Sabti-December-23-2023-{HMC}  Ciidanka xoogga dalka, gaar ahaan guutada 14-ka October ayaa maanta deegaanka Jannaale ee gobolka Shabeelaha Hoose kusoo bandhigay nin la sheegay in uu katirsanaa dagaalyahannada A,S oo isku soo dhiibay ciidanka milatariga

Cabdirashiid Maxamed Cabdi {Indhacadde} oo kooxda A,S katirsanaa muddo shan sanno ah ayaa kasoo baxay kooxdaasi, waxa uuna xiriir lasoo sameeyay iskuna dhiibay ciidanka dowladda ee Jannaale ku sugan

Ninkan oo kasoo jeeda magaalada Baydhabo ayaa sheegay in kooxda A,S ku biiray sannadkii 2018-kii, waxa uuna tilmaamay in uu kasoo qeyb qaatay dagaallo badan oo ka dhacay gobolada Baay iyo Shabeelaha Hoose.

Waxa uu sheegay Cabdirashiid Indhacadde in dhibaatooyin badan kala soo kulmay kooxda A,S intii uu katirsanaa, waxa uuna xusay in uu go’aansaday in uu isaga soo tago kooxdaasi uu sannadaha badan kasoo tirsanaa

Dowladda Soomaaliya ayaa deegaanno lala duwan maalmihii lasoo dhaafay kusoo bandhigtay xubno katirsaaa A,S, kuwaa oo dowladda sheegtay in ay kasoo baxeen kooxdaasi kana faa’iideesteen cafiskii loo fidiyay.

Sabti-December-23-2023-{HMC}  Diyaaradaha dagaalka dowladda Mareykanka ayaa xalay saqdii dhaxe iyo saakay aroortii hore duqeymo dhinaca cirka ah ku garaacay dhulka Howdka ah ee Jeexjeexa oo u dhexeeya deegaannada Caad iyo Cadaley ee Koofurta gobolka Mudug

Taliyaha Ciidanka Xoogga Dalka Soomaaliyeed S/Gaas Ibraahim Sheekh Muxudiin Cadow ayaa sheegay in weerarka lagu beegsaday goob ay isku aruursanayeen dagaallamayaal katirsan A,s , sidoo kale lagu diyaarinayay qaraxyo baabuur

Waxa uu sheegay taliyaha in howlgalka ka dhacay howdka Jeexjeexa lagu dilay 50 xubnood oo katirsan kooxda A.s , kuwaa oo isugu jira saraakiil iyo dagaalyahanno, waxa uuna intaa ku daray in weerarka lagu dhaawacay 40-dagaalyahan oo kale

Weerarkan ka dhacay koonfurta gobolka Mudug ayaa imaanaya xilli ciidamada dowladda ay wadaan howlgalo ay ku doonayaan in guud ahaan A,s kaga saarayaan gobolkaasi, gaar ahana dhulka howdka ah ay ku dhuumaaleesanayaan.

Wararka naga soo gaaraya xeebaha bari ee Puntland ayaa sheegaya in mar kale kooxaha burcadbadeeda Soomaalida ay qaadeen weeray cusub oo ay kusoo afduubteen markab 2aad, xilli uu marayay meel u dhow xeebaha degmada Eyl

Warbixin kasoo baxday hay’adda la socodka ganacsiga badaha ee dalka Britain ayaa lagu xaqiijiyay weerarkan oo dhacay Jimcihii shalay, kaas oo lagu afduubtay markab yar

Hay’adda ayaa shaaca ka qaaday in koox hubeysan oo burcadbadeed ah ay markabkaas oo ahaa mid ganacsi ay ku qabteen xeebaha Puntland, balse ay haatan wadaan baaritaano

Sidoo kale waxa ay hay’addu sheegtay inay la hadashay mas’uuliyiinta shirkadda iska leh markabkaas oo xaqiijiyay inuu u gacan galay kooxaha burcadbadeeda Soomaalida

Tani ayaa sii kordhineysa welwelka laga qabo in burcadbadeedda Soomaalida ay mar kale dib usoo laba kacleeyeen, kadib muddo ay ka caaganayeen xeebaha Soomaaliya

Weerarkan waxaa ka horreeyay mid kale oo laba todobaad ka hor ka dhacay Badda Gacanka Cadmeed, kaas oo lagu soo afduubtay markab weyn oo lala soo aaday xeebaha Soomaaliya, gaar ahaan deegaannada xeebaha ee bariga maamul goboleedka Puntland

Markabkaas ayaa lagu magaacaabaa Ruen, waxaanalaga leeyahay dalka Bulgaria, balse waxa uu ku socdlaayay calanka Malta, isaga oo ku soo jeeday dhanka Soomaaliya

Wararka ayaa sheegaya in haatan markabkaas uu ku sugan deegaanka Durdura oo qiyaastii 250km dhanka bari kaga beegan magaalada Boosaaso halkaas oo uu baroosinka dhigtay, ka dib markii uu joojiyey socodkii uu dhowrkii cisho ee la soo dhaafay uu sameynaayay

Dhanka kale ciidamada badda ee Ururka Midowga Yurub ayaa dhankooda wada dadaallo dheeraad ah oo ku aadan weerarada burcadbadeeda Soomaalida, si looga hortego

Afduubkan ayaa noqonaya kii ugu horeeyay oo ka dhaca Xeebaha Soomaaliya ku dhowaad 10 sano, taas oo kasoo bilaabaneyso sanadkii 2017-kii oo laga adkaaday burcadbadeeda.

Sabti-December-23-2023-{HMC}  Xafiiska Arrimaha Dibadda, Barwaaqo-sooranka & Horumarinta ee loosoo gaabiyo (FCDO) ee Dowladda Ingiriiska u qaabilsan Horumarinta Dibadda ayaa Soomaaliya ugu deeqday lacag dhan $9 milyan oo Doollar oo lagu darayo mashruuca ADRifi

Mashruucaan waa mid Bangigaga Horumarinta Afrika oo Hay’adda Maaraynta Musiibooyinka Qaranka SODMA ay fuliye ka tahay, Xafiiska ayaa ballanqaadkaan sameeyay intii lagu guda jiray shirkii Caalamiga ahaa ee lagu falanqaynayay arrimaha isbaddelka cimiliiada COP28 ee ka dhacay Isutagga Imaaraatka Carabta

Guddoomiyaha Hay’adda Maaraynta Musiibooyinka Qaranka Soomaaliyeed ee SODMA Maxamuud Macallin Cabdulle ayaa deeqdaan uga mahadceliyay Xafiiska Arrimaha Dibadda, Barwaaqo-sooranka & Horumarinta {FCDO} ee Dowladda Ingiriiska u qaabilsan Horumarinta Dibadda isaga oo sheegay in uu ku ammaanan yahay kaalintaan

Tallaabadaan waa mid ka qaybqaadan karta xakamaynta iyo wax ka qabashada xaaladaha bani aadamnimo ee Soomaaliya sida raadadkii ay ka tageen abaaraha, Daadadka Roobka Dayrta ee curtay horraantii Oktoobar 2023 & Fatahaadda Webiyada Dalka.