Sabti-03-Feb- 2024-{HMC} Ciidamada nabad-gelyada waddooyinka magaalada Muqdisho (Traffico) ayaa bilaabay sumadeynta hagaagsan iyo tilaamaha waddo marista , si loo yareeyo shilalka ka dhaca waddooyinka mashquulka badan.

Taliska ciidanka taraafikada ayaa sheegay in sumadeynta waddooyinka magaalada Muqdisho uga gon leeyihiin , sidii wax looga bedeli lahaa habraaca iyo nabad-gelyada dadka iyo gaadiidka waddooyinka mara.

”Tilmaamahaan ayaa wax ka badalidoona is barbaryaaca iyo Nabadgalyada Ummadda iyo Gaadiidka mara wadooyinka Caasimada, sumadeyntan ayaa sidookale sare u qaadi doonta bilicda caasimada oo la jaanqaadeysa caasimaadaha dhigeeda ah” ayaa lagu yiri war kasoo baxay taliska taraafikada.

Laamiyada magaalada Muqdisho ayaana horey u laheyn calaadamo iyo shuruuc kala hagta gaadiidka iyo dadka isticmaala, waxaana waddooyinkaasi ku yar ciidamada nabad-gelyada ,kuwaa oo gelinka hore ee maalintii kaliya lagu arko waddooyinka qaar.

Sabti-03-Feb- 2024-{HMC} Dowladda Federaalka Soomaaliya iyo dowlad goboleedyada dalka ayaa xalay yeeshay shir gaar ah oo ku qabsoomay khadka taleefoonka, kaas oo looga hadlayay arrimaha maaliyadda ee guud ahaan dalka.

Shirkan ayaa waxaa soo qaban-qaabisay wasaaradda maaliyadda xukuumadda Soomaaliya, waxaana ka qayb-galay wasiir Biixi Cige iyo wasiirada maaliyadda maamullada dalka.

Inta uu socday shirka ayaa ayaa looga wada-hadlay arrimo badan oo ku saabsan horumarinta Maaliyadda Dalka maadaama Dowladda Federaalka Soomaaliya laga cafiyay deymihii lagu lahaa, kuwaa oo cuuryaamiyay dhaqaalaha Soomaaliya.

Haddaba maadaama dowladda Soomaaliya ay gashay waji cusub oo horumarin dhaqaale ah iyo sanad cusub oo la hiigsanayo meel sare, wuxuu Wasiirka Maaliyadda XFS Biixi Iimaan Cise uu shir muhiim la qaatay Wasiirada Maaliyadda heer Dowlad-goboleed” ayaa lagu yiri war-murtiyeed laga soo saaray shirka.

Ujeedka shirkan ayaa ahaa mid uu wasiirka maaliyadda ee dowladda dhexe kula tashanayay wasiiradda maaliyadda ee maamul goboleedyada, si fikirkooda ugu darsadaan waddada cusub ee loo qaadayo horumarinta dhaqaalaha dalka.

Wasiirku wuxuu kala tashanayay fikirka ay ka qabaan waddada cusub ee horumarinta maaliyadda dalka” ayaa mar kale lagu yiri warsaxaafadeedka.

Qodobada kale ee laga wada-hadlay waxaa kamid ahaa hannaanka dib u habeynta maaliyadda dalka, mashaariicda horumarineed ee saaxibada caalamiga ah ay ku taageeraan guud ahaan Soomaaliya iyo hadafka koowaad ee dowladda federaalka Soomaaliya iyo dowladaha xubnaha ka ah

Soomaaliya ayaa maalmihii u dambeeyay dadaal ku bixineysay horumarinta dhaqaalaha, maadaama dhowaan uun laga cafiyay dhammaan daymihii lagu lahaa dalkeenna