Axad 19 Oct 2025 {HMC} Ra’iisul Wasaaraha Xukuumadda Federaalka Soomaaliya, Xamza Cabdi Barre, oo maanta khudbad muhiim ah ka jeediyay Shirka 5-aad ee Nabadda iyo Horumarka Afrika oo lagu qabtay magaalada Aswan ee dalka Jamhuuriyadda Carbeed ee Masar, kaas oo cinwaankiisu yahay “Awoodda Afrika ee Horumarka iyo Isbeddelka Adduunka Casriga ah” ayaa sheegay in Soomaaliya ay cagta saartay waddada horumar waara, iyada oo ka gudubtay dhibaatooyinkii amni, dhaqaale iyo siyaasadeed.

Ra’iisul Wasaaraha ayaa tilmaamay guulaha la taaban karo ee dowladdu gaartay, kuwaas oo ay ka mid yihiin: Dib-u-dhiska dowladnimada iyo hay’adaha Qaranka,
Deyn cafinta, kor u qaadista xiriirka Soomaaliya la leedahay waddamada gobolka iyo caalamka,
Qaadista cunaqabateyntii hubka ee saarneyd dalka muddada dheer, iyo
Amni oo hormar ballaaran laga gaaray gaar ahaana dhankan la dagaallanka kooxaha Khawaarijta.

Ra’iisul Wasaare Xamza Cabdi Barre ayaa sidoo kale soo bandhigay Hannaanka Qaran ee Isbeddelka 2025–2030, oo ah qorshe diiradda saaraya lix tiir oo waaweyn:
Sida Dib-u-dhiska iyo kaabeyaasha dhaqaalaha,
Kobcinta dhaqaalaha iyo shaqo abuurka,
Horumarinta adeegyada bulshada sida waxbarashada iyo caafimaadka,
Amniga cuntada iyo horumarinta beeraha,
Ilaalinta deegaanka iyo horumarinta tamarta nadiifta ah,
Daahfurnaanta maamulka iyo hufnaan dowladeed oo dhab ah.

“Soomaaliya maanta waa dal kasoo baxay colaado iyo burbur, kuna socdo dhabbihii horumar iyo barwaaqo waarta, iyadoo aan cidna laga reebaynin dadaallada qaran ee lagu dhisayo mustaqbal mideysan,” ayuu yiri Ra’iisul Wasaaraha.

Ra’iisul Wasaaraha ayaa uga mahadceliyay Dowladda Masar doorkeeda joogtada ah ee ay ku taageerto Soomaaliya, gaar ahaan dhinacyada nabadda, dib-u-dhiska iyo iskaashiga, isagoo xusay in xiriirka walaaltinimo ee ka dhexeeya labada dal uu yahay mid taariikhi ah oo sii xoogeysanaya.

Axad 19 Oct 2025 {HMC} Soomaaliya ayaa fursad wayn heshay oo dhinaca iibka Xoolaha nool kaddib markii Australia ay joojisay xoolihii ay dhoofin jirtay, waxaa kale oo suuqa ka baxay Suudaan oo colaadda sokeeye saamayn taban ku reebtay Idihii loo dhoofiyay Khaliijka.

Sanadkii 2021 waxa ay Soomaaliya kasoo xaraysay lacag dhan $523 Milyan oo doollar, halka sanadkii lasoo dhaafay 2024 oo isbaddel ka muuqdo waxaana uu gaaray dhaqaalaha laga helay $974 Milyan oo doollar sida lagu sheegay warbixintaan.

Labada jeer ee Soomaaliya dhaqaalaha ka duwan ka heshay Iibka Xoolaha nool waxaa suuqa kula jiray Suudaan & Australia balse markaan way ka baxeen, waxaa muuqda fursad ah in ay heli karto in ka badan Hal Bilyan oo doollar oo kasoo xaroon karta iibinta Xoolahaas.

Agaasimaha Caafimaadka Xoolaha ee Wasaaradda Xannnaanada Xoolaha Soomaaliya Qaasim Cabdi Macallim ayaa sheegay in suuq ka bixista Australia ay Soomaaliya u tahay fursad wayn, isaga oo sheegay in loo baahan yahay in laga faa’iidaysto.

“Kororka dhoofinta waxaa sabab u ah laba arrimood oo muhiim ah, tan 1aad waa dagaalka sokeeye ee Suudaan oo saameeyay dhaqaalahooda, tan 2aad waa Australia oo hoos u dhigtay dhoofinta xoolaha nool ee ay u dirto dalalka Khaliijka, Tani waxa ay Soomaaliya ku hoggaaminaysaa in ay hesho faa’iido weyn oo dhinaca xoolaha la dhoofinayo” Qaasim Cabdi Macallim, Agaasimaha Caafimaadka Xoolaha ee Wasaaradda Xannaanada Xoolaha XFS.

Warbixin lagu daabacay Bloomberg ayaa lagu sheegay in 4tii sano lasoo dhaafay in Soomaaliya dhoofinta Xoolaha nool ay ka heshay $2.9 Bilyan oo Doollar, Wasiirka Beeraha Xukuumadda Federaalka Maxamed Cabdi Xayir Maareeye ayaa in sanad weliba dalka laga dhoofiyo xoolo u dhaxeeya 4 Milyan ilaa 6 Milyan oo la geeyo Bariga Dhexe.

Colaadda Suudaan oo aan weli xal waara loo helin & Australia oo si tartiib-tartiib ah u dhimaysa xoolaha ay u iibgaynso Khaliifka waxa ay suuq furan usii yeeleysaa Soomaaliya, Xukuumadda Canberra ayaa damacsan in May 2028 ay gabi ahaanba joojiso dhoofinta xoolaha dalkaas.

Axad 19 Oct 2025 {HMC}  Dibadbax ka dhan ah Madaxweynaha Maraykanka Donald Trump ayaa ka socda Dalkaas, dadweyne aad u fara badan ayaa isugu soo baxay bannaanka Magaalooyin badan oo ku yaalla Waddankaan sida New York, Washington DC, Chicago, Miami & Los Angeles.

Waddooyinka iyo jidadka tareenka dhulka hoostiisa ah ayaa si aad ah waxaa u buux dhaafiyay dadka mudaharaadaya oo sita boorar ay ku qoran yihiin ‘Dimuqraadiyaddu ma ahan Boqortooyo, Dastuurka ma ahan mid ikhtiyaari ah’ iyo ereyo kale.

Qaar kamid ah dadkaas dibadbaxaya ayaa isugu tagay fagaaraha caanka ah ee Times Square ee Magaalada New York, waxaa ku biiray kumanaan kale oo sii xoojiyay isu soo baxooda sida ay muujinayaan muuqaallo ay soo gudbiyeen Warbaahinta.

Taageerrayaasha Donald Trump ayaa si ay u bahdilaan dibadbaxa waxa ay adeegsadeen ereyo adag oo ay ku muujinayaan cidda ka dambeysa sida in ay dhahaan ‘Dibadbaxa waxaa soo abaabulay dhaqdhaqaaqa bidixda ee Antifa’ iyo ‘Waa Dibadbaxa nacaybka Maraykanka’

Booliiska New York ayaa qiray in isusoobaxu uu yahay mid nabad ah isla markaana ay dibadbaxayaan in ka badan 100 kun oo qof oo si xushmad ka muuqato u muujinaya dareenkooda ka dhanka ah waxa ay dhibsadeen.

Donald Trump ayaa wajahaya culays gudaha ah iyo mid dibadda ah, madaxweynahaan ayaa dhowr jeer eedayn xooggan u jeediyay Xisbiga Mucaaradka ah balse jawaab uusan mahdin ayuu kala kulmay xubno katirsan Xisbigaas.

Axad 19 Oct 2025 {HMC} Hay’addaha Amniga iyo socdaalka u qaabilsan Dowladda Federaalka Soomaaliya ayaa magaalada Muqdisho ku yeeshay kulan looga hadlay ka hortaga Tahriibka iyo Xoojinta amniga Xuduudaha.

Kulanka oo uu guddoomiyay Wasiirka Amniga Gudaha XFS, Cabdullaahi Shiikh Ismaaciil Fartaag ayaa waxaa ka qeyb galay Taliyaha Booliska, Agaasimaha Hay’adda Socdaalka iyo Jinsiyadda iyo saraakiisha kale ee labada hay’adood.

Shirka ayaa lagu soo bandhigay istaraatiijiyadda Dowladda ee Wada-shaqeynta hay’adaha amniga ee xuduudaha gaar ahaan sugidda amniga xuduudaha, la-dagaallanka tahriibka iyo dambiyada abaabulan iyo diyaarinta qabo-qoraalka siyaasadda qaran ee soo guryo-noqoshada.

Sidoo kale, shirka ayaa lagu dhisay Guddi isku-dhafan oo diyaarinaya Istaraatiijiyadda Qaran ee sugidda amniga xuduudaha dalka iyo dib u eegista siyaasadaha qaran ee la xiriira ka hortagga tahriibka iyo dambiyada socdaalka, taas oo lagu xoojinayo wada-shaqaynta iyo isku-xirka hay’adaha amniga ee heer qaran.

Kulanka ayaa ku soo aadaya xilli maalmihii la soo dhaafay kordheen dhallinyarrada Soomaaliyeed ee ka tahriibaya dalka, tilaabadaasi oo ay walaac ka muujiyeen Bulshada.