Isniin, 8 Sep 2025 {HMC} Wararka ka imaanaya magaalada Durban ee xarunta gobolka Kwazulu Natal ee dalka Koonfur Afrika, ayaa sheegaya in muwaadin Soomaaliyeed oo lagu magacaabayay Cabdi Xuseen Fiidow (Cabdi Jaqaf ), halkaasi xalay lagu dilay.

Sida aan wararka ku helnay Cabdi Jaqaf, ayaa la dilay xilli uu kasoo baxay masaajid uu salaad cishaha kusoo dukaday, waxaana la sheegay in dilka ninkan uu ka dambeeyay nin kale oo Soomaali ah oo la sheegay in uu khilaaf kala dhaxeeyay.

Goobjoogayaal ,ayaa ku warramay in Cabdi Jaqaf lagu dilay xaafada Soomaalida ka degan tahay magaalada Durban markii uu salaad kasoo baxay, lamana oga ilaa hadda sababta rasmiga ah ee keentay dilka ninka Soomaaliga ah u geestay muwaadin kale oo Soomaaliyeed.

Dalka Koonfur Afrika oo si joogto loogu dilo muwaadiniinta Soomaaliyeed ee halkaasi ganacsiga ku leh, ayaa mararka qaar la sheegaa in ay Soomaalida dhaxdopoda is dilaan, sidoo kale isku adeegsadaan kooxo kale oo gaangistaro dadka dila ah.

Isniin, 8 Sep 2025 {HMC} Magaalada Addis Ababa xarunta Dalka Itoobiya waxaa maanta ka dhacaya Shirka looga hadlayo Isbaddelka Cimillada iyo Saamaynta taban ee Afrika ka dhaxashay, waxaa ka qaybgalaya Madax uu kamid yahay Madaxweynaha Soomaaliya Xasan Sheekh Maxamuud.

Meertada labaad ee Shirka Cimillada Afrika waxaa lagu lafaguri doonnaa sidii looga gaashaaman lahaa saamaynta khatarta badan ee qaaraddaan ka dhashay, in la sameeyo qorshe isku xiraya Madaxda Afrikaanka ah iyo sidii xal wadajir ah loo raadin lahaa.

Madaxweynaha Jamhuuriyadda Federaalka Soomaaliya Xasan Sheekh Maxamuud ayaa khudbad uu uga hadlayo saamaynta isbaddelka Cimillada ay ku reebtay dalka ka jeedin doonna shirkaan isaga oo kulamo gaar gaar ah la qaadan doonna madaxda kala duwan.

Madaxda uu Madaxweyne Xasan Sheekh Maxamuud la kulmayo waxaa kamid ah Ra’iisul Wasaaraha Itoobiya Abiy Ahmed, Madaxweynaha Jamhuuriyadda Jabuuti Ismaaciil Cumar Geelle, Madaxweynaha Kenya William Ruto iyo mas’uuliyiin kale.

Isniin, 8 Sep 2025 {HMC} Maxkamad ku taalla Australia ayaa xukun xabsi daa’in ah ku xukuntay Erin Patterson kaddib markii ay sun ku dishay saddex kamid ah qoyska Nin ay kala tageen halka dhaawac daran uu suntaas kala kulmay qof kale sida lagu sheegay eedaha loo jeediyay.

Erin ayaa qadasho ku marti qaadday xubnahaan inkasta oo la sheegay in uu ka cudur daartay Ninkii ay kala tageen, kaddib waxa ay sun u marisay hilibkii ay cuneen Dadkaas oo markii dambe dhintay, dhacdadaan oo dhacday Bishii July sanadkii 2023 ayaa tan iyo xiligaas la baarayay.

Dacwad oogaha ayaa sheegay in aanay jirin qoomamo ay haweenaydaan ka muujineyso ficilkaas galaaftay nolosha saddex ruux iyo dhaawaca joogtada ah ee qofka kale soo gaaray, waxa uu dalbaday in aan laga qafiifin xukunkaas ku dhacay ee xabsi daa’inka ah.

Dadka ee dishay ayaa kala ah: Hooyada iyo aabaha ninka ay kala tageen iyo walaashiis, lama sheegin colaadda intaas la ee sababtay in ay dil wadareed arxan-daran ay u gaysato qoyskaas sida lagu sheegay warka kasoo baxay dacwad oogaha.

Erin Patterson oo ah 50 jir waxaa ay qaadanaysaa xabsi aan racfaan lahayn isla markaana aan laga qafiifin doonin, waxaa la sheegay in kiiskeeda uu saamayay guud ahaan dalka Australia maadaama arrinteeda ay la socdeen Dad badan.

Axad, 7 Sep 2025 {HMC} Madaxwaynaha Jamhuuriyadda Federaalka Soomaaliya Mudane Dr. Xasan Sheekh Maxamuud ayaa soo gaaray magaalada Addis Ababa ee caasimadda dalka Itoobiya halkaas oo uu kaga qaybgali doono Meertada Labaad ee Shirka Cimilada Afrika.

Madaxwaynaha ayaa Shirka ka jeedin doona khudbad taabanaysa dhinacyo ay ka mid yihiin ajandayaasha hortabinta leh ee ay Dowladda Federaalka Soomaaliya u dajisay maaraynta iyo yaraynta saamaynta taban ee isbeddelka cimilada uu dalka ku leeyahay, isaga oo sidoo kale kulamo-doceedyo la yeelan doona madaxda dhiggiisa ah ee goobjoogga ah.

Axad, 7 Sep 2025 {HMC} Agaasinka Waxbarashada Maamulka Gobolka Banaadir ayaa soo saaray amar ku saabsan in iyadoo lagu guda jiro fulinta qodobbadii kasoo baxay War-murtiyeedkii Jowhar, in ardayda dugsiyada gobolka aysan soo qaadan karin taleefoonnada casriga ah (smartphones) inta lagu guda jiro waqtiga waxbarashada.

Tallaabadan ayaa agaasinka waxbarashada Gobolka Banaadir waxa uu ku tilmaamay in ay u qaadeen si loo xakameeyo saameynta taban ee ay taleefoonnadan ku leeyihiin waxbarashada iyo akhlaaqda ardayda.

Maamulka ayaa sidoo kale ka codsaday waalidiinta in ay si dhow ula shaqeeyaan maamulada iyo dugsiyada si loo hubiyo in ardaydu aysan wadan taleefoonnada casriga ah, taas oo qayb ka ah dadaallada lagu horumarinayo jawiga waxbarashada iyo sidii loo ilaalin lahaa edbinta iyo anshaxa ardayda.

“Annagoo fulinayna qodobbadii kasoo baxay War-murtiyeedkii Jowhar, waxaa dugsiyada Gobolka Banadir la wadaagnay in ardayda aan loo ogolaan in ay soo qaataan taleefoonnada casriga ah (Smartphones), si loo xakameeyo saameynta taban ee ay ku leeyihiin waxbarashada iyo akhlaaqda ardayda, Waxaan ka codsanaynaa waalidiinta sharafta leh in ay si dhow ula shaqeeyaan Maamulka iyo Dugsiyada, kaalintoodana ka qaataan hubinta in ardaydu aanay soo qaadan taleefoonnada casriga ah.” ayaa lagu yiri Bayaanka kasoo baxay agaasinka Waxbarashada ee Maamulka Gobolka Banaadir.

Waxa ay arintaani muujinaysaa sida ay maamulka gobolka uga go’an tahay inay kor u qaadaan tayada waxbarashada iyo anshaxa guud ee dugsiyada, iyadoo la xakameynayo saameynta qalabka teknolojiyadda ee laga yaabo inay carqaladeeyaan waxbarashada.