Sabti, 26 Abriil, 2025 {HMC} Wasiir ku xigeenka Arrimaha Dibadda ee dalka Ruushka, ahna Ergeyga Gaarka ah ee Madaxweynaha Ruushka u qaabilsan Bariga Dhexe iyo Afrika, Mikhail Bogdanov, ayaa maanta soo gaaray magaalada Muqdisho, caasimadda Soomaaliya.

Mikhail Bogdanov ayaa waxaa garoonka diyaaradaha ee Aden Cadde si rasmi ah ugu soo dhaweeyay Ku-xigeenka Wasiirka Arrimaha Dibadda Soomaaliya, Mudane Maxamuud Mursal, iyo mas’uuliyiin kale oo ka tirsan Dowladda Federaalka Soomaaliya.

Booqashada Bogdanov ayaa lagu tilmaamay mid muhiim u ah xoojinta xiriirka diblomaasiyadeed, iskaashiga dhaqaale, iyo arrimaha amniga ee u dhexeeya Soomaaliya iyo Ruushka. Sidoo kale, socdaalkiisu wuxuu qeyb ka yahay dadaallada Ruushka ee lagu ballaarinayo saameyntiisa diblomaasiyadeed ee Bariga Dhexe iyo Qaaradda Afrika.

Inta uu joogo Muqdisho, Mikhail Bogdanov ayaa la filayaa inuu kulammo rasmi ah la yeesho madaxda sare ee dowladda Soomaaliya, kuwaas oo looga hadli doono arrimo ay ka mid yihiin iskaashiga labada dal, taageerada Soomaaliya ee dhinacyada horumarinta, iyo arrimaha gobolka.

Dowladda Soomaaliya ayaa bogaadisay dadaallada dowladda Ruushka ee lagu taageerayo Soomaaliya, iyada oo muujisay sida ay uga go’an tahay in la xoojiyo xiriirka taariikhiga ah ee labada dal.

Sabti, 26 Abriil, 2025 {HMC} Wararka naga soo gaaraya Gedo ayaa sheegaya in haatan xiisad u dhexeysa maamulka Jubbaland iyo Dowladda Federaalka ay mar kale kasoo cusboonaatay gobolkaasi, gaar ahaan degmada Beledxaawo oo ay ka socdaan dhaq-dhaqaayqo iska soo horjeedo.

Xiisadda cusub ayaa timid, kadib markii Axmed Madoobe uu dul degay degmadaasi, isaga oo u diray mas’uuliyiin iyo ciidamo ka tirsan Daraawiishta Jubbaland.

Xildhibaan Nuur Axmed Diiriye oo kasoo jeedo Gedo, isla markaana ah guddoomiye ku xigeenka amniga iyo arrimaha gudaha Golaha Shacaka ayaa si adag uga hadlay xiisadda sida guud uga soo cusboonaatay gobolka Gedo, wuxuuna kasoo saaray digniin culus.

Nuur Axmed ayaa shaaca ka qaaday in Axmed Madoobe uu rabo inuu qabsado gobolka, isla markaana uu dul dagay shacabka degmada Beledxaawo, sida uu hadalka u dhigay.

“Qolada soo dul degtay Beledxaawo waxaan leenahay gadaal uga noqda Beledxaawo dhib uma baahna, duulaana uma baahna” ayuu yiri Xildhibaan Nuur Axmed.

Sidoo kale wuxuu intaasi sii raaciyay “Magaalooyinka kale maa la dul dago, maxaas qaas ku ah Beledxaawo arrintaas waa mid si gaar ah aan farta ugu fiiqeyno?”.

Waxaa kale oo uu farriin culys u diray ciidamada dowladda ee ku sugan degmooyinka Gedo, wuxuuna tilmaamay in iyagu ay mas’uul ka yihiin amniga guud ee gobolka.

“Annaga ka Federaal ahaan waxaan ku ognahay amniga gobolka ciidamada kala duwan ee DFS ka jooga gobolka, degmo walbo ciidanka ayaan ku ognahay” ayuu mar kale yiri.

Si kastaba ha ahaatee, Axmed Madoobe oo ay haatan is hayaan dowladda dhexe ayaa raba inuu isku ballaariyo gobolka Gedo, maadaama la galayo doorasho, Dowladda Federaalkana ay qorshe wayn ka leedahay gobolkaasi, si loo gaarsiiyo qof iyo cod.

Sabti, 26 Abriil, 2025 {HMC}  Madaxweynaha Puntland, Siciid Cabdullaahi Deni, ayaa ugu baaqay madaxweynaha Somaaliya, Xasan Sheikh Maxamuud inuu ka dhabeeyo gogosha wada-hadal ee uu u fidiyay saamileyda siyaasadda.

Si kastaba ha ahaatee, Madaxweyne Deni ma caddeyn mowqifkiisa ku aaddan in Puntland ay ka qeyb geli doonto gogoshada uu Madaxweyne Xasan Sheekh Maxamuud iclaamiyay.

Deni ayaa xusay in muddadii ay Puntland ka maqneyd shirka Golaha Wadatashiga Qaranka, in laga weecday dastuurkii horey loogu heshiiyay.

Wuxuu ku baaqay in dib looga noqdo wax ka beddelka lagu sameeyay dastuurka, isla markaana si qoto dheer loo eego tallaabo kasta oo la qaadayo.

“Madaxweynaha wuxuu ku dhawaaqay inuu gogol u fidinayo dadka saamaynta ku leh siyaasadda Soomaaliya. Waxaan ka codsanayaa inuu arrintaas ka dhabeeyo. Puntland hore ayay ugu dhawaaqday gogol wadahadal oo ay ugu yeeraysay ummadda Soomaaliyeed inay isugu timaado si xal waara loo gaaro,” ayuu yiri Madaxweyne Deni.

Sidoo kale, Madaxweyne Deni wuxuu carrabka ku adkeeyay in labada Aqal ee Baarlamaanka looga baahan yahay inay ilaaliyaan midnimada dalka, ayna diidaan wax kasta oo lid ku ah wadajirka dadka.

Si kastaba ha ahaatee, Madaxweynaha Soomaaliya ayaa sheegay in shirka Golaha Wadatashiga Qaranka lagu qaban doono bisha soo socota ee May, xilli uu ka qeyb galayay shir ay isugu yimaadeen Midowga Afrika iyo dalalka ugu deeqay Soomaaliya.

Sabti, 26 Abriil, 2025 {HMC} Ciidamada Deegaanka ee loo yaqaano Macawiisleeyda ayaa Mamnuucay Gaadiidka Safarka ee Maro Wadada isku Xirto Muqdisho ilaa degmada Moqokori

Sababaha gaarka ah ee Macawiisleeyda Wadadaas iyo Agagaaarkeed uga Mamnuuceen gawaarida Safarka ah ayeey ku sheegeen in Kooxda AS isticmaalaan gaadiidka safarka si ay ugu dhex dhuuntaan dadka shacabka ah, isla markaana ay weerarro qarsoodi ah ugu qaadaan tuulooyinka laga xoreeyay.

Waxaa la arkay in qaar ka mid ah gaadiidka safarka (gaar ahaan kuwa xamuulka iyo mootooyinka) loo adeegsado qaadista sahayda Al-Shabaab sida raashin, rasaas, iyo qalab kale. Amarkan ayaa yimid kadib markii Al-shabaab ay qabsadeeyn dhul badan oo ku yaala Gobolka Shabeellaha dhaxe, waxaana gaadiidka Safarka ah dhax maraan deegaano Al-shabaab Maamulaan.

Mid ka mid ah Macawiisleeyda Gobolka Hiiraan oo la hadlay Hiiraanweeyn waxa uusheegay in aaysan jirin Muda rasmi ah oo uu ku egahay Amarka looga mamnuucay Gaadiidka safarka ee maro Wadooyinka ka Soo Bilaawdo xadka Hiiraan iyo shabeelaha dhaxe ee aado Gobolada waqooyi oo ugu Horeeyo Galgaduud, Wuxuuse Tilmaamay in inta lagu Jiro Dagaalka Kooxda AS aay Tahay mamnuuc in la Maro Wadadaas.

Gobolka Hiiraan laga soo Bilaaawo Sanadkii 2022 ilaa 2025, waxa uu noqday xarunta ugu weyn ee dhaqdhaqaaqa ciidamada deegaanka ee Macawiisleeyda. Markii dagaalka ka dhanka ah Al-Shabaab uu xoogeystay, mamnuucidda Gaadiid safarka waxay noqotay hab ay Macawiisleydu ugu difaacaan guulahooda.

Sabti, 26 Abriil, 2025 {HMC} Guddoomiyaha Aqalka Sareee Baarlamaanka Jamhuuriyadda Federaalka Soomaaliya Mudane Cabdi Xaashi Cabdullaahi oo uu weheliyo Guddoomiye ku xigeenka labaad ee Aqalka Sare Md Cabdullaahi Cali Xersi “Timacadde”, ayaa maanta shir guddoomiyay kulanka 3-aad ee Kalfadbiga 6aad ee Golaha Aqalka Sare.

Ajandaha kulanka ayaa ahaa;
1.Akhrinta Labaad ee Hndise Sharciyeedka Hay’addaha Maaliyadda.
2.Akhrinta Labaad ee Hindise Sharciyeedka Canshuurta Dakhliga.
3.Akhrinta Labaad ee Hindise sharciyeedka Shirkadaha Caymiska.
4.Akhrinta Labaad ee Hindise sharciyeedka wax-ka-beddelka sharciga Lacag dhaqista iyo ka hortaga Maalgalinta Argagixisada.

Ugu horrayn Guddoomiyaha Guddiga Maaliyadda Aqalka Sare ee BJFS, Senator Cabdi Axmed Dhuxuloow ( Dhagdheer) ayaa Sanatarrada la wadaagtay Akhrinta labaad ee Hindise Sharciyeedyada kor ku xusan oo ay toosin, wax ka bedel, siiqayn iyo qaabaynba ay ku sameeyeen qodobada qaar ee shuruucda ay gacanta hayaan.

Intaas ka dib, waxaa la guda-galay doodda iyo dhagaysiga aragtida Sanatarrada kulanka maanta soo xaadiray, iyagoo soo bandhigay fikirkooda iyo aragtiyada ay ka qabaan hindise sharciyeedyada kor ku xusan oo ay tahay in lagu kordhiyo ama laga tiro, si loo helo shuruuc isdheeli tiraysa. dhanka kalena Sanatarrada goalaha ayaa su’aallo ku saabsan hindise sharciyeedyada waydiiyey Wasiirk Ku-xigeenka Wasaaradda Maaliyadda ee XFS
Sidoo kale, Wasiirka ayaa Sanatarrada uga jawaabay su’aalihii ay waydiiyeen, isaga oo Sanatarrada uga mahadceliyey aragtidooda wax ku oolka ah ee ay ku biiriyeen shuruucdan oo muhiim dib u dhiska dowladnimada Soomaaliya.

Ugu dambeyntii, Guddoomiyaha Aqalka Sare ayaa boogaadiyey guddiga maaliyadda oo shaqo wanaagsan ku soo qabtay muddo kooban oo ay gacanta ku hayeen hindise sharciyeedyo muhiim u ah dalkeenna loona qabo baahiweyn, wuxuuna Senatorrada Aqalka Sare kula dardaarmay in ay ilaaliyaan wakhtiga isla markaana soo xidhay kulankii maanta.