Arbaco Oct 08, 2025 {HMC} Hay’adda Maareynta Masiibooyinka Soomaaliyeed (SoDMA) ayaa magaalada Muqdisho ku qabatay kulan wadatashi heer qaran ah oo muhiim ah, kaasoo ay ka soo qaybgaleen wakiillo ka kala socday Wasaaradaha Gargaarka iyo Maareynta Masiibooyinka ee Maamul-goboleedyada iyo maamulka Gobolka Banaadir.

Kulankan wadatashiga ah oo socday muddo sedex bari ah oo u dhexeysay 28_30 June , ayaa diiradda lagu saaray xoojinta habraacyada ilaalinta iyo awoodda baarista ee SoDMA, iyadoo loo marayo hanaan wadatashi loo dhan yahay. Ujeeddada ugu weyn ayaa ahayd in la sameeyo habraacyo baariseed oo mideysan oo heer qaran ah, kuwaas oo lagu ogaanayo loogana falcelin karo kiisaska ku tagrifalka gargaarka bini’aadantinimo.

Ujeeddooyinka kulanka waxaa ka mid ahaa:

1: In la dardargeliyo dadaallada lagu xoojinayo isla xisaabtanka iyo daahfurnaanta gargaarka bini’aadantinimo.

2: In la sameeyo habraacyo baariseed oo ay isla oggol yihiin dhammaan hay’adaha khuseeya.

3: In la dhiso awoodda baaris ee SoDMA iyo la-hawlgalayaasheeda, iyada oo la siinayo tababaro iyo agab farsamo.

4: In la xaqiijiyo in bulshada ay si ammaan ah, qarsoodi ahna u soo sheegi karaan kiisaska ku saabsan leexsashada gargaarka.

Wadatashigan ayaa qeyb ka ah dadaallada joogtada ah ee ay SoDMA ku horumarinayso daahfurnaanta, hufnaanta iyo la xisaabtanka ku saleysan maamulka gargaarka bini’aadantinimo, si loo ilaaliyo xaqa iyo karaamada dadka nugul ee ay saameeyeen musiibooyinka.

Arbaco Oct 08, 2025 {HMC} Banaan bixii la filayay in Muqdisho uu ka dhaco maalinta bari ah ayaa markale dib loo dhigay waxaana Dowlada iyo Madasha Samata bixinta ay ku heshiiyeen in la magacaabo gudi labada dhinac ah oo ka shaqeeya amniga iyo in si nabad ah loo qabto banaan baxa.

Goordhaw ayey dhinacyadu warbaahinta la wadaagi doonan heshiiskan kasoo baxay shir ay yeesheen Taliyayaasha Nabad sugida iyo Booliska iyo Xubna kamid ah Madasha samata bixinta oo ay kamid ahaayeen Xasan Cali kheyre iyo Cabdiraxman Cabdi shakuur.

Arbaco Oct 08, 2025 {HMC} Wasiirka Gaashaandhigga XFS, Mudane Axmed Macallin Fiqi, ayaa maanta kormeer ku tagay Taliska Taakuleynta Ciidanka Xoogga Dalka Soomaaliyeed ee Xarunta Villa Baydhabo.

Kormeerka ayaa ujeeddadiisu ahayd u kuurgelidda shaqada baaxadda leh ee ay hayaan saraakiisha iyo shaqaalaha taliska, iyo sidii loo xoojin lahaa adeegyada taakuleynta ee lagu taageerayo ciidamada ku sugan furimaha dagaalka.

Taliyaha Taliska Taakuleynta, G/sare Ibraahim Sheekh Maxamed Maxamuud, ayaa Wasiirka uga warbixiyay howlaha talisku hayo iyo qorshayaasha lagu horumarinayo adeegyada taageerada ciidanka.

Wasiir Fiqi ayaa ku bogaadiyay saraakiisha iyo howlwadeenada dadaalka ay ku bixiyeen taageerada geesiyaasha Xoogga Dalka, isagoo xusay in Wasaaraddu ka go’an tahay xoojinta adeegyada muhiimka u ah guusha dagaalka ka dhanka ah argagixisada. Sidoo kale,

Wasiirku wuxuu uga mahadceliyay saaxiibbada caalamka garab istaaga iyo taageerada joogtada ah ee ay siiyaan taliska iyo Ciidamada Xoogga Dalka.

Arbaco Oct 08, 2025 {HMC} Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa bogaadiyey tallaabada ay Soomaaliya si buuxda dib ugula soo wareegtay hannaanka madaxa-bannaan ee maareynta, kormeerka iyo ka-

warbixinta arrimaha xuquuqul insaanka, isaga oo hoosta ka xarriiqay in ay tahay waajibaad qaran oo in ka badan soddon sano laga maamulayay dalka dibaddiisa.

“Maanta waa maalin taariikhi ah maadaama Soomaaliya ay ku tallaabsatay horumar la taaban karo oo dhinaca dowladnimada ah, isla markaana ay diyaar u tahay in ay si madaxbannaan u fuliso waajibaadkeeda qaran iyo midka caalamiga ah ee ku aaddan dhowrista iyo ilaalinta Xuquuqda Aadanaha,” ayuu tilaamay Madaxwaynuhu Jamhuuriyaddu.

Dowladda Federaalka Soomaaliya waxaa ka go’an in ay sii ambaqaaddo ilaalinta karaamada iyo xuquuqda muwaadiniinteeda iyada oo la kaashaneysa qaybaha kala duwan ee daneeyayaasha heer gobol iyo caalami.