Arbaco 08, Oct 2025 {HMC} Dowladda Maraykanka ayaa sheegtay in ay ka go’an tahay dagaalka lagula jiro argagixisada Soomaaliya, balse ay ku baaqayso in dalalka kale ee daneeya amniga iyo mustaqbalka Soomaaliya ay kordhiyaan taageeradooda dhaqaale.

Wakiilka Kumeelgaarka ee Maraykanka ee Qaramada Midoobay John Kelley oo ka hadlayay kulan ay Golaha Ammaanka ee Qaramada Midoobay yeesheen ayaa sheegay in Soomaaliya weli ay ku jirto xaalad dagaal, isagoo xusay in iskaashiga u dhexeeya Qaramada Midoobay iyo Midowga Afrika uu muhiim u yahay nabadda iyo xasilloonida qaaradda.

“Maraykanku wuxuu weli u taagan yahay dagaalka argagixisada ee Soomaaliya, balse hadda waa waqtigii dalalka kale ee daneeya amniga iyo mustaqbalka Soomaaliya ay kordhin lahaayeen kaalmooyinkooda dhaqaale,” ayuu yiri John Kelley.

Wuxuu intaas ku daray in wadashaqeynta xooggan ee u dhexeysa Qaramada Midoobay iyo Midowga Afrika ay gacan ka geysan karto sidii loo gaari lahaa nabad, amni iyo barwaaqo waarta oo Afrika oo dhan ah.

Maraykanku wuxuu sidoo kale soo dhoweyay dadaallada Midowga Afrika ee lagu xoojinayo la-dagaalanka argagixisada, isagoo ballan qaaday in dalkiisu sii wadi doono taageerada ku aaddan nabadda iyo amniga guud ahaan Afrika.

Maraykanka wuxuu sidoo kale ku booriyay in Si degdeg ah loo joojiyo rabshadaha Suudaan, isagoo bogaadiyay dadaallada Wakiilka UN Lamamra ee ku aaddan isku dubaridka jawaabta UN iyo AU iyo IGAD.

Maraykanku wuxuu sheegay in hawlgallada nabadda ee UN, AU, iyo kuwa gobolka ee ka socda meelaha qaar ee Afrika ay muhiim tahay in la mideeyo siyaasadaha, tilmaamaha, iyo habraacyada si loo kordhiyo waxtarka dadaalladaas.

Arbaco 08, Oct 2025 {HMC} Dowladda Eretareeya ayaa raadinaysa dhabbihii ay u mari lahayd in Maraykanka uu ka qaado cunaqabataynta muddo kahor uu saaray, dedaallo kala duwan oo Washington & Asmara sameeyeen si ay isku fahmaan ayaa miiska lasoo dhigay soo jeedintaas oo aan weli lagu guulaysan.

Diblumaasiyiin u dhashay Dalka Eretareeya ayaa soo jeediyay in Maraykanka uu qaado tallaabo uu meesha uga saarayo cunaqabatayntaas oo dhibaato siyaasadeed, mid dhaqaale iyo mid bulsho ku ah Dalkaas, waxa ay diyaariyeen qorshe cad oo Madaxweyne Donald Trump loogu gudbinayo arrintaan.

Eretareeya ayaa sababaha ay cunaqabataynta u mutaysatay lagu sheegay in colaad muddo soo jiitamaysay ay ku wajahday Itoobiya oo ay ka go’day 1993dii, faragelin ay ku samaysay Soomaaliya iyo xaaladaha siyaasadda ee Gobolka Geeska Afrika oo galaangal xooggan ku yeelatay Dowladdaas sida hadalka loo dhigay.

Maamulkii xiligaas Maraykanka joogay ayaa Golaha Ammaanka ee Qaramada Midoobay horgeeyay qaraarka lagu xoojinayay cunaqabataynta 23kii December sanadkii 2009 oo Asmara lagu eedeeyay in ay taageertay ‘AS’ waxaana loo cuksaday qaraarka tirsigiisu yahay 1907, 13 dal ayaa xiligaas u codaysay cunaqabatayntaan, hal dal ayaa diiday mid kalena wuu ka aamusay.

Maraykanka iyo Eretareeya ayaa sanadihii u dambeeyay isaga soo dhawaanayay sidii hore balse Maamulka Madaxweyne Donald Trump ma qaadan go’aan uu ku qaadayo cunaqabataynta mar haddii sidii hore aanay ahayn Xukuumadda Asmara, waxaa socda dedaallo Washington looga dhaadhicinayo sida wararku sheegayaan.

Arbaco 08, Oct 2025 {HMC} Madaxweynaha Maraykanka Donald Trump ayaa markale weerar afka ah ku qaaday Soomaaliya isaga oo tusaale aan isku dhigmin ku dhinac dhigay Xisbiga Siyaasadda ay isku hayaan ee Dimuqraadiga, waxa uu durba la kulmay jawaab culus oo uga timid dhanka Xildhibaan Ilhaan Cumar.

Trump ayaa tusaale usoo qaatay in Xisbiga Dimuqraadiga uu yahay mid aan hoggaamiye lahayn oo jahwareersan isla markaana xusuusiyo Soomaaliya sida uu hadalka u dhigay, isaga oo yiri “Dimuqraadigu ma lahan Hoggaamiye, waxa ay I xusuusiyaan Soomaaliya”.

Intaas kaddib, Xildhibaan Ilhaan Cumar ayaa bartiisa X (Twitter) soo dhigtay qoraal ay uga jawaabayso Hadallada aan ka fiirsiga uusan u dhihin Madaxweynaha Donald Trump ee ugu gafay Soomaaliya, shaqsiyaddeeda iyo Xisbigeedaba.

“Maalin cusub, Sheeko been ah oo isla mid ah, Donald Trump waa nin aan xishoon, Cunsuri ah oo Musuqmaasuq iyo been sheegid isku darsaday, waad ku mahadsan tahay dareenka arrintaan” ayay tiri Xildhibaan Ilhaan Cumar.

Donald Trump ayaa dhowaan la kulmay Madaxweynaha Soomaaliya Xasan Sheekh Maxamuud isaga oo u sheegay in uu Ilhaan Cumar u wado dalkeeda asalka ah balse wuu ka diiday, muddo oo sheekado dansanayd haatan ayuu dib usoo faagay Trump.

Xildhibaan Ilhaan Cumar ayaa horay isaga caabisay weerarro Afka ah oo uga yimid Donald Trump & xubno katirsan Xisbigiisa Jamhuuriga ah, waxa ay ku sheegtay in uu u baahan yahay in la baro shuruucda Dalkaas iyo kan caalamiga ah.

Talado 7, Oct 2025 {HMC} Iiraan ayaa heshay kayd cusub oo gaaska dabicii ah oo lagu qiyaasay 10 tirilyan oo cubic feet oo qiime ahaan ku dhow 50 bilyan oo dollar , taas oo si weyn u kordhinaysa kaydka tamarta dabiiciga ah ee Iiraan.

Iiraan hore ayay ugu jirtay kaalinta labaad ee adduunka ee dalalka heysta kaydka ugu badan ee gaaska dabiiciga ah , kaliya waxaa ka horreeya Ruushka,balse helitaankan cusub ayaa ka dhigan in awooddeeda tamareed ay sii ballaaratay, sida ay werisey RT.

Ku dhawaaqista inay Iiraan heshay kayd cusub oo gaaska daiicaga ah waa mid aan laga soo dhaweynayn Mareykanka iyo Israa|l oo ku qasban inay sameeyaan fallanqeyn, maadaama helitaankan uu kordhinayo awoodda dhaqaale, siyaasadeed iyo istiraatiijiyadeed ee Iiraan.

Talado 7, Oct 2025 {HMC} Israaiil ayaa 6 milyan oo dollar ku bixinaysa in la dhiso shabakaddo internet-ka oo lagu xirayo ChatGPT, Gemini iyo Gro, oo dhammaantood ah barnaamijyo Ai ah oo loo adeegsado xog baarista , iyadoo lagu shubayo macluumaad lagu taageerrayo Israaiil.

Qorshaha wuxuu yahay in isla marka ChatGPT, la waydiiyo macluumaad la xiriira dagaalka marinka Qasa ee ay xasuuqa ka wado Israaiil, waxay noqonaysaa warbixinta aad ka heleyso mid u xaglinaysa Isra|l, halkaa oo laga saarayo wax walba oo ka dhan ah Telaabiib.

Tan oo qeyb ka ah qorshe sannadkii lagu bixinayo in ka badan 140 milyan oo dollar oo lagu doonayo in muddo la yar shan sanno laga waayo internetka macluumaad kasta oo ka dhan ah Israaiil ama la xiriira dagaalka Qasa.

Israaiil waxay howshan u xilsaartay inuu kala shaqeeyo shirkad uu leeyahay Brad Parscale, oo ahaa maamulihii hore ee ololaha doorashada ee Donald Trump, kaddib markii ay jahwareer ka wajahday dareenka caalamka gaar ahaana dalalka galbeedka oo ay ka dhaceen wax aysan horey u xisaabin oo ah kacdoon bulsho oo lagu diidayo ficillada arxan-darrada ah ee Israaiil, waxaana ka dhacay dhammaan caasimaadaha reer galbeedka isku soo baxyo aan xad lahayn oo malaayiin qof ay ka qaybgaleen, taa oo argagax ku noqotay Israaiil.

Ma jirin banananbaxyada ka dhacay Yurub, Mareykanka iyo Australia, dal Carbeed marka laga soo tago Yemen oo ay ka dhaceen , sidoo kale ma jirin shaqsiyaad caan ah oo sameeyay abaabul bulsho oo ka dhan ah Israaiil , gudaha Carabta, halka dalalka galbeedka ay ka dhacday inay soo Islaamaan boqollaal ruux oo ay ku jiraan xubno caan ah, dabcan Israaiil waxay horey u qabatay shaqo taa oo lagu aamusiyay Carabta, laakin si aysan horey u xisaabin dhibaato weyn iyo codod ka dheer Carabta ayaa ka soo baxay galbeedka , taa oo ah waxa ay hadda doonayso inay raadiso habab lagu aamusin karo.

Netanyahu, wuxuu toddobaad ka hor yiri ; “ Bambooyinka Mareykanka waxaa ka xooggan oo saameyn iyo xanuun darran leh baraha bulshada oo ay ka socdaan wax naga dhan ah.”
Halka xoghayaha arrimaha dibadda Mareykanka, Marco Rubio oo ka mid ah shaqsiyaadka daacada u ah Israaiil uu qiray; “ Israaiil waxaa ay noqotay mid laga nacay dunidda.”

Putin ayaa isagana toddobaad ka hor yiri : “ Waxay wajahaysa Israaiil naceyb raacay xiddidada jiilka da’yarta ah, taa oo ah xaalad aan adkeysi loo yeelan karin… Waa in la dhageysto Falastiiniyiinta si arrintan looga baxo.”

Talado 7, Oct 2025 {HMC} Burcadda kombiyuutarrada oo lala xiriirinayo maamulka Kuuriyada Waqooyi ayaa xaday in ka badan $2 bilyan (£1.49bn) sida ay sheegeen cilmi-baarayaal sheegay in 2025-ka uu yahay sannadka ay xatooyada jabin doonto rikoorada.

Xatooyada ayaa hadda ka dhigan qiyaastii 13% wax soo saarka guud ee dalka (GDP), sida ay sheegtay Qaramada Midoobay.

Laamaha ammaanka ee reer galbeedka ayaa sheegay in lacagtan lagu maalgeliyo hubka Nukliyeerka ah ee Kuuriyada Waqooyi iyo barnaamijyada horumarinta gantaallada.

Sanadihii la soo dhaafay, kooxaha jabsada kombiyuutarrada sida Kooxda Lazarus ayaa bartilmaameedsanayay xaddi badan oo cryptocurrency ah.

Weerarradan oo ah kii ugu cuslaa ayaa dhacay bishii Febraayo ee sanadkan markaasoo tuugadu ay $1.4 bilyan ka xadeen shirkadda lacagta dhijitaalka ah ee ByBit.

Laakiin cilmi-baaris cusub oo ay sameeyeen cilmi-baarayaasha Elliptic ayaa ka digaya in dambiilayaasha internetka ay sii kordhinayaan beegsiga dadka haysta lacag badan oo dhijitaal ah.

Talado 7, Oct 2025 {HMC} Wasiirka Madaxtooyada Somaliland Khadar Xuseen Cabdi, ayaa sheegay heshiiska ay xukuumaddu la gashay Dawladda Puntland uu leeyahay istaraatajiyad amni oo fog iyo miisaan diblomaasiyaddeed.

“Heshiiska ay Somaliland la gashay  Puntland, waxa uu leeyahay istaraatijiyado amni oo fog, iyo miisaan diblomaasiyadeed oo xoojinaya doodda aqoonsiga iyo garawshiiyaha qarannimada aynu dunida uga rabno,” ayuu yiri Wasiir Khadar.

Wasiirka madaxtooyaddu wuxuu sheegay in heshiiskani ka xeeldheer yahay inuu fahmo ruux aan wax badan ka aqoon istaraatijiyadaha dawladnimo, waxaana u yiri “Way ka xeeldheertay wax uu fahmi karo ruux aan wax badan ka aqoon istaraatiyadaha dawladnimo, siyaasaddana u yaqaanna naxli uu ka dhex abuuro dadkiisa iyo magaaladii uu Maayar ka u ahaa ee Burco iyo inuu hagardaamada gobolkiisa cid kale ku raalligeliyo.”