Isniin, 18 August 2025 {HMC}Guddoomiyaha Maamulka Gobolka Banaadir ahna Duqa Magaalada Muqdisho, Dr. Xasan Maxamed Xuseen (Muungaab) ayaa si adag u beeniyay eedeymaha sheegaya in shacabka lagu qasbay inay isdiiwaangeliyaan si ay uga qayb qaataan doorashooyinka deegaanka ee soo socda, isaga oo sheegay in habka isdiiwaangelintu uu ahaa mid si xor ah oo ay dadku si iskood ah ugu qayb qaateen.

Muungaab oo Axaddii ka hadlayay munaasabad rasmi ah oo ka dhacday caasimadda, ayaa sheegay in ku dhawaad hal milyan oo qof ay isdiiwaangeliyeen, isaga oo carabka ku dhuftay in aysan jirin wax kiis ah oo la xiriira qof la khasbay.

“Waxaan rabaa inaan si cad u sheego qofna looma khasbin inuu isdiiwaangeliyo,” ayuu yiri duqa. “Shacabka Muqdisho iyaga ayaa siiskood ah u yimid, iyaga oo diyaar u ah inay doorashadooda ka qayb qaataan. Tani waa astaan muujinaysa horumar dimuqraadiyadeed.”

Hadalka Muungaab ayaa jawaab u ahaa eedeymo uga yimid qaar ka mid ah siyaasiyiinta mucaaradka iyo shacabka, kuwaas oo sheegay in ciidamada ammaanka la geeyay qaybo ka mid ah magaalada si ay cadaadis ugu saaraan dadweynaha inay isdiiwaangeliyaan iyadoo la sheegay in xitaa gaadiidka dadweynaha la joojiyay laguna khasbay dadka in la geeyo xarumaha isdiiwaangelinta.

Muungaab wuxuu eedeymahaas ku tilmaamay kuwo “siyaasadaysan” oo loogu talagalay in lagu wiiqo kalsoonida shacabka ee geedi-socodka doorasho ee hufan.

Isniin, 18 August 2025 {HMC} Madaxweynaha Burkina Faso Ibrahim Traore ayaa mushaarkiisa ugu deeqay Agoonta iyo Carruurta darbi-jiifka ah si ay helaan mustaqbal wanaagsan oo dhanka Waxbarashada ah sida lagu yiri war kasoo baxay Madaxtooyadiisa.

Troare ayaa la kulmay qaar kamid ah carruurtaas iyo ehelkooda isaga oo dhageystay warbixin kooban oo xaaladdooda la xiriirta, kaddib waxa uu ku dhawaaqay go’aanka ah in uu mushaarkiisa ku bixiyo sidii ay u heli lahaayeen nolol ka wanaagsan tan hadda ay ku nool yihiin.

Hoggaamiyaha Burkina Faso oo ay la socdeen mas’uuliyiin katirsan Xukuumaddiisa ayaa sheegay in Dowladda ay qaadaneyso waajibka ka saaran daryeelka Aqoonta iyo kuwa dayacan ee darbi-jiifka ah oo mas’uuliyad weyn ka saaran tahay.

Dalka Burkina Faso waxa uu dhacaa Galbeedka Qaaradda Afrika, dadka dalkaas waxaa lagu qiyaasaa 23.55 Milyan oo ruux sida ku xusan baarista uu sameeyay bangiga Adduunka sanadkii (2024), qaar kamid ah dadkaas ma heystaan dhaqaale ku filan.

Isniin, 18 August 2025 {HMC} Afhayeen u hadlay fallaagada M23 ayaa BBC-da u sheegay in ay in ay diyaar u yihiin nabad waarta haddii ay tani dhacdo ka hor inta aan la gaadhin waqtiga loo qabtay 18-ka August 2025oo lagu wado in heshiis nabadeed uu dhex maro Jamhuuriyadda Dimuqraadiga ah ee Congo iyo kooxda M23.

Oscar Balinda ayaa sheegay in kooxdu ay hore u qaadday tallaabo nabadeed oo ay doonayso in ay la gaadho dawladda DR Congo una gudbisay dalka Qatar oo ah dhexdhexaadiyaha hoggaaminaya geeddi-socodka nabadda ee Dooxa.

“Wax walba oo na looga baahnaa waan samaynnay, hadda waxaan ka sugaynaa dawladda in ay wax ka qabato si xal loo gaadho” ayuu yidhi.