gabadha ku dilay xaafadda Waxar-cadde ee magaaladaasi, kaas oo la sheegay inuu qabay xanuun dhanka dhimirka ah

Guddoomiyaha xaafadda ay dhacdadu ka dhacday ayaa ka warbixiyay falkaasi, wuxuuna u sheegay in gabadho ay shaqaale ahayd, isla markaana uu dilay ninka xanuunsan

Sidoo kale wuxuu intaasi raaciyay in si arxan darran uu ninka u dilay gabadha oo Muslimad ahayd, isla markaana uu dhowr jeer la dhacay tooreyda ama mindida

Guddoomiyaha xaafadda Waxar-cadde oo hadalkiisa sii wata ayaa sheegay in dhacdan ay tahay wax ku cusub Dhuusamareeb, wuxuuna shacabka ugu baaqay inay si dajiyaan

“Waxaa ka rabaa bulshada inay is dajiso wuxu way dhaceen xag Ilaahey ayaa ka qornaayeen ka maamul ahaan iyo ka shacab ahaan aad ayaan uga xunahay falkaasi, waa arrin ugub nagu ah” ayuu mar kale yiri guddoomiyaha xaafadda Waxar-cadde.