Isniin Nofembar 20, 2023 {HMC} Warbaahinta dalka Hindia ayaa aad u hadal heysa ammar kasoo baxay masuuliyiinta maamulka Hyderabad ee ku taalla Koonfurta dalka Hindia, kuwaa oo doonaya in magaaladaasi laga mamnuuco dadka tuugsanaya.

Maamulka magaalada ayaana sheegay in qorsheenayaan kahor 15-ka bisha December ee sannadkan in magaalada laga sifeeyo gabi ahaan dadka tuugsanaya, kuwaa ay ku eedeeyeen in ay wax u dhimeen sumcada magaalada iyo dadkeeda.

Waxaana loo ballan-qaaday dadka soo sheega sidoo kale keena xogta dadka magaalada ku dhax tuugsanayo in la siinayo abaal-marin lacageed oo dhan 500 oo rupee oo u dhiganta 7 doolarka Mareykanka.

Taliyaha booliiska ee magaalada Hyderbad ayaa ku dhawaaqay labo billood oo magaalada laga mamnuucayo dadka tuugsada, waxa ayna booliiska bilaabeen in meelaha qaar ka qab qabtaan dadka tuugsada.

Tallaabadan booliiska iyo masuuliyiinta magaalada Hyderbad qaadeen ayaa la sheegay in ay salka ku heyso booqasho magaaladaasi ku tageyso Ivanka Trump oo ah gabadha madaxweynihii hore ee Mareykanka, waxaana arrintan beeniyay masuuliyiinta magaalada.

Isniin Nofembar 20, 2023 {HMC} Milatariga Israa’iil ayaa siidaayay muuqaal kaamirooyinka CCTV-ga ah oo muujinaya laheysteyaal Israa’iiliyiin ah oo la geynayo isbitaalka al-Shafa, oo ah isbitaalka ugu weyn Qasa, kaddib weerarradii 7-dii Oktoobar ee Xamaas.

Afhayeen u hadlay ciidamada Israa’iil ayaa sheegay in mid ka mid ah dadka la qafaashay oo ahayd haweeney askariyad ah lagu dilay halkaas.

Waxa uu sheegay in 19-sano jir ka tirsaneed ciidamada Israa’iil oo lagu magacaabi jiray Captain Nova la dilay ka dib markii isbitaalka la keenay iyadoo dhaawac fudud ah.

Israa’iil ayaa ku celcelisay in Xamaas ay isbitaalka al Shifa ka dhigtay saldhig, balse Xamaas ayaa arrintaa beenisay.

“Saaka waxaan ku wargelinnay qoyska Nova, sidaan ogaannay, waa la afduubay oo waxaa lagu hayay guri ku dhow isbitaalka al-Shafa,” afhayeenka milatariga Israa’iil Daniel Higri ayaa sidaa u sheegay wariyaasha.

Xamaas ayaa hore u sheegtay in Marciano Nova oo ka tirsanayd ciidamada Israa’iil lagu dilay weerar cirka ah oo ay Israa’iil fulisay, kaas oo ay milatariga Israa’iil sheegeen in uu dhacay 9-kii November.

Afhayeenka milatariga Israa’iil Rear Admiral Hagari ayaa dib u daawaday muuqaalka CCTV oo uu sheegay in laga soo bilaabo subaxnimadii 7-dii October, maalintii Xamaas ay weerar kedis ah ku qaaday koonfurta Israa’iil kaas oo ay ku dhinteen 1,200 oo Israa’iiliyiin ah. Tirada dadka Xamaas qafaalatay ayaa lagu sheegay 240 qof.