Arbaco 02, April-2025 {HMC} Senator Cory Booker, oo ka tirsan Xisbiga Dimuqraadiga ee New Jersey, ayaa galay taariikhda Talaadadii kadib markii uu jeediyay khudbad socotay in ka badan 25 saacadood, taasoo jebisay rikoorkii hore ee uu dhigay Senator Strom Thurmond.

Booker, oo horey u soo noqday duqa magaalada Newark, ayaa khudbaddiisa u adeegsaday dhaliil xoogan oo uu u jeediyay madaxweynihii hore ee Mareykanka, Donald Trump.

Intii uu hadalkiisa jeedinayay, wuu yareeyay nasashada, marka laga reebo daqiiqado kooban oo Baarlamaanku su’aalo weydiinayeen.

“Waxa dhacay 71-kii maalmood ee la soo dhaafay waa wax aan loo dulqaadan karin, waana in cadaadis la saaro si wax loo beddelo,” ayuu yiri Booker, isaga oo muujinaya dareenkiisa ku aaddan xaaladda siyaasadeed ee dalka.

Khudbaddiisa oo ahayd mid si weyn loo hadal hayay, ayaa kusoo beegantay xilli uu xisbiga Dimuqraadigu dadaal ugu jiro in wax laga beddelo qaar ka mid ah siyaasadaha Trump.

Arbaco 02, April-2025 {HMC} Warar dheeraad ah ayaa ka soo baxaya dagaal u dhaxeeyo laba Maleeshiyo oo ka socdo inta dhaxeysa deegaannada Jiicboor iyo saax quran ee galbeedka gobolka Mudug.

Ilo deegaanka ah ayaa inoo sheegay in dagaalka uu salka ku hayo aano qabiil, welina la maqlayo rasaasta ay dhinacyada is weedaarsanayaan.

Waxaa jira khasaare isugu jira dhimasho iyo dhaawac oo ka dhashay dagaalka, wallow aan weli laheyn tirada rasmiga ah.

Waxaa soconaya baaqyo iyo dadaallo la doonayo in nabad lagu kala dhex dhigo beelaha ku dagaalamaya galbeedka Gobolka Mudug.

Dagaal beeleedyada ayaa ku soo laab laabtay deegaannada gobollada Dhexe gaar ahaan, waxaana jira kulamo nabadeed oo lagu xalliyay colaad hore halkaasi uga taagna.

Arbaco 02, April-2025 {HMC} Wararka ka imaanaya magaalada Baydhabo ayaa sheegaya in Afar Xubnood oo katirsanaa Kooxda Al shabaab ay isku soo dhiibeen Ciidamada Booliiska Gaar ahaan laanta Baarista Dembiyada CID-da ee Gobolka Bay.

Wararka waxa ay intaa ku darayaan in Xubnahaan katirsanaa Kooxda Al shabaab ay kaga biireen Gobolada Bay, Bakool iyo Jubooyinka, waxayna Xubnahaan Goob joog u ahaayeen Dagaalo lagu naafeeyay saaxiibadooda ku jiray Al shabaab oo ka kala Dhacay Gobolada Bay, Bakool iyo Buulo Xaaji oo katirsan Jubbaland.

Dhammaantooda afarta Xubnood oo ay Koonfur Galbeed soo bandhigtay ayaa xusay in muddo ay ku taamayeen sidii ay naftooda ugala soo baxsan lahaayeen Kooxa Al shabaab balse ay ku adkaatay fursadaasi.

Waxa ay shaaca ka qaadeen inay u dulqaadan waayeen duqeymaha diyaaraha oo lagu bartilmaameysaday in badan oo saxiibadooda kamid ah iyagoona xusay in iyagu dhowr mar ay duqeymaha diyaaraha ka badbaadeen.

Ugu dambeeyay dhalinyarada kale ee Kooxda kamid ka ah ayay u rajeeyeen inay qaadaan wadiiqad lamid ah midka ay iyagu iskugu dhiibeen Maamulka Koonfur Galbeed waxaana ay ka mahadceliyeen soo dhoweyn ay sheegen inay ka heleen taliska Booliska gobolka Bay.

Arbaco 02, April-2025 {HMC} Dowladda Fedaraalka Soomaaliya oo kaashanaysa Taliska ciidamada Mareykanka AFRICOM ayaa si wadajir ah u fuliyay howlgal duqeyn ah oo gobolka Bari lagula beegsaday kooxda Daacish.

Warsaxafadeed kasoo baxay Wasaaradda Warfaafinta Xukuumadda Fedaraalka Soomaaliya ayaa lagu sheegay in duqeynta si gaar ah loogu beegsaday maleeshiyaad iyo horjoogayaal ka tirsan Daacish oo isku aruursanayay Koonfur bari magaalada Boosaaso.

Dowladda Fedaraalka ayaa sidoo kale sheegtay in howlgalkaan uu ahaa mid lagu taageerayay dadaalada ciidanka Daraawiishta maamulka Puntland ugu jiraan sidii ay deegaanadooda uga ciribtiri lahayeen kooxda Daacish.

Warsaxafadeedka dowladda Fedaraalka Soomaaliya ayaa sidoo kale lagu xusay in howlgalkaan lagu dilay xubno badan oo ka tirsan Daacish, islamarkaana aysan jirin wax khasaare ah oo soo gaaray dad shacab ah.

Duqeyntaan laga fuliyay Koonfur bari Boosaaso ayaa kusoo aadeysa, iyadoo bilahii lasoo dhaafay deegaano ku yaala gobolka Bari, gaar ahaan dhulka buuraleyda ah ay ka socdeen dagaalo culus oo u dhaxeeyay ciidamada Puntland iyo kuwa Daacish ee fariisimaha waa weyn ka sameystay gobolka Bari.